Read Hrangkhol ZAKARIA 10 Bible Online

ZAKARIA 10 - Hrangkhol bible

ZAKARIA 10

¹Khua a kangin RENGPA kuang rotui zong roi. Sûmphâihai le rotuihai chu RENGPA zuang itîr a nia, loihai chu mi tin ta hrangin hring zon zonin a siama.

²Mihaiin millimhai le tasân theihai an irdonhai ngaia, khannisian a sâmna an ihmuhai chu minlak le chanlamboi korong a ni ngai. Senkhatin irmanghai an sui ngaia, khannisian fena hrang vai kêng nangni an fe insualtir ngaia, an lungngam saknahai khom chu hmanghmunboi ving a ni. Khasikin mipuihai chu belra irhmanghai angin an irvâk indarh ngaia, hruaitu an nei no sikin, an buai ngai.

³Khan RENGPA’N hiang hin a hrila, “Ki mihai chunga roirêltu, ram dang mihai chunga hin ki ning an mura, khasikin hremhai hrang ki ni. Juda mihai chu ki ta an nia, kei RENGPA Pathian hin anni chu donsuihai ki ti. Anni chu irdoinaa ki sakor hrâthai ni an ti.

⁴Anni lai ata roirêltuhai, hruaituhai le ki mihai chunga roirêl hrangtuhai chu la suak an ti.

⁵Sipaihaiin an râlhai lampuia dialdôka an ichîlhai angin, Juda mihai chu zoina changin la om an ti. RENGPA chu anni tiang a om sikin la doihai an ta, râlhai sakor chung chuang mihai ten khom lan hnêhai an ti.

⁶Juda mihai chu inhrâttirhai ki ta, Israel mihai chu saninzôkhai ki ti. An chunga lungkhamna nei ki ta, an rama hong hruai kîrhai nôk ving ki ti. Anni chu ki lei ihnôl tâkhai angin om no nihaia, Kei RENGPA an Pathian hin an chongchainahai chu zuang sâm ki ti.

⁷Israel mihai chu sipaihai angin hrât an ta, Uain intu angin raifân takin la om an ti. An irchi suanpârhaiin hi inhnêna hi inhre mai an ta, RENGPA sinthohai sikin an râi la fân a ti.

⁸Ki mihai chu koihai ki ta, an rêngin bûmhai ki ti. Anni chu saninzôkhai ki ta, pung hranga hrila an iom angin, tamtakin lan punghai ki ti.

⁹Nam tinhai laia ki’rthekindartirhai khoma, ram hla takahai khomin nin hre mai an ti. Anni leh an nâi le tehai ngei chu la hring an ta, an rêngin an ram tiang la hong kîr an ti.

¹⁰Aigupta le Assuria ramhai rengata khom hruai khômhai ki ta, an rama inomtirhai ki ti. Gilead le Lebanon-ah khom inomtirhai sa ki ta; ram murdi chu mihriamin la sip an ti.

¹¹An buaina tuipui an pal laiin, kei RENGPA ngei hin tuiirsokhai chu vîk indâi ki ta, Nail li inthûkhai khom chu la kang an ti. Assuria omlianna chu sâtthâk ki ta, Aigupta roiinpuina chu a sinthotheina leh la irhmang a ti.

¹²Ki mihai chu hrât takin siamhai ki ta, ni biak an ta, Kei chu ni zôm an ti,” tiin RENGPA’N a hrila.