Read Hrangkhol ZAKARIA 12 Bible Online

ZAKARIA 12 - Hrangkhol bible

ZAKARIA 12

¹Hi hi Israel chungthua RENGPA rengata thu suak chu a ni, RENGPA irvânhai kaiinzara, irnêng inding suaka, mihriamhai kuanga hringna petu’n hiang hin a tia:

²“Jerusalem chu a vêla nam murdihai ta hrangin inruina khilâtin siam ki ti. Khan Jerusalem chu an doi tena, Juda khopui murdihai khom chu doiin om an ti.

³Khannisian kha zoro kha a hong tung tena chu, Jerusalem chu lungpui riktak angin siam ki ti, tu nam khomin indompai a tuma ni’n chu, ama chu innatirin om a ti. Rammuala nam tin sipaihai chu ama doi hrangin irzomkhôm an ti.

⁴Kha tena chu keiin an sakor murdihai chu irthatâk inlatirhai ki ta, an sakor chung chuang mihai chu invêttirhai ki ti. Juda mihai chu hrunghai ki ta, khannisian an râlhai sakorhai chu an mit inchotir pehai ki ti.

⁵Khanchu Juda namhai khan an bingin, ‘RENGPA Pathianin Jerusalema a mihai chu hrâtna a pêk a ni hi,’ la ti an ti.

⁶Kha tena chu Juda namhai chu ram kâra mei angin le, loia bu hmun laia mei angin siamhai ki ta, an kôlvêla namhai chu lan boipaihai ving an ti. Jerusalema mihai chu khopui sûnga khan lungthi takin om an ti.

⁷Juda sipaihai chu kei RENGPA ngei hin inhnêna pehai masa ki ta, khanchu Davida irchi suanpârhai leh Jerusalema mihaiin roiinpuina an idong hrang kha Judahaiin an idong hrang nêk khan roiinpui bîk no ni.

⁸Kha tena chu RENGPA’N Jerusalema omhai chu hrunghai a ta, an laia hrât loi tak khom Davida angin la hrât a ti. Khanchu RENGPA vântirtôn, Pathian ang dên khan, Davida irchi suanpâra mihaiin anni chu la hruaihai an ti.

⁹Kha tena chu Jerusalem doi tumtu nam tinhai chu lan boipaihai ki ti.

¹⁰Davida irchi suanpâra mihai le Jerusalema mihai chunga khan khonzâna le chongchai nuamna irtha chu buak ki ti. Khanchu an lei isun that tâk kha en an ta, mi’n a nâi khât a ichâ angin ama chu la châ an ti. Nâilutîr sûntuhai angin a sân la sûn an ti.

¹¹Khanchu kha nia Jerusalema chap irhâi chu Megido phâia an pathian Hadad-Rimona an ichap ngai ang dôrin inring a ti.

¹²A ram sûnga sûngkua tinhai chu mâni sûngkua seng la châ an ti: Davida sûngkuaa mihai, Nathana sûngkuaa mihai,

¹³Levi sûngkuaa mihai, Simeia sûngkuaa mihai le sûngkua dang murdihaiin.

¹⁴Sûngkua tin chu mâni seng la’rsûn an ta, sûngkua tina pasalhai chu nupanghai leh ni loiin an bing sengin sûn an ti.