Read Hrangkhol ZAKARIA 14 Bible Online

ZAKARIA 14 - Hrangkhol bible

ZAKARIA 14

¹Roirêl hranga RENGPA toina hrang nikhua chu anai ta! khanchu Jerusalem chu longindarh ni a ta, râllâk sumhai chu ni mithmu ngeia irsem an ti.

²RENGPA’N nam tinrênghai chu Jerusalem doi hrangin hong hruaihai a ti. Khopui kha lâk ni a ta, inhai chu longindarh ni a ta, nupanghai chu châipui an ti. Mipui a chimrip chu sala fe an ta, khannisian a danghai kai chu khopui ata kha hruaipaiin om no nihai.

³Khanchu RENGPA chu fe suak ta a ta, matona a idoihai ngai ang khan nam tinhai chu doihai ta a ti.

⁴Kha tena chu ama chu oliv tânga ngîr a ti, Jerusalem nisua tiang khan. Khanchu oliv tâng chu a laitaka nisua tiang ata nitâk tiang irhôr lian tak changin irsenphat a ta, a chimrip kha hmâr tiang irson a ta, a chimrip dang kha sim tiang irson a ti.

⁵Khan nangni chu hi mual inhnihai kâra irhôr ata hi zôk nin ta, nin irchibulhaiin Judai ram rêng, Uzia inlal laia hnîngnupui ata an izôk ang khan nangni khom zôk nin ti. RENGPA ki Pathian chu vântirtônhai murdi leh zuang a ti.

⁶Kha zoro kha a hong tung tena chu, a dâi le izil om ta no nia,

⁷inthim khom om sa ta no ni. Zâna khom vâr mai ta a ti. RENGPA vaiin hi zoro tung hrang hi a inhriat a ni.

⁸Kha nikhua kha a hong tung tena chu, Jerusalem ata tuihringhai hong suak a ta, a chimrip chu Tuipui Thia luang lût a ta, a chimrip dang chu Mediteranean tuipuia lût a ti. Kumtuangin luang a ta, fûra khom, sâla khom.

⁹Khan RENGPA chu irnêng chung murdia rêngin om a ta; mi tinin Pathian angin ama chu biak an ta, ar hming khom inkhat vai ni a ti.

¹⁰Khan ram murdi, hmâr tianga Geba ata sim tiang Rimon dênin inchamtir nih a ti. Jerusalem chu a kôlvêla ramhai chunga tôt a ta, khopui chu Benjamina mikot ata a kila mikot ten, inmâna mikot omna hmun le, Hananela in irsâng ata kha rêng uain sômna khur ten kha phâk a ti.

¹¹Mipuihai chu khataka khan lungthi takin om an ta, siatna rêng rêng inchitirin om ta no nihai.

¹²RENGPA’N hripui ichiom tak, Jerusalem doitu nam tinhai chunga intungtir a ti. An hring sûngin an taksa chu hmonthâk a ta; an mithai le an mileihai khom hmon a ti.

¹³Kha tena chu RENGPA’N a sân inbuaihai a ta, chitna’n sip an ta, mi tinin an kôla mi chu chel seng an ta, doi an ti.

¹⁴Juda mihaiin Jerusalem chu hrungin doi an ta, râllâk sumin nam tinhai irchon, rângachak hai, sumtak hai le silkai hai chu tamtakin la an ti.

¹⁵Hripui ichiom tak râlhai riakbuka sâ murdihai chunga, sakorhai, sakuartunghai, saringseihai le sakuartung puihai chunga khom chum sa a ti.

¹⁶Khanchu Jerusalem hong doitu nam tinhai laia a la om sunhai chu a kum tinin RENGPA Pathian chu biak hrangin le, kairêng kût hmang hrangin fe mai ngai an ti.

¹⁷Tu nam khom RENGPA Pathian chu biak hranga Jerusalema a hong fe noa niin chu, an rama rua rêng rêng tho no ni.

¹⁸Aigupta mihaiin kairêng kût chu an hmang nuam noa ni’n chu, nam tin ama biak nuam loituhai chunga RENGPA’N hripui a intungtir hrang kha an chunga intungtir pehai a ti.

¹⁹Kairêng kût kha an hmang nuam noa ni’n chu, hi hremna hi Aigupta le nam dang murdihai chunga la chum a ti.

²⁰Kha tena chu sakor silnianghai chung tena khom hi thu hi irziak ni a ti. “RENGPA ta hranga inhlan,” ti hi. Tempila bu anh suangna bêlhai chu maichâm kôla tâborhai ang dêna irthiang ni ta a ti.

²¹Jerusalem le Judai ram murdia bêl le bûrhai chu RENGPA Pathian biakna hranga ison ni ta a ti. Thilinhlan inhlantuhaiin thilinhlan hmêhai suangna hrangin hmang an ti. Kha zoro kha a hong tung tena chu RENGPA Pathian tempila khan Kanaan mihai rêng rêng om ta no nihai.