Read Hrangkhol ZAKARIA 4 Bible Online

ZAKARIA 4 - Hrangkhol bible

ZAKARIA 4

¹Khan, vântirtôn ni chongpuitu kha a hong nôka, mi inmusu kaithoi angin a ni hong kaiinhara.

²Ki kuang, “Imo ni ihmu?” a tia. Khan, keima’n, “Rângachak meiser siana, a sîpa berbuhai le khataka meiser sarihai le a sîpa meiser hmûr sari seng omhai le,

³Oliv thing inhni berbu chang tiang inkhat, vei tiang inkhat om ki hmu,” ki tia.

⁴Khan, vântirtôn ni chongpuitu kuanga khan, “Hi hi imo a ini, ka pu?” tiin ki hong ti nôka.

⁵Khan, vântirtôn ni chongpuitu khan a ni sâma, ki kuang, “Hihai hi imo an ini ni inhriat loi mo?” a tia. Keima’n, “Inhre ma ung, ka pu,” ki tia.

⁶Khataka khan ki kuang, “Hihai hi Jerubabela kuanga RENGPA thu kha a nia; hrâtna ni loiin, thiltho theina ni ual hliak loiin, ki’rtha’n kêng, tiin sipaihai RENGPA khan a ti e.

⁷Tu mo ni ini? o tâng lianpui, Jerubabela makunga khan phâizôl chang mai ni ta; kha khan a lung poimo tak kha a ta hrangin satvurna le, raifânna khêk irhâi leh zuang tung a ta,” tiin a ni sâm tâka.

⁸Kha no khom kha RENGPA thu ki kuang a zuang tung nôka:

⁹Jerubabela kut khan hi nin lung phûmhai hi a phûm tâka, Ama kut dênin puihling a ta, khanchu, sipaihai RENGPA khan nin kuang a ni tîr a nih ti inhre ta nin ta.

¹⁰Thil chîn terek zorohai hi tu’n mo a hmusit? Râifân takin om an ta, Jerubabela kuta dâr irhlûm inkhâi kha an ihmu hrang a nia; Hi sarihai ngei hi RENGPA mit kha an ni saa, irnêng pumpui chunga hin an irvâk vêl ngai, tiin.

¹¹Khan, keima’n chu ki sâma, a kuang, “Hi Oliv thing inhni, meiser siana chang tiang le vei tianga om hi imo a ini?” ki tia.

¹²Khan, ki hong sâm nôka, a kuang, “Rângachak tum inhni kôla, hi oliv zâr inhni rângachak hriak hong suaknahai hi imo a ini?” ki tia.

¹³Khan, ama khan a ni sâma, “Hihai hi imo a ini hrang ti ni inhriat loi mo?” a ni tia. Khan, keima’n, “Inhre ma ung, ka pu,” ki tia.

¹⁴Khan, ama khan, “Hi nâipa inhni, hriak nei tâkhai hi, irnêng pumpui RENGPA kôla ngîrhai kha an ni hi,” a tia.