Read Hrangkhol MALAKIA 3 Bible Online

MALAKIA 3 - Hrangkhol bible

MALAKIA 3

¹“Irngai u ta, ki tirtôn kha ki tîra, ama khan ki matona lampui kha sinsiam a ti: khan RENGPA nin izong kha, a biak ina khan zuang zôi zel a ti; khan, thuthung tîrtôn nin inuam tak kha, irngai u ta a hong e,” sipaihai RENGPA’N a ti.

²“Khannisianlân, a zuangna nikhuaa khan tu mo om thei hranga? Ama a zuang inlang tika chu tu mo ngîr ni? ama fiana mei ang le puan sôptu sabon ang a nia;

³ama kha tangkarua irthiangtu le infâitu angin toi a ta, Levia nâipasalhai kha irthiangtir a ta, anni kha rângachak le tangkarua angin insunfâi a ti. Khan, anni khan RENGPA kuanga felna’n thil inhlanhai kha inhlan an ti.

⁴Khan, Jerusalem le Juda thil inhlan kha tianlai kumhai le mânlai nikhuahai ang khan RENGPA kuanga lômom ni ta a ti.

⁵Khan, roirêl hrangin nangni ki zuang inâi hrang a nia; Dôitheihai, uirehai, milaka khomâksâmtuhai chunga le meithâi le fara le irhlofâkhai hlo insiatpaia ngainêptuhai le nam dang lei paithâktuhai le ni chi loituhai chunga khan thu’nhretu sakhi satak ni ki ti, Sipaihai RENGPA’N a ti.

⁶Kei RENGPA hi danglam ngai ma unga, khasikin nangni, O Jakoba irchihaio, ar hmang ni mak chêi.

⁷Nin puhai zoro ata kha ki thu’nkunghai nin pêtsana, zôm khom zôm ngai mak chêi. Ki kuang hong kîr unglân, khanchu nin kuang zuang kîr ki ti, Sipaihai RENGPA’N a ti. Nangni’n chu, ia hin mo kin ikîr hrang? nin tia.

⁸Mihriamin Pathian ta kha a inrûk pe hrang ma ni? Khannisian nangni’n chu nin ni inrûk pe ngai? Nangni rêkin chu, Ia hin mo kin inrûk pe? nin tia, Sôma inkhat le thilinhlanhaia hin.

⁹Khosâl tong nin ni ta; nangni hi nam pumpui hin, nin ni inrûk pe ngai a ni.

¹⁰Ki ina fâk hrang a om theina hrangin sôma inkhat murdi kha tholôm bôma hong chôi roi, irvân tukverhai kha nangni kin hong pe’n satvurna dong sêng loi dôrin nangni ki vur mo, vur ma ung, ni hong fia ngân u ta, Sipaihai RENGPA’N a ti.

¹¹Nangni fâk irhmangpai petu nangni khap pe ki ta, khanchu, nin irnêng rahai kha nangni insiat pe ta no nia, irhuana nin grep ra kha nangni tâk irhmangpai pe ta no nia, Sipaihai RENGPA’N a ti.

¹²Khan, nam murdi’n vânnei nangni ti ta an ta, Ram inditom tak nin la ni hrang sikin, Sipaihai RENGPA’N a ti.

¹³Ki chunga nin thuhai kha a sân a ngar, RENGPA khan a ti. Nangni rêkin chu, ia khan mo kin insîr? nin tia.

¹⁴Pathian sintho hi mâkana a ni: a chonginkung ei izôm le sipaihai RENGPA makunga ning nin inthik tâka. ei ilêng hen hi imo a’rfêna om?

¹⁵Khan, mi lârirpâkhai kha a hoi pehai ei tia; thil tho’nsualtuhai kha an hong thoi insaa, Pathian an fiaa, saninzôk an ni sa ngai nin iti a ni:

¹⁶Khanchu, RENGPA chituhai kha an chongirhlôma: RENGPA’N a lei irngaituaa, a lei inhriata, RENGPA chituhai le ar hming uksaktuhai hrangin inhriat maina lekhabu kha a makunga irziak a ni tâka.

¹⁷Sipaihai RENGPA khan, “Anni kha ki tahai ni an ta, irchon irkhêl bîk tak ki siamna nia chu; khan mi’n a nâipa ama sinthotu kha a isiam angin anni kha siam ki ti,

¹⁸Khanchu hong irhei kîr nin ta, mi fel le mi sia, Pathian sinthotu le tholoitu kha theithâk thei ta nin ti,” a tia.