Read Hrangkhol MATHAIA 10 Bible Online

MATHAIA 10 - Hrangkhol bible

MATHAIA 10

¹Jisua’n a irchutir sômhleihnihai kha a koihaia, ramilhlihai inhnot suak theina le damloi chi tinrêng le natna chi tinrêng indam theina sinthotheina a pêkhaia.

²Tirtôn sômhleihnihai irhming chu hihai hi an ni; a masa taka Simon (Petera an iti) le a sangpa Andria; Zebedaia nâipa Jakoba le a sangpa Johana;

³Filipa le Bartholomaia; Thoma le khâzana irfuangtu Mathaia; Alfaia nâipa Jakoba le Thadaia;

⁴Kanaan mi Simona le an cheltirtu Juda Iskariota hai an ni.

⁵Kha sômhleihnihai kha Jisua’n a tîr suakhaia, an kuang hiang hin chong a bê. “Jentailhai rama le Samari mihai khuaa chu fe no roi.

⁶Israel nam belra irhmanghai kuang nin ife hrang a ni.

⁷‘Fe unglân, Irvân Ram chu anâi ta,’ ti thu van sîr roi!

⁸Damloihai indam unglân, mithihai kaithoi unglân, phârhai irthiangtirhai unglân, ramilhlihai inhnot suak roi. Manboiin nin mana, manboi ngêtin pe roi.

⁹Nin zêpa rângachak poisa mani, sum mani, sumsen mani, chôi no roi;

¹⁰inzinna hrangin hmarsa mani, songkol irthuam mani, kekok irthuam mani, khianghrol irthuam mani chôi no roi. Sinthotu chu a innanghai kha pêk ni a ti.

¹¹“Kho liana mani, kho chîna mani nin lûtin nangni intung nuam hrang mi zong unglân, kha hmun kha nin mâk nôk mâka chu kha ina khan om mai roi.

¹²In sûng nin lûtin chu ‘Irtharngamna nin chunga om ri se,’ ti roi.

¹³Kha ina mihai khan nangni an lei lômin chu nin irtharngamna chubai kha an chunga tung ri se; khannisian, nangni an lei lôm no’n chu nin chubai chong kha la kîr nôk roi.

¹⁴Khan, kho khua khom nangni an pom noa, nin chong an irngai no’n chu marak unglân, nin ke bop kha nûlpai roi.

¹⁵Thudik nangni ki hril, Roirêl nikhuaa chu kha khuahai tuang hrang nêkin chu Sodom le Gomora khuahai tuang hrang chu a zâi om ual a ti.

¹⁶“Irngai u ta! Inê kâra belra lût angin nangni ki itîr a ni. Mirûl anga vârin, vasu anga nunirnêmin om roi.

¹⁷Aniachu irdîn roi, nangni chela, Sanhedrin-ah nangni intunga, an sinagokhaia nangni zêm an ti.

¹⁸Keima sikin hruaituhai le rênghai makunga la ngîr nin ti, anni leh Jentailhai chu Thurchi Sa nin insîr pehai theina hrangin.

¹⁹Nin chungthu ngaitua hranga nangni an hruai tikin nin ti hrang lei insâpin nin milung inbuai no roi; a zoro a hong tungin inhriattir nih nin ti.

²⁰Nin iti hranghai kha nangni iti ni no nia, nin Pa Irtha khan nangni ti pe ti.

²¹“Urêng khomin that hrangin a urêngpa lan cheltir a ta, pa khomin a nâihai lan cheltir sa ta, nâihai khomin an nu le pahai doi an ta, that an ti.

²²Keima sikin mi tinin nangni la hnôl an ti. Khannisian tukhom a mong dêna tuang diar ka chu saninhringin om a ti.

²³Khua inkhat ata an nuam nuamin nangni an lo’n chu, kho danga rot pat roi. Thudik nangni ki hril, Mihriam Nâipa a zuang mân Israel ram kho murdia nin sintho zoi no chin ni.

²⁴“Irchulai chu ar chutirtu nêkin lian ual ma, suak khom a pu nêkin lian ual mah.

²⁵Khasikin irchulai kha ar chutirtu angin a hong iom le, suak khom a pu anga a hong iom kha a ruk. In chongpu lua Belzebula an ti’n te, a in sûng mihai len vâng chu ti nok ual an ti!

²⁶“Khasikin mihriamhai kha chi no roi. Tinrêng inlang loi hranga ithup om maka, inhriatloi hranga thup ite om sa no ni.

²⁷Inthima nangni ki ihril hi sûn khovâra insîr unglân, inrûka nin inhriat hi in chunga chuangin tânginsampui roi.

²⁸Taksa thata irtha that theiloihai chu chi no unglân, hremhmuna nin taksa le irtha that theitu Pathian kha chi ual roi.

²⁹Chongzong inhni poisa khatin nin irchôk thei, khannisian, an laia inkhat lua nin Pa thu ni no’n chu irnênga ta no ni.

³⁰Nangni chu nin samzâi ten lua tep zit a ini kêng.

³¹Khasikin chi no roi, chongzong tamtak nêkin chu nin hlu ual kêng! a tia.

³²“Tukhom mihai makunga ni thop ka chu kei khomin ka Pa irvâna om makunga thop ki ti.

³³Khannisianlân, tukhom vântâng inhriata ni hnôl chu ka Pa irvâna mi makunga hnôl ki ti.

³⁴“Rammuala hin irngeina inlêng hranga zuang ni sôn no roi. Irngeina inlêng hranga zuang ni ma unga, khandai inlêng hranga zuang kêng ki ini.

³⁵Nâipa’n a pa doi a ta, nâinu’n a nu, moiin a tarpi indoitir hranga zuang kêng ki ini.

³⁶Mi a râl hrang chu a in sûngkua mihai ngêt ni an ti.

³⁷Tukhom keima nêka a nu mani, a pa mani lungthung ual chu, ki irchutir rua ni mah.

³⁸Tukhom a kros irputa ni zui no chu ki irchutir rua ni mah.

³⁹Tukhom mâni hringna sûnghual an tumin chu inchân an ta, keima sika an hringna inchân chu hmu an ti.

⁴⁰“Tukhom nangni lôm chu, a ni lôm an ni; tukhom a ni lôm chu a ni tîrtu lôm an ni.

⁴¹Tukhom Pathian tirtôn kha Pathian tirtôn a nina sika lei lôm chu Pathian tirtôn lômman hmu a ti. Tukhom mi fel chu mi fel a nina sika lôm chu mi fel lômman hmu a ti.

⁴²Tukhom ki irchutirhai laia a chîn tak khom ki irchutir a nina sika tui dâi khilât khat khom lei pêk chu nangni ki hril, lômman hmu ngêt a ti,” a tia.