Read Hrangkhol MATHAIA 16 Bible Online

MATHAIA 16 - Hrangkhol bible

MATHAIA 16

¹Khan, Farisaihai le Sadukaihai senkhat Jisua kuang an honga, ama fiana hrangin irvân ata irsinsiana sinirkhêl inentir hrangin an ngêna.

²Khannisian, Jisua’n an kuang, “Khohloi a hong ni’n chu ‘Khua a ihoi hrang kêng nin tia, kôl a sen,’ nin ti ngai.

³Zînga chu ‘Rua a itho hrang ni a ti, kôl a sen, khua ar ui’ nin ti ngai; Irvân enin rammual hoi hrang le hoi no hrang nin inhriat theia, khannisian, zoro irsinsianahai hi chu a omzia inhre thei mak chêi.

⁴Atûnlaia thoiinthar mi sual tak le uire hmanghai! irsinsiana sinirkhêl nin ni izong na? Jona sinirkhêl ti no chu nin kuang irsinsiana sinirkhêl dang pêk ni no ni,” tiin a sâma, khanchu, a mâksanhai tâka.

⁵Irchutirhai kha dîl râl tiang an kâiin chu bai an hong chôi irnghila.

⁶Jisua’n an kuang, “Farisaihai le Sadukaihai chol ata ir-enkol unglân, irdîn roi,” a tia.

⁷Khan, anni khan, “Bai hong chôi mak me,” tiin an bingin an insîr irhlôma.

⁸Jisua’n an insîrhai chu an hriata, an kuang, “Nin bai chôi no thua itho mo nin binga nin irngaitua? Nin iamna a tôm bâka!

⁹Nin la inhriat thei loi ma ni? Mi sâng ringahai ta hrang bai ringa ki ikhoi kha nin irnghil ma ni ta? An fâk ban khamphulu iza mo an ihrût insip kha?

¹⁰Mi sâng minli ta hrang bai sari rêk khate? An fâk ban khamphulu iza mo an ihrût insip kha?

¹¹Nin kuang bai thurchi insîr ma ung, ti itho mo nin inhriat loi? Farisaihai le Sadukaihai chol ata irdîn roi!” a tia.

¹²Kha hnung chu irchutirhai khan bai chol ata irdîn hrang ni loiin, Farisaihai le Sadukaihai irchutirna ata irdîn hranga a ihril a nih ti an inhriat ta.

¹³Khan, Jisua kha Kaisari Filipi kho hualsûng a hong tungin, a irchutirhai kuang, “Mihaiin Mihriam Nâipa hi tu mo a ni an ti?” tiin a’rdonhaia.

¹⁴Anni khan, “Senkhatin chu Baptistu Johana a ni, mi dangin Elija a ni, senkhat nôkin chu Jeremia a ni no le deipu tu khôk mani a ni, nang an ti,” tiin an sâma.

¹⁵Ama khan an kuang, “Nangni’n te, tu mo a ni nin ni ti?” ti’n a’rdonhaia.

¹⁶Simon Petera’n a kuang, “Mesia Pathian hring Nâipa kha ni ni,” tiin a sâma.

¹⁷Jisua’n a kuang, “Simon Barjona, taksa le thisenin nang a inhriattir ni maka, ka Pa irvâna mi’n nang a inhriatir a ni.

¹⁸Khasikin nang Petera; lungpui ni ni tih nang ki hril, hi lungpui chunga hin ki koiindang inding ki ta, thina khomin inhnê no ni.

¹⁹Irvân Ram châbihai nang pe ki ta; irnênga ni ikhit chu irvâna khom khit nih a ti, irnênga ni isût chu irvâna khom isût ni a ti,” a ti pea.

²⁰Khanchu, Mesia a nih ti tûte hril loi hrangin irchutirhai kha thu a pêkhai ta.

²¹Kha zoi ata chu Jisua’n a irchutirhai kuang fel takin thu an sîra, “Jerusalema a fe hrang thu hai, upa hai, Ochai inlalhai le Dân irchutirhai kuta a tuang hrang thu hai, thatpaia a om hrang thu hai le sûn thum nia kaithoia a om hrang thu hai kha,” a irchutirhai a hril irphut tâka.

²²Petera’n ama kha a bingin a hruaia, a kuang, “Pathianin a khap, Rengpa! kha thil kha ni chunga tung viat no ni,” tiin a ngoa.

²³Khan, Jisua kha a’rheia, Petera kuang “Setan, rot roh; a ni khâltu ni ni; Pathian nuamlam ngaitua loiin mihriam nuamlamin ni ingaitua a ni hi,” a tia.

²⁴Khanchu Jisua’n a irchutirhai kuang, “Tukhomin ni zui a nuamin chu mâni intak ngaitua loiin a kros irputin ni zui ri se.

²⁵Tukhomin mâni hringna sûnghual tumtu’n chu inchân an ta, tukhom keima sika a hringna inchân murdi’n chu hmu an ti.

²⁶Mi’n rammual hi a pumin nei sianlân, a hringna inchân sianlân, a ta hrangin imo a’rfêna? A ninole, mi’n a hringna irthûlin imo a ipêk hrang?

²⁷Mihriam Nâipa hi vântirtônhai le a Pa roiinpuina le, a izuang hrang a nia; kha tika chu mi tin an sintho ang zêlin thuan seng a ti.

²⁸Thudik nangni hril ki ti, hitaka ngîr senkhathai hi, Mihriam Nâipa, inlal taka a zuang an hmu mâka chu thina irtem loi hrang an om,” a tia.