Read Hrangkhol MATHAIA 17 Bible Online

MATHAIA 17 - Hrangkhol bible

MATHAIA 17

¹Khan, sûn ruk hnunga chu Jisua’n Petera, Jakoba le Johana hai an bingin a hruaihaia, tâng irsâng taka a fe puihaia.

²An mit hmua Jisua hmêl a hong danglama, a hmâi misa angin a hong vâra, a puan silhai khom irtêk rakin a vâra.

³Khanchu, irchutir inthumhai khan Mosia le Elija’n Jisua an chongpui lai an hmua.

⁴Khan, Petera’n Jisua kuang, “Rengpa, hitaka om hi ei ta hrangin a sa! Ni nuamin chu, kairêng inthum sin ki ta; ni ta hrangin inkhat, Mosia hrangin inkhat, Elija hrangin inkhat,” a tia.

⁵A la chonglai takin, sûm vâr takin anni chu a’rhlîkhuhaia, sûm ata hnuk irhaiin, “Hi hi ki Nâipa, lungthungtak, ki ilôm tak tak chu a ni; ama thu irngai roi,” a tia.

⁶Irchutirhai khan kha kha an inhriatin an inboka, an chi tak taka,

⁷Jisua a honga, a hong tônhai tâka, “Thoi roi chi no roi!” a ti pehaia.

⁸Khanchu an hong tanga, Jisua ti no chu mi dang hmu ta mahai.

⁹Khanchu tâng ata an zuang chumin chu Jisua’n an kuang, “Mihriam Nâipa thina ata a thoinôk mâka chu nin thil hmu hi tûte hril viat no roi,” tiin thu a pêkhaia.

¹⁰Khan, irchutirhaiin Jisua kuang, “Itho mo Dân irchutirtuhaiin Elija a izuang bak hrang a ni, an iti?” tiin an irdona.

¹¹Jisua’n, “Elija chu zuang bak hrang pial a ni, itinrêng ama’n lei siam infel zit a ti.

¹²Khannisian, nangni ki hril, Elija chu a izuang pial tâk kêng; mihaiin lei inhre mahaia, an nuam nuam an lei lo kha. Khaang dênin Mihriam nâipa khom hin an kut a ituang hrang a ni,” a tia.

¹³Khanchu, irchutirhaiin, Baptistu Johana thurchi an kuang a insîr a nih ti an hong inhriat tâka.

¹⁴Mipuihai kuang an hong kîr nôkin chu mi inkhat Jisua kuang a honga; a makunga khûksadelin,

¹⁵“Rengpa, ki nâipa hi lunginkham ro! Hrisangol irvei a nia, a tuang hrai tâka, voi iza tuia le meia an rîl tâka.

¹⁶Ni irchutirhai kuang ki hong hruaia, indam thei mahai,” a tia.

¹⁷Khan, Jisua’n, “Iti hraia iamna boi mo nin ini tâk! Idôr ten mo nin kuang omin nangni ki ingaitua thei hrang? Nâipangtepa kha ki kuang hong hruai roi!” a tia.

¹⁸Jisua’n ramilhli kha thu a pêka, nâipangtepa sûng ata kha a suaka, kha zoro taka khan a hong dam ta.

¹⁹Khanchu, irchutirhai kha Jisua kuang an honga, “Itho mo keini’n kin inhnot suak thei loi?” tiin mi inhriat loiin an irdon zâia.

²⁰Jisua’n an kuang, “Nin iamna tôm sika a ni. Thudik nangni ki hril, iamna ancham ru dôr nin neiin chu hi tâng hi, ‘Hitak ata, so son irson roh ti nin ta,’ irson a ti. Tho thei loi zel nei no chin ni,” a tia.

²¹Khannisianlân, hianga hi chu chongchaina le bu ngheina ti no chu itin te’n inhnotsuak thei ni mah,” tiin a sâma.

²²Irchutirhai kha an rêngin Galili rama an hong hnungin, Jisua’n an kuang, “Mihriam Nâipa hi mihriamhai kuta ichelin om a ta,

²³that an ta, khannisian, sûn thum niin chu kaithoiin om a ti,” a tia. Irchutirhai chu a sân an bêi a dong tâka.

²⁴Jisua le a irchutirhai Kapernaumah an hong tungin, Tempil khâzana irfuangtuhai, Petera kuang an honga, “Nangni irchutirtu hin Tempil khâzana a chôi ngai mo?” tiin an irdona.

²⁵Petera’n, “A chôi ngai” tiin a sâma. Petera kha ina a va lûtin, Jisua’n a lei chongpui baka, “Simon, imo ni’rngai lam? Hi rammuala rênghai kuang hin tuhai mo khâzana chôi ngai? A ram mihai mo, ram dang mihai mo?” a tia.

²⁶Petera’n, “Ram dang mihai,” tiin a sâma. Jisua’n, “Khano’nchu a ram mihai chu an ichôi nang mah.

²⁷Khannisianlân, hi mihai lunghoi loia an iom hi nuam ma ung, khasikin dîla fe’n lân, irkuai chôiin lân, nga ni iman masa tak bâia khan ei ruaia Tempil khâzana ei ichôi ruk bak sum hmu ni ti. Kha kha hong chôiin lân, ei chôi tum kha an kuang va pe roh,” a tia.