Read Hrangkhol MATHAIA 20 Bible Online

MATHAIA 20 - Hrangkhol bible

MATHAIA 20

¹Irvân Ram chu mi inkhat a Grep irhuana sin hrang mi zonga zînga suak ang kha a ni.

²Ama khan sinthotuhai kha a sûna a duli pe hrangin a’rfelpuihaia, khanchu, a grep irhuana sin hrangin a tîrhai tâka.

³Khan, zîng dâr kuak vêlin bazar hmuna a fe nôka, mi dang lei ngîr mai maihai a hmua;

⁴an kuang, ‘Nangni khom grep irhuana va fe roi ba; a’rhoi ang dôr nangni pe ki ti,’ a tia.

⁵Khanchu an fe tâka, khan, sûn dâr sômhleihni le khohloi dâr thum tena khom a suaka, khaang dênin a tho nôka.

⁶Khohloi dâr ringa’n a suak nôka, mi dang ite sin loia ngîrhai a va hmuhaia, an kuang, ‘Itho sika mo sûn sôta hi hin nin ingîr pa pai?’ a tia.

⁷Anni khan a kuang, ‘Tûte’n irhlo hrangin an ni koi no sikin,’ ti’n an sâma. Khan ama’n an kuang, ‘Nangni khom fe unglân, grep irhuana va sin roi,’ a ti pehaia.

⁸Khohloi a hong nî’n chu, grep irhuan neitu khan a sum vongtu kuang, ‘Sinthohai kha koi unglân, inhnung tak ata phutin a maton takhai dênin an hlo pe roi,’ a tia.

⁹Khohloi dâr ringa vêla sin kophai kha an hongin chu a duli chit an dong senga.

¹⁰Khanchu, a maton taka sin kophai kha an hongin chu hmu ual hrangin an irtûnga; khannisian, anni khom a duli dên pêk an nia.

¹¹An hlo an hong dongin chu in neitupa chunga an chiar tâka.

¹²‘Hi a hnungkhôn takhai hin dârkâr khat vai an sina, keini chu misa luma sûn misa tâk dênin kin sina, khan khomin, keini idong dôr ngêt anni khom ni pêkhaia!’ an tia.

¹³A chongpu khan an laia inkhat kuang, ‘Irngai ta, mala, nang huang ma ung. I khom nisian, a sûna a duli hlo hranga ei irti mo ni ma?

¹⁴Atûn ni hlo lan lân, ni ina fe roh. Nangma nang ki ipêk dôr kêng hi a hnungkhôn taka sin koppu khom hi ki ipêk nuam a ni.

¹⁵Ki sum khate, ki nuamlam ang taka hmang hrangin ircham ki inei mo ni ma? A ninole, ki tikhoi sikin ni ihnarsa ma ni?’ a ti pea.

¹⁶Khanchu, Jisua’n, “A hnungkhônhai chu a masa tak la ni an ta, a masa takhai chu a hnungkhôn tak la ni an ti,” a tia.

¹⁷Khan, Jisua Jerusalem-a a hong fe laiin irchutir sômhleihnihai kha an bingin a hruaihaia, lampuia khan inrûkin an kuang,

¹⁸“Irngai u ta, Jerusalema ei ife hrang a nia, kha khan Mihriam Nâipa hi Ochai inlalhai le Dân irchutirtuhai kuta ichelin om a ti. Thi hrangin rêlinchuk an ti.

¹⁹Jentailhai kuta pe an ta, anni khan nuiza siamna’n hmang an ta, zêm an ta, krosa hembe’n ti; khannisianlân, sûn thum tena chu kaithoiin om a ti,” a tia.

²⁰Khanchu, Zebedaia dôngma kha a nâipasal inhni hong hruaiin Jisua kuang a honga, khûksadelin chubai a mûka, thil imo khat a zonga.

²¹Jisua’n a kuang, “Imo ni izong?” a tia. Ama khan, “Hi ki nâipasalhai ruai hi ni Rama, ni chang tiang inkhat, ni vei tiang inkhat, an toi theina hrangin thu pehai ro ba,” a tia.

²²Jisua’n a sâma, “Nin thil zong hi nin inhriat loi kêng, ki khilât in hrang nin iin thei hrang ma ni?” a tia. Anni khan, “Thei kin ti,” an tia.

²³Jisua’n an kuang, “Ki khilât chu in ngei nin ti; khannisianlân, tu mo ki chang tiang le ki vei tianga toi hrang chu keima ircham ni mah, ka Pa’n a inkung pehai ta hrang a ni,” a tia.

²⁴Irchutir sômhai khan kha kha an inhriatin chu ulenâi inhnihai chunga khan a sân an ning an mur tâka.

²⁵Khasikin Jisua’n an rêngin a koi bukhaia, an kuang, “Jentailhai chunga roirêltuhai kha an inlal tak tak ngaia, an mi lianhai khomin an chunga ircham an nei tak tak ngai ti nin inhriat.

²⁶Khannisianlân, nangni laia chu khaang khan a ini hrang ni mah. Nin laia tukhomin mi lian a ni nuamin chu nin sinthotua a iom hrang a ni.

²⁷Nin laia inlal tak ni nuam khom, nin siahloa a iom hrang a ni.

²⁸Mihriam Nâipa khom hi sintho pe hrangin zuang maka, sintho hrang le mi tamtak irtan hranga a hringna pe hranga a izuang a ni,” a tia.

²⁹Jisua le a irchutirhai Jeriko khua ata an suak laiin, mipui tamtakin an zuia.

³⁰Mitcho inhni lampui kôla toihaiin Jisua a fe ti an inhriatin chu, “Davida Nâipa! lung nin kham roh!” tiin an khêka.

³¹Mipuihai khan dâihrek hrangin an ngohaia. Khannisianlân, anni khan “Davida Nâipa! lung nin kham roh!” tiin an khêk ual uala.

³²Jisua a ngîra, kha mitchohai kha a koihaia, “Imo nangni tho pe hranga nin inuam?” tiin ar donhaia.

³³Anni khan a kuang, “Rengpa mit vârna kin nuam,” an tia.

³⁴Jisua khan lung an khamhai tak taka, an mit a tôna, khanchu, an hmu thei zôia, ama kha an zui tâka.