Read Hrangkhol MATHAIA 25 Bible Online

MATHAIA 25 - Hrangkhol bible

MATHAIA 25

¹“Kha zoi hnung chu irvân Ram chu dôngmate sômhai, an meiserhai chôia, moineitu don hranga fehai leh irkhek ni ta a ti.

²An laia ringa an intoa, ringa an vâra.

³An tohai khan an meiserhai an chôia, a tui chôi sa mahai,

⁴A vârhai khan chu an meiserhai an chôia, a bûra khan a tui an chôi saa.

⁵Moineitu kha a zuang inhnung sikin an lei inmusua, an lei in tâka.

⁶“Zânlai taka chu ‘Moineitu a zuang ta! A don hrangin hong suak ta roi!’ tiin khêk irhai a zuang om tâka;

⁷Khanchu, dôngmate sômhai kha an thoia, an meiserhai an irfûktir tâka.

⁸Khan, an tohai khan a vârhai kuang khan, ‘Nin meisertui kha ni sem roi, kin meiserhai an ithi zoi hrang tâk kêng,’ an tia.

⁹A vârhai khan ‘Nangni pe thei no ni ung, keini le nangni hrangin chu ruk no ni. A zuarpuhai kuang fe unglân, var cho roi,’ tiin an sâma.

¹⁰Khanchu, dôngmate intohai kha meisertui ircho hrangin an fea. Khante, an fe kârin moineitu kha a zuang ta. Dôngmate ringa ar siamhai chu ama leh irbiakna hruaithe fa hrangin an lûta, in an khâr ta.

¹¹“Inhnunga chu dôngmate danghai khom an hong tung tâka, ‘Ka pu, ka pu, mikot nin hong roh,’ an tia.

¹²Ama’n Thudik nangni ki hril, nangni inhre ma ung,” tiin a sâma.

¹³Khasikin, irsiam diamin om roi, a nikhua le a zoro kha nin inhriat no sikin.

¹⁴“Kha tika chu irvân Ram chu mi inkhat an zin hrang tôna, siahlohai a koia, sum inkoltir leh irkhek ni ta a ti.

¹⁵Siahlo inkhat chu talent ringa a pêka, inkhat kuang inhni, inkhat dang kuang talent inkhat, an iruk ang dôr chit, pêk an nia, khanchu, a fe tâka.

¹⁶Talent ringa dongtu kha a va inpung zôi zela, talent ringa dang a hlo suaka,

¹⁷khaang dênin talent inhni dongtu khom khan talent inhni dang an pung nôka.

¹⁸Talent inkhat dongtu chu irnêng a va choia, a pu sum kha a phûm tâka.

¹⁹“Zoro sôt ian hnunga chu kha siahlohai pu kha a honga, an sum enkol chungchâng an felpuihaia.

²⁰Talent ringa dongpu kha a honga, talent ringa dang a hong chôia, ‘Ka pu, nangin talent ringa ni nin dontira, en ta, talent ringa dang ki hlo suak,’ a tia.

²¹A pu khan a kuang, ‘Siahlo sa le iamom, ni tho’n sa! tômte chunga iam ni oma tamtak chunga nang inomtir ki ti; ni pu lômna dong sa roh!’ a tia.

²²“Talent inhni dongpu kha a honga, ‘Ka pu, nangin talent inhni ni nin koltira, en ta, talent inhni dang ki hlo suak,’ a tia.

²³A pu khan a kuang ‘Siahlo sa le iamom, ni tho’n sa, tômte chunga iam ni oma, tamtak chunga nang inomtir ki ti, ni pu lômna dong sa roh!’ a tia.

²⁴“Talent inkhat dongtu khom kha a hong, ‘Ka pu, ni ni ti kher kher ti kin hriata, ni itû loina khom ni bûm ngaia, chi ni inthek loina khom a ra ni ât ngai a ni.

²⁵Khasikin, nang ki chia, ni talent kha irnênga ki phûma, en ta, ni ta dên kha ni ihmu nôk a ni,’ a tia.

²⁶A pu khan a sâma, a kuang, ‘Nangma siahlo sual le thaboipa, ki itû loina khom ki âta, ki inthek loinaa khom a ra ki bûm ngai ti nin hriat mo?

²⁷Khante, itho mo ki sum kha sum inpungtuhai lei pe ro ba, ki hong kîrin a pung le ile ki ihmu hrang pial te!

²⁸Khanchu a talent hi a kuanga irthokin la unglân, talent sôm neitu kha pe roi.

²⁹A neitu ka chu pe belsa an ta, nei intam ok a ti; a nei loi chu a inei sun khom lâkpai pe rip ni a ti.

³⁰Khanchu, siahlo hmang hmunboi hi pên tiang inthima pai suak roi; kha khan chap le irkamnôi om a ti,’ a tia.

³¹“Khan, Mihriam Nâipa chu vântîrtôn murdi leh roiinpui taka a zuang tikin chu, a rêngtoihmun roiinpui taka toi a ta,

³²a makunga khan nam tin inkhôm an ta, khanchu, belra nghâktu’n kêl le belra a isen angin pâlhniin sen a ti.

³³Mi felhai chu a chang tiang sia a ta, a danghai kha a vei tiang sia a ti.

³⁴“Kha tika chu inlaltak rêng khan a chang tianga mihai kuang, ‘Hong roi, ka pa satvurhaio, hong unglân, rammual siam irphut ata nin ta hranga ram sinsiam kha chang roi.

³⁵Ki phîng a châmin nangni’n fâk hrang nin ni pêka, ki tui an hrâlin nangni’n in hrang nin ni pêka; mikhual ki niin, nin ina nin ni intungtira; silkai ki’rsamin puan nin ni insiltira;

³⁶Ki dam no’n nin ni donsuia, intângna ina ki omin, nin ni pan ngai,’ la ti a ti.

³⁷“Khanchu, mi felhai khan, ‘Rengpa, itika khan mo phîngchâmin nang kin hmua bu nang kin ipêk! tuiinhrâlin ni oma, tui nang kin ipêk?

³⁸Itika khan mo mikhualin nang kin hmua, nang kin intungtir? silkai irsamin ni oma puan nang kin insiltir?

³⁹Itika khan mo dam loiin mani, intângnna ina mani nang kin hmua nang kin ipan?’ tiin la sâm an ti.

⁴⁰Inlaltak khan, ‘Thudik nangni ki hril, hi ki urêng chîntehai laia inkhat chunga nin itho hi, ki chunga nin itho a ni,’ tiin la sâm a ti.

⁴¹“Kha zoia chu, a vei tianga mihai kuang khom khan, ‘Khosâl tonghaio, kumkhuaa mei, diabola le a siahlohai ta hranga lei siama khan ni rotsan roi.

⁴²Ki phîng a châmin nangni’n fâk hrang ni pe mak chêia, ki tui an hrâlin in hrang ni pe mak chêia;

⁴³Mikhual ki niin nin tungtir mak chêia; silkai ki’rsamin puan nin siltir mak chêia, ki damloi lai le intângna ina ki om laiin ni donsui mak chêia,’ la ti a ti.

⁴⁴Anni khom khan, ‘Rengpa, itika khan mo phîngchâmin mani, tuiinhrâlin mani, mikhualin mani, silkai irsamin mani, damloiin mani, intângna ina mani nang kin hmua nang kin idonsui loi?’ tiin la sâm an ti.

⁴⁵Ama khan, ‘Thudik nangni ki hril, hi mi chîntehai laia inkhat chunga nin itho loi chu ki chunga tho loi nin ni,’ tiin la sâm a ti.

⁴⁶“Kha mihai kha, kumtuang hremnaa fe an ta, mi felhai chu kumtuang hringnaa fe an ti,” a tia.