Read Hrangkhol MATHAIA 27 Bible Online

MATHAIA 27 - Hrangkhol bible

MATHAIA 27

¹Zîng tiang inmân taka Ochai inlalhai le vântâng upa murdihai khan Jisua that hrang dân an rêla.

²An khita, an tuanga, Pilata, Rom Ramoptu kuang an pêk tâka.

³An cheltirtu Juda khan Jisua kha thiamno an changtir ti an hriat le ar sîra, sum sôm thum kha Ochai inlalhai le upahai a pêk khîrhai nôka.

⁴“Mi fel thi hrangin kin cheltir kha ki lei tho insual a ni,” a tia. Anni khan, “Kha kha kin ta hrangin imo a poina om? Nangin ni nuam nuamin lo roh,” an lei ti pea.

⁵Khanchu, sum kha Tempila a pai inlûta, a fea, a va irkhâi that tâka.

⁶Ochai inlalhai khan sum kha an lâka, “Hi hi Tempil suma sia chu irthiang mah, thisen man kêng a ni,” an tia.

⁷Khanchu an chonga, mikhual phûmna hrangin bêl suktu hmun an lâk tâk.

⁸Khasika khan, kha hmun kha, atûn ten “Thisen Hmun,” an ti mai tâka.

⁹Khanchu deipu Jeremia’n, “Israel nâi tuhaiin mo, sum sômthum an tepa, a man kha an lâka,

¹⁰Rengpa’n thu a ipêk ang khan, Bêl suktu hmun man hrangin sum kha an hmang ta,” a iti kha a hong idik tâk a ni.

¹¹Jisua kha Rom ramoptu makunga a ngîra, ramoptu khan, “Judahai rêng mo ni ni?” tiin ar dona. Jisua’n, “Ki ni,” tiin a sâma.

¹²Khannisianlân, Ochai inlalhai le upahaiin an isêlna thua chu ite khomin sâm mah.

¹³Khasikin Pilata’n a kuang, “Nang an isêlna thua hin ni inhriat loi ma ni?” a tia.

¹⁴Khannisianlân, Jisua’n bâikhat khomin sâm maka, Ramoptu chu a sân ar ngai a’rkhêl tâka.

¹⁵Khan, Rom Ramoptu khan Ferkân kût zoro rikipin mi intâng inkhat mipuihaiin an iti tak an sua pehai ngaia.

¹⁶Kha laia khan mi intâng irhming Barabba an iti kha a oma.

¹⁷Khasikin mipui an hong irbûmin Pilata’n an kuang, “A tu hi mo nangni insua pe inlân nin inuam? Barabba hi mo, Jisua, Mesia an iti pu hi mo?” tiin ar donhaia.

¹⁸Juda irchamneipuhai khan Jisua kha an hnarsa sika a kuta an hong ipêk a nih ti fel takin an hriata.

¹⁹Khan Pilata kha roirêl hmuna a toi laiin, a dôngma’n, “Kha mi fel chunga khan ite tho no roh, zânin ki’rmangin ama sikin ki ituang ok kêng,” tiin he a bêa.

²⁰Ochai inlalhai le upahaiin Barabba kha insuaa, Jisua that hranga Pilata ngên hrangin mipuihai an inthêmhaia.

²¹Khannisianlân, Pilata’n mipuihai kuang, “Hi mi inhnihai laia hin tu hi mo nangni insua pe inlân nin inuam?” tiin ar donhaia. Anni khan, “Barabba,” tiin an sâma.

²²Pilata’n an kuang, “Khan Jisua, Mesia an iti hi imo ki ilo hrang tâk?” tiin ar donhaia. Anni khan, “Krosa hembe roh,” an tia.

²³Khannisianlân, Pilata’n an kuang, “Imo a itho insual,” tiin ar donhaia. Khanchu, anni khan, “Krosa hembe roh,” tiin an hrât do dôrin an khêka.

²⁴Pilata’n i ang khomin ite ar fêna om no nia, buaina vai kêng a isuakna hrang ti an hriatin chu tui a lâka, mipuihai makunga a kut a’rsûka, an kuang, “Hi mihriam, thina hin ite mophurna nei ma ung! Ama hi nin nuam nuamin lo ta roi,” a tia.

²⁵Mipui murdi’n, “Hi mi thisen mophurna chu keini le kin nâihai chunga tung ri se,” tiin an sâma.

²⁶Khanchu, Pilata’n Barabba kha an sua pehai tâka, Jisua kha sipaihai an zêmtir zoiin, Krosa hembe hrangin an kuta a pêkhai tâka.

²⁷Khanchu, Pilata sipaihai khan Jisua chu Ramoptu omna praitoriana an hruaia, an pâla mi murdi a kôlvêla an irbuka.

²⁸A puanhai an hlîk pea, puan senduk an insiltira.

²⁹Khanchu, ilhling lukhum an phana, an inkhumtira, a kut chang tiang khianghrol an inchôitira; a makunga khûksadelin, “Judahai Reng, hring sôt roh!” tiin an innuisana.

³⁰An inchila, a khianghrol kha an suta, a lu-a an zêma.

³¹Khan, nuiza siamna’n an hmang zoiin chu puan senduk kha an lâk nôka, ama puan ngêt kha an insiltir nôk ta. Khanchu, Krosa hembe hrangin, an hruai ta.

³²Khan, an fe laiin Kurini kho mi inkhat ar hming Simona an hmua; Sipaihaiin Jisua Kros irput hrangin an dândea.

³³Golgotha, “Luru hmun,” an iti kha an va tunga.

³⁴Khan Jisua chu uain, thil khâ leh irpol an pêka, khan, a’rtem zoiin chu in nuam ta maka.

³⁵Khan, Krosa an hembea, khanchu, tasânin a puansilhai an irsema.

³⁶Kha hnung chu, an toia, an nghâk tâka.

³⁷A lu chunga an sêlna irziak, “Hi mi hi Jisua, Judahai Reng a ni,” tiin an inkhopa.

³⁸Khan, ama pâlin inru inhni an hembe saa, a chang tiang inkhat, a vei tiang inkhat.

³⁹Khan, ar lôi murdi’n an lu inthikin Jisua an êroa.

⁴⁰“Tempil insiat ni ta, sûn thum niin inding nôk ni ti na! Pathian Nâipa ni ni’n chu, ni bingin zôk roh! kros rêla irthokin zuang chum ta roh!” an tia.

⁴¹Khaang dênin Ochai inlalhai le Dân irchutirhai le upahai khomin ama an êroa:

⁴²“Mi danghai lak an zôk ngaia, ama chu zôk thei maka! Israelhai rêng mo ni ma? Atûn hin kros rêla irthokin zuang chum sian chu iam ei ti!

⁴³Pathian a iama, Pathian Nâipa’n a’rbêa; Tho lei en rei, Pathianin an zôk nuam mo?” an tia.

⁴⁴Hrâtlâksong ama pâla an ihembehai khom khan khaang dênin an êroa.

⁴⁵Khan, sûn dâr sômhleihni ata khohloi dâr thum ten chu rammual a zîng khak tâka.

⁴⁶Chohnung dâr thumin chu Jisua kha hnuk irhai inring takin a khêka, “Eli, Eli, lema sabakthani?” a tia. Kha kha “Ki Pathian, Ki pathian itho mo ni ni imâksan?” tihna a ni.

⁴⁷Kha hmuna ngîr senkhathaiin ama kha an inhriatin, “Elija a ikoi kêng,” an tia.

⁴⁸Khanchu, an laia mi inkhat an tân zôia, sponj a lâka, uain thûra an chiea, khianghrolin a târa, Jisua kha in intir a tuma.

⁴⁹Khan, mi danghaiin, “Dâihrek roi, a san hrangin Elija mo a zuang lei en rei,” an tia.

⁵⁰Jisua kha hnuk irhai inring takin a khêk nôka, a hrang a chat tâka.

⁵¹Khanchu, tempil sûnga puanzâr kha a chung ata a mong dênin a têr thai ta. Kha hnung chu irnêng an hnînga, lungpuihai an koia,

⁵²thânhai an hong irhonga, Pathian mi tamtak a thi tâkhai, taksa kha kaithoiin an oma,

⁵³Thânhai kha an mâka, Jisua, thina irthoka thoinôk hnungin khopui irthianga an lûta, kha khan mi tamtak kuang an inlâr ta.

⁵⁴Sipai sâp le a kuanga sipai om Jisua thîrhai khan hnîngnupui inhnîng le thil omzia kha an hmu’n chu, “Hi mi hi Pathian Nâipa a ni lele hi te!” an tia.

⁵⁵Kha hmuna khan nupang tamtak, Galili rama irthoka Jisua hnung zuia, a ichangpui ngaihai khan hla vit ata an thîra,

⁵⁶Khahai kha Mari Magdala hai, Mari, Jakoba le Josia nu Mari hai an kop saa, Zebedaia dôngma khom a kop sa a ni.

⁵⁷Khan, khohloi a hong ni’n chu, irchongpa Arimathaia kho mi, ar hming Josefa a hong tunga; ama khom kha Jisua irchutir a ni saa.

⁵⁸Kha mi kha Pilata kuang a va fea, Jisua ruak chu a va nghia.

⁵⁹Pilata khan a phala. Khanchu, Jisua ruak kha Josefa khan, puan irnêm fâi takin a tuama,

⁶⁰ama thân, lunga inver zoi phinga khan an zâl ta. Khanchu, thân bâi kha lung lian takin a sîng zoiin chu a fe tâka.

⁶¹Mari Magdala le Mari dang kha thân tiang nghain an toia.

⁶²A tûk zîng, Sabat ni sûna Ochai inlalhai le Farisaihai kha Pilata kuang an honga,

⁶³a kuang, “Ka pu, kha milakpa khan a hring laiin sûn thum hnungin chu thoinôk ki ti,” a iti kin inhriat.

⁶⁴Khasikin thân kha sûn thum sûng chu sataka nghâk hrangin thu pe ro, khano’nchu a irchutirhai kha hong an ta mipui laia, ‘Thina irthokin a thoinôk tâk,’ tina an ti. khano’nchu hi thêmna hnungkhôn hi matona nêkin a isiat ual hrang kêng,” an tia.

⁶⁵Pilata’n an kuang, “Sipai nin inei mo ni ma, fe unglân nin thei la lamin inhrungtirhai roi ba,” a ti pehaia.

⁶⁶Khanchu, an fe a, thân lung kha irsinsiana siain, a nghâk hranghai kha an innghâktirhai tâka.