Read Hrangkhol MATHAIA 4 Bible Online

MATHAIA 4 - Hrangkhol bible

MATHAIA 4

¹Kha zoiin chu Jisua kha Diabola inthêm hrangin ramchâra Irtha’n a hruai zôi zel tâka.

²Sûn sômminli le zân sômminli bu a nghei zoiin chu a phîng a hong châm tâka.

³Khanchu, Setana kha a honga, a kuang, “Pathian Nâipa ni ni lele’n chu hi lung hi bai chang hrangin thu pe ro,” a tia.

⁴Jisua’n a sâma, “Bai ringotin mihriam hi an ihring thei hrang ni mah. Pathian bâi ata thu tinrêng suakin kêng an ihring hrang a ni,” tia irziak ang khan, tiin a sâma.

⁵Kha hnung chu Diabola khan Jisua kha, Jerusalem khopui irthianga a hruai lûta, tempil sîpa an ngîrtira,

⁶a kuang, “Pathian Nâipa ni ni lele’n chu irchômtha ro, ‘Ni chungchânga teh Pathianin vântirtônhai thu pe a ta, An kutin nang indom an ti, khano’nchu ni ke leh lung irfûina ni ti,’ ti irziak a ni,” a tia.

⁷Jisua’n a kuang, “Rengpa ni Pathian fia no ro, ti irziak a ni sa kêng,” a tia.

⁸Diabola khan tâng irsâng taka a hruai nôka, rammual ram murdihai le a roiinpuina an entira.

⁹A kuang, “Khûksadelin chubai ni mûkin lân, hihai murdi hi nang pe ki ti,” a tia.

¹⁰Jisua’n a kuang, “Setan, rot pat ro, ‘Rengpa ni Pathian chu chubai mûkin lân ama sin vai tho ro,’ ti irziak a ni,” a tia.

¹¹Khanchu, Diabola khan a rotsana, vântîrtônhai an zuanga a sin an tho pe ta.

¹²Johana an chel ti an hriatin Jisua kha Galili rama a fe pat tâka.

¹³Nazaret suaksanin Kapernaum khuaa a zu om ta, kha kha Zebulun le Naftali ram huala Galili dîl panga om a ni.

¹⁴Deipu Isaia insîr kha a hong itung a ni ta:

¹⁵“Zebulun le Naftali ram, Tuipui panna lam, Jordan râl, Jentailhai omna Galili.

¹⁶Inthim hnuaia toihai khan vâr roiinpuitak an hmua, Thina ram inthim hnuaia toihai chunga a zuang vâr ta,” tia a lei insîr kha a hong tung indikna hrangin, kha kha a hong iom a ni.

¹⁷Kha tena khan Jisua’n, “Irlet roi, irvân Ram chu anai tâk e,” tiin a hril irphut tâka.

¹⁸Jisua chu Galili dîl muanga a chai laiin ulenâi inhni, Simon Petera an iti le Andria chu dîla lên vôrin a hmuhaia; nga chel ngai an ni.

¹⁹An kuang, “Ni zui roi, khanchu mihriam cheltu’n nangni siam ki ti,” a tia.

²⁰An lênhai kha mâksanin, ama kha an zui zôi zel tâka.

²¹Khatak ata a fe thiaia, ulenâi inhni, Zebedaia nâi Jakoba le Johana kha a hmuhaia, an pa Zebedaia leh irkuanga an lên an insui insaa, anni kha a koihaia.

²²Khanchu, irkuang le an pa kha an mâksana; Jisua kha an zui zôi ta.

²³Jisua’n Galili ram murdi ar fanga, an Sinagokhaia irchutirin, Ram Thurchi Sa chu a hrila, Israelhai laia natna tinrêng le hrât nona tinrêng irveihai chu an damhai thiaia.

²⁴Khanchu, Suria ram murdia a thurchi an thang tâka; damloi murdihai, damloina le natna tinrêng tuanghai, ramilhli ichelhai, hrisangol le zenginthihai, a kuang an hong hruaia, a lei indamhaia.

²⁵Galili ram ata, Dekapoli khua ata, Jerusalem ata, Judai ram ata le Jordan râlhai ata mipui tamtakin ama an zui ta.