Read Hrangkhol MATHAIA 6 Bible Online

MATHAIA 6 - Hrangkhol bible

MATHAIA 6

¹“Nin thil sa thohai kha mihriam makunga, an hmu hranga tho loi hrangin irdîn roi; khano’nchu nin Pa irvâna mi kuang lômman hmu no chin ni.

²Khanchu, lungkham thilpêk nin pêkin, mi vârirlethaiin mi inpâk an hlo theina hrangin Sinagokhai le kholaidunghaia an itho ngai angin ni matona bekul tum no roh. Thudik nangni ki hril, an lômman chu an hmu zoi ta.

³Nangma’n chu lungkham thilpêk ni pêkin ni kut chang tianga itho kha ni vei kutin inhre no ri se;

⁴ni thilpêk chu inrûka a om theina hrangin; khanchu, ni Pa, inrûka nang hmu ngaitu khan nang pe a ti.

⁵“Nin chongchai khomin mi vârirlethai angin tho no roi; mi’n an hmu theina hrangin Sinagok haia, kholaidung haia, ngîr puma chongchai an ngaipoimo ngai. Thudik nangni ki hril, an lômman chu an hmu zoi ta.

⁶Nangni’n chu nin chongchai zoro’n, nin chontan sûngrîla lût unglân, in khâr unglân, nin Pa mita hmu theiloi kuanga khan chongchai roi. Khanchu, inrûka nangni hmu ngaitu khan nangni thuan a ti.

⁷“Nin chongchaiin Jentailhai angin nôk mai mai no roi; an chongchai tam sikin inhriat hrangin an ibe a ni.

⁸Anni angin om no roi, nin zong mân khom nin Pa khan nin innanghai chu an hriat zit kêng.

⁹Khanchu, nangni chu hiang hin chongchai roi: ‘Kin Pa, irvâna mi, Ni’rhming mahripin om ri se, Ni Ram zuang tung ri se.

¹⁰Ni nuamlam irvâna mi’n an isin angin, irnênga mi’n sin ri se.

¹¹A vuan hin kin rukin bu ni pe roh.

¹²Kin chunga tho insualtuhai kin ngaidam angin, nang khomin kin tho insualnahai ni ngaidam roh.

¹³Thêmnaa ni hruai inlût no’n lân, mi sualhai ata ni saninhring roh,’ tiin.

¹⁴“An tho’nsualnaa mihai nin ngaidamin chu, nin Pa irvâna mi khomin nangni ngaidam a ti.

¹⁵Nin ngaidam no’n chu nin Pa’n nin tho’nsualnahai nangni ngaidam bîk no ni.

¹⁶“Bu nin nghei zoro khomin mi vârirlethai angin ngûi hmêl irput no roi; anni’n chu mi mit hmu’n bu nghei an inlangtir theina hrangin ngûi hmêl an irput ngai. Thudik nangni ki hril, an lômman chu an hmu zoi ta.

¹⁷Nangni’n chu bu nin ngheiin, sahriak irthû unglân, nin hmâi phi roi.

¹⁸Nin Pa, inrûka om kuang vai no chu mi mit hmua bu nghei inlang no chin ni; khanchu, nin Pa, inrûka nangni hmu ngaitu khan nangni thuan a ti.

¹⁹“Irnênga, irthî le ngarêkin a fâk siatnaa, inruhaiin an inrûk theinaa hin nin ta hrangin irchon bukkhôm no roi.

²⁰Irvâna, irthî le ngar-êkin a fâk insiat loinaa, inruhaiin an inrûk thei loinaa khan nin ta hrangin irchon bukkhôm ual roi.

²¹Nin irchon omna kipa nin lungrîl khom a om ngai.

²²“Mit hi takpum ta hrangin meiser ang a ni, khan nin mit a vârin chu nin takpumpui invâr a ti;

²³nin mit a vâr no’n chu nin pumpuiin chokhap a ti. Khanchu, nangnia vâr om kha an thimin chu, kha inthim kha iti hraia irkhêl hrang mani tâk!

²⁴“Tûte’n hruaitu inhni sin irkop thei no nihai, inkhat hnôlin, inkhat indit an ta; aninole inkhat irngaiinnat an ta, inkhat hmusit an ti. Pathian sin le sum sin irkop thei no chin ni.

²⁵“Khasikin nangni ki hril, nin hringna hrangin imo fâkin kin iin hrang tihai, takpum ta hrangin imo kin isil hrang tihai hi lunginkâng no roi. Fâk hrang nêkin hringna hi a poimo ual, silkai nêkin takpum khom a ipoimo ual loi ma ni?

²⁶Chunglêng vahai khi en u ta, bu tû mahaia, ât mahai, fasiara inlût ual mahai, khannisian, nin Pa irvâna mi’n an fâhaia; anni nêkin chu nin ihlu ual loi ma ni?

²⁷Nangnihai laia lunginkâng sikin tu mo mâni hringna insei viat thei?

²⁸Silkai thua ithoa mo lung nin inkâng? Rama tûktin pâr irsôn lamhai hi ngaitua u ta, sin tho mahaia, pat kai mahai,

²⁹Khannisianlân, nangni ki hril, rêng Solomona lua mina a roiinpui thei ang dôrin ar bela khan, hi tûktin pâr inkhat dôr lua hin irvo ni mah.

³⁰“Khanchu, ram sûl, a vuana hring, nangtûk zînga meia tua nôk zel hrang lua Pathianin khaang dôrin a’rvotirin te, O nangni iamna tômhaio, khahai nêkin chu nangni irvôtir no ni mo?

³¹Khasikin imo fâkin, in kin ta, imo silin kin irbel hrang tiin lunginkâng no roi.

³²Jentailhaiin kha kha an ibuaipui ual tak a ni: nin Pa’n khahai murdi kha nangni khomin nin innang ngêt a nih ti an hriat.

³³A ram le a felna chu zong masa roi, khanchu, hihai murdi hi nangni pêk bêlsa a ti.

³⁴Khasikin, zînga hrang lunginkâng no roi, nangtûka hrang khom Pathianin nangni ngaitua a ti. Sûn khat dengthei hi sûn khat hrangin a iruk a ni.