Read Hrangkhol MATHAIA 7 Bible Online

MATHAIA 7 - Hrangkhol bible

MATHAIA 7

¹“Mi sêl no roi, isêla nin om nona hrangin.

²Nin isêl lam ang takin Pathianin nangni sêl a ta, mi chunga dân nin ihmang tak kha nin chunga khom hmang an ti.

³Ithoa mo mâni mita thingtum om chu inhre loiin ni urêng mita minim hlekte om kha ni ihmu?

⁴Itin mo ni mita thingtum om chianin ni urêng kuang, ‘Ni mita minim hlekte kha nang lei la pe rong,’ ni iti ngam dân?

⁵Nang vârirlet! ni mita thingtum kha pai bakin lân, khanchu, ni urêng mita minim hlekte om kha fel takin hmu thei ni ti.

⁶“Ui kuang chu thil irthiang pe no unglân, vok makunga khom nin lunghlu pai no roi; sirpol an ta, chîl insiat chit an ti.

⁷“Nghi roi, pêk ni nin ti; zong unglân, hmu nin ti; intôk unglân, inhong pe ni nin ti.

⁸A nghi murdi’n an hmu ngai, a zong murdi’n an hmu ngai; tukhom an tôk chu inhong pe ni a ti.

⁹A ni le, nangnihai laia tu mani, a nâipa’n bai nghi sianlân, tu mo lung pe hrang?

¹⁰Nga nghi sianlân, tu mo mirûl pe hrang?

¹¹Khanchu, nangni mi sualhai luan nin nâihai thil sa pêkna châng nin inhriatin te, nin Pa irvâna mi khan a nghituhai kha thil sa a ipêk intam ual hrang mo ni ma!

¹²“Khanchu, thil i khom mi’n nin chunga an itho nin inuam hrang ang khan mi chunga khom tho ngai roi; kha kha Dân le Deipuhai thu a lei ini chian a ni.

¹³“Mikot irchêpa khan lût roi, irhmangna mikot chu a’rzata, a lam khom a hoia, kha lampuia fehai chu tamtak an ni.

¹⁴Hringna mikot chu a chîna, a lampui khom ar chêpa, a hmutuhai khom tômte an ni.

¹⁵“Deipu dolhai ata irdîn roi, khahai kha belra vun silin nin kuang an hong ngai; an sûng tiang chu inê ang an ni.

¹⁶Anni chu an sinthoa inhria nin ti. Ilhling kunga grep an irhmal ngai ma ni? Ilhling kunga khom theipui an ilâk ngai ma ni?

¹⁷Thing sa chu a ra a sa ngai, thing sia chu a ra sa thei ngai mah.

¹⁸Thing sa chu a ra siat ngai maka, thing saloi chu ra sa insua thei ngai mah.

¹⁹Thing tin ra saa raloi ka chu an phûra, meia an tua ngai.

²⁰Khanchu, deipu dolhai chu an sinthoa inhriat nin ti.

²¹“‘Rengpa, Rengpa,’ ni ti narânhai chu irvân Rama lût no nihaia, ka Pa irvâna mi nuamlam thotuhai kêng an ilût hrang.

²²Kha nikhuaa khan mi tamtakin, ‘Rengpa, Rengpa! Ni’rhmingin thu kin insîra, ni’rhmingin ramilhlihai kin inhnot suak ngai, ni’rhmingin sinirkhêlhai kin itho ngai loi ma ni?’ la ti an ti.

²³Kha zoiin chu, ‘Nangni thil sual thotuhaio, nangni inhre ngai ma ung, ki kuang ata rot pat roi,’ tiin la hrilhai ki ti.

²⁴“Khanchu, hi ki thu hi inhriata, zôm murdi chu mi vâr, lungpui chunga in sintu leh irkhek rua a ni.

²⁵Rua a hong thoa, tuihai a hong liana, phâivua a hong thoa, kha in kha a hong nam rak raka, khannisianlân, chim ma, lungpui chunga sin indet khak a ni sikin.

²⁶“Hi ki thu hi inhriata zôm loihai chu mi’nvêt, bâli chunga in sintu leh irkhek rua a ni.

²⁷Rua a hong thoa, tuihai a hong liana, phâivua hai a hong thoa, kha in kha a hong nam rak raka, a chim tâka, a inrîl rup zôi a ni,” a tia.

²⁸Jisua’n kha thu kha an sir zoiin chu mipuihaiin a thu irchutir kha a sân ar khêl an ti.

²⁹Dân irchutirtuhai ang ni loia ircham nei taka ar chutirhai sikin.