Read Hrangkhol MATHAIA 8 Bible Online

MATHAIA 8 - Hrangkhol bible

MATHAIA 8

¹Tâng ata a zuang chum hnungin mipui tamtakin Jisua an zuia.

²A kuang phâr a honga, kûnin chubai a hong mûka, “Rengpa, ni nuamin chu ni ni’rthiangtir thei,” a tia.

³Jisua’n a hong inbana, a tôna, “Ki nuam e, hong irthiang ta ni ti,” a tia, a phâr kha a hong irthiang zôi zel ta.

⁴Jisua’n a kuang, “Tûte kuang insîr no roh, aniachu Ochai kuang va fe’n lân, ni dam ngêt tih mihaiin an inhriat theina hrangin Mosia’n irbôlna thilinhlan hrang a inkung kha inhlan roh,” a tia.

⁵Khan, Kapernaum khua a hong lûtin a kuang sipai irza hruaitu a honga,

⁶“Rengpa, ki siahlo zenginthi, ina a zâl chiana, a sân a na,” a tia.

⁷Jisua’n, “Hong ki ta indamtir ki ti,” a tia.

⁸Sipai irza hruaitu khan a sâma, “Rengpa, ki in sûnga ni lûtna hrangin irhoi mah, chongbâi ngotin ti’nlân, ki siahlo chu dam a ti.

⁹Kei khom mi thuhnuaia om ki nia, ki hnuaia sipaihai an om nôka, ‘fe roh’ ki ti le a fea, ‘hong roh’ ki ti le a honga; ki siahlo khomin ‘hi hih tho roh’ ki ti le a tho ngai,” a tia.

¹⁰Jisua’n kha kha an hriatin a sân ar khêl a tia, a zuituhai kuang khan, “Thudik nangni ki hril, Israelhai laia hiang dôra iamna nei hi tûte la hmu ma ung.

¹¹Nangni ki hril, sak le thang ata mi tamtak hong an ta, irvân Rama khan Abrahama, Isaka, Jakoba hai leh hruaithe la otsap an ta;

¹²Ram nâihai chu pên tiang inthima inhnot suak ni an ti; kha khan chap le irkamirtôk om a ti,” a tia.

¹³Jisua’n, sipai irza hruaitu kuang khan, “Fe tan lân, ni iam angin ni chunga tung ri se,” a tia. khan, kha zoro ngeia khan nâipang kha a dam tâka.

¹⁴Petera ina Jisua a lûtin a tarpinu inkhura zâl kha a hmua,

¹⁵a kut a tôn pea, an khur kha a boi pe ta; a thoia, bu anh a tho pe tâka.

¹⁶Khohloi a hong ni’n chu a kuang ramilhli ichel tamtak an hong hruaia, Jisua chongbâiin, ramilhlihai kha an hnot suaka, damloi hong murdihai khom kha an damtir sa a ni.

¹⁷Deipu Isaia’n, “Ama’n chu ei hrât loinahai a lâka, ei natna a pêl ta,” tia insîr kha a hong tung indik theina hrangin kha kha a itho a ni.

¹⁸Mipui tamtak a kôla om Jisua’n a hmu’n chu Jordan râl tiang fe hrangin a irchutirhai kha thu a pêka.

¹⁹Dân irchutirtu inkhat a honga, a kuang, “Irchutirtu ni fena kipa nang zui ki ti,” a tia.

²⁰Jisua’n a kuang “Sihalhaiin khur an neia, chunglêng vahai khomin riak hmun an nei; Mihriam Nâipa hi chu a lu irnghatna hrang lua nei ma,” a tia.

²¹A irchutirhai laia mi dangin a kuang, “Rengpa, ka pa vai ni va irvûitir ro ba,” a tia.

²²Jisua’n chu a kuang, “Ni zui roh, mithi chu anni mithiin irvûi ri sehai,” a tia.

²³Khan, Jisua irkuanga a chuanga, a irchutirhai khan an zuia.

²⁴Irningloi rengin dîla khan phâivuapui a hong thoa, khanchu tuiirsokin irkuang kha ngîmpai hrang a hong tho tâka, khannisian, Jisua chu a in zêta.

²⁵A’rchutirhai kha Jisua kuang an fea, an va kaithoia, “Rengpa, nin zôk ro, kin ithi hrang kêng,” an tia.

²⁶Jisua’n an kuang, “Itho mo ang dôra nin ichi? Iti hraia iamna tôm mo nin ini!” a tia. Khanchu, a thoia, phâivua le tui irsok kha irngam hrangin thu a pêka, kha hnung chu a dâi dup zôi zel tâka.

²⁷Mihai khan a sân a’rkhêl an tia, “Hi mi hi i ang mi mo a ini? Phâivua le tui irsok ten khomin a thu an izôm hi te!” an tia.

²⁸Dîl râl tiang Gadarin rama Jisua a hong tungin, ramilhli ichel mi inhni, thân ata hong suakhaiin an irtongpuia. Khahai kha ichi an om sikin, kha lampuia khan tûte irlôi ngam mahai.

²⁹Voi khat rengin khahai kha an khêka, “Pathian Nâipa, imo ni lo hrang ni iti? Zoro inkung tung mâna deng nin thei hranga ni izuang ma ni?” an tia.

³⁰Khatak ata nâi tenga om vok rual fâk zong an oma.

³¹Khanchu, ramilhli khan, “Ni nin hnot hrangin chu vok rualhai sûnga son nin fetir roh,” tiin Jisua kha an ngêna.

³²Jisua’n, “Fe roi,” a ti pehaia, khanchu, an suaka, vokhai sûnga an va lût ta. Khan vok rual kha rôla an irtol thâka, dîla a ngîmhai zit tâka.

³³A enkoltuhai kha an intâna, kho sûnga an fea, thil omzia murdi, ramilhli ichelhai chunga thil tunghai kha an van sîra.

³⁴An kho pumin Jisua irhmupui hrangin an hong suaka, ama an hmu’n chu an ram suaksan hrangin an ngên tâka.