Read Hrangkhol MATHAIA 9 Bible Online

MATHAIA 9 - Hrangkhol bible

MATHAIA 9

¹Jisua irkuanga a chuanga, varâl tiang a kâia, a omna khua Kapernaum chu a va tunga.

²Irngai ta, zenginthi inkhat a zâlna le ileh a kuang an hong irzôna. Jisua’n an iamzia a hmu’n zenginthi kuang khan, “Ki nâi, irtharngam takin om roh, ni sualhai ngaidam a ni tâk e,” a tia.

³Dan irchutirtu senkhathaiin, an lungrîlin, “Hi mi hin Pathian a ihril insiat kêng,” an tia.

⁴Jisua’n an lungrîla an ingaituahai kha a lei inhriata, an kuang, “Ithoa mo khaanga thil saloi nin lungrîla nin ingaitua?

⁵‘Ni sualhai ngaidam a ni ta’ ti le ‘Thoiin lân fe ta roh’ ti hi, a kho hi moh ti a ol ual?

⁶Mihriam Nâipa hin irnêng chunga hin sualhai ngaidam theina ircham a nei ti nin inhriat theina hrangin,” a tia. Khanchu, zenginthi kuang khan, “Thoiin lân, ni zâlhmun lan lân, ni ina fe ta ro,” a ti pea.

⁷Kha hnung chu kha pa kha a thoia, a ina a fe tâka.

⁸Mipuihai khan kha kha an hmu’n chu, an chia, mihriamhai kuang irchamneina pêktu Pathian kha an inpâk ta.

⁹Jisua’n kha hmun kha a mâka, a fe malamin khâzana irfuangna hmuna toi mi inkhat, a’rhming Mathaia kha Jisua’n a hmua, a kuang, “Ni hong zui roh,” a ti pea. Khanchu a thoia, a zui tâka.

¹⁰Khan, Jisua kha Mathaia ina bu a nêk laiin, khâzana irfuangtu tamtak le mi sualhai an honga, Jisua le a irchutirhai khan bu an nêkpui sa.

¹¹Farisai senkhathaiin ama kha an hmu’n chu a irchutirhai kuang “Itho mo nin irchutirtu hin khâzana irfuangtuhai le mi sualhai laia bu a inêk sa?” an tia.

¹²Jisua’n an chong kha a lei inhriata, an kuang, “Mi hrisêlhaiin daktor innang mahaia, mi irveisiahaiin kêng an innang ngai.

¹³Pathian Thubu’n, ‘Irbôlna zong ma ung, lungkhamna kêng ki inuam’ a iti hi fe unglân, a omzia va irchu roi, mi felhai irlam hranga zuang ni ma unga, mi sualhai irlam hranga zuang kêng ki ini,” tiin a sâma.

¹⁴Khan, Baptistu Johana irchutirhai, Jisua kuang an honga, “Itho mo keini le Farisaihai hin bu kin nghei mai ngaia, ni irchutirhaiin chu an inghei viat ngai loi?” an tia.

¹⁵Jisua’n an kuang, “Irneinaa khual mihai kha moineitu an kuanga a om sûngin chardong hrangin nin itûng ma ni? Ni thei no ni! khannisianlân, an kuang ata moineitu an tuangpai pe zoro la tung a ta, kha tika chu bu la nghei an ti.

¹⁶Tûte’n puan milui, puan thar hlekin pho ngai mahai, puan thar kha irtum a ta, puan kha inset ual a ti.

¹⁷Tûte’n uain thar kha savun kok miluia thun ngai mahai, thun ngân sian, uain thar khan savun kokhai kha mût set a ta, a uain le a savun kokhai leh hmanghmunboi chang a ti. Khasikin uain thar kha savun kok thara an thuna, khanchu satakin a om ngai,” a tia.

¹⁸Jisua’n kha thu kha an sîr laiin, Juda hruaitu inkhat a honga, a makunga khûksadelin a kuang, “Ki nâinu atûn lele khan a thia; Khannisianlân, hongin lân, a chunga ni kut irnghatin lân hong hring nôk a ti,” a tia.

¹⁹Khanchu, Jisua a thoia, a zuia, a irchutirhai khomin an zui sa a ni.

²⁰Khan, nupang inkhat, kum sômhleihni thi suak, damloi chu Jisua kuanga a honga, a puan hmor a tôna.

²¹A lungrîlin, “A puan hmor lua tônin lân dam zel ki ti,” atia.

²²Jisua chu a hong irheia, khanu kha a hmua, a kuang, “Ki nâinu, irtharngam takin om roh; ni iamna hi ni idampui a ni,” a tia. Khanchu, kha zoro taka khan a hong dam tâka.

²³Khanchu, Jisua kha hruaitu ina a lûta, theihle tumhai le mipui irse mur mur a va hmu’n chu, an kuang,

²⁴“Suak roi, nin rêngin! Nâipang hi thi mah, a in kêng,” a tia. Khanchu, anni khan an innuisana.

²⁵Khannisian, mipuihai an hnot suakhai zoiin chu nâipang omna khan a lûta, a kuta a chela, nâipang kha a hong thoi tâka.

²⁶Kha thurchi kha, kha ram pumpuia khan an thang ta.

²⁷Khan, Jisua’n kha hmun kha a mâka, a lei fe’n chu mitcho inhni’n an zuia, “Davida Nâipa, lung nin kham ro!” tiin an khêka.

²⁸Jisua in sûnga a lûtin chu, mitchohai kha a kuang an honga, Jisua’n an kuang, “Nangni indam thei ki ti, ti nin iam mo?” tiin ar donhaia, “O kin iam, Rengpa!” tiin an sâma.

²⁹Khanchu, Jisua’n an mit a tôna, an kuang, “Nin iam lam ang takin nin chunga tung ri se,” a tia.

³⁰Kha hnung chu an mit a hong vâr pehai ta, Jisua’n ngar takin an kuang, “Hi thu hi tûte hril no roi,” tiin chong a bêhaia.

³¹Khannisian, anni kha an fea, kha ram pumpuia khan Jisua thurchi kha thang an inthei tâka.

³²Khan, kha mihai kha an suak laiin, mi senkhatin ramilhli ichela chong theiloi inkhat Jisua kuang an hong hruaia.

³³Khannisian, ramilhli kha an hnotpai le chu, kha mihriam kha a hong chong thei tâka; mi tinin an irngai ar khêl tâka, “Israelhai laia hiang rêng rêng hi la hmu ngai mak me,” an tia.

³⁴Khannisian, Farisaihaiin chu, “Ramilhli rêngpa’n, ramilhlihai inhnot suak theina irtha a ipêk a ni hi,” an tia.

³⁵Jisua’n kho lian le kho chînhai ar fanga. Sinagokhaia, a irchuhaia, Pathian Ram Thurchi Sa an sîra, damloi chi tinrêng le natna chi tinrênghai an damhaia.

³⁶Mipuihai kha a hmu’n chu enkoltu neiloi belrahai angin dengthei le inthekindara an om sikin, lung an khamhai tak taka.

³⁷Khasikin a irchutirhai kuang, “Bu ât hrang a itam tia le te, sinthotu an tôm, a tia.

³⁸Khasikin a bu ât hranga sintho hranghai tîr hrangin, bu Neitupa kuang khan nghi roi,” a tia.