Read Hrangkhol MARKA 10 Bible Online

MARKA 10 - Hrangkhol bible

MARKA 10

¹Khan, Jisua’n kha hmun kha a mâka, Judai ram panin Jordan râla a kâia, mipuihai kha a kuang an hong irbuka, a irchutirhai ngai ang dênin ar chuhaia.

²Khan Farisai senkhat a kuang an honga, ama fiana hrangin, “Mi’n a dôngma a imâk hi, dânin a phal mo?” tiin an irdona.

³Jisua’n an kuang, “Mosia’n itin mo dân nangni a pêk?” tiin ar donhaia.

⁴Anni’n chu, “Mosia’n chu irmâkna lekha irziakin a iphal ngai a ni,” tiin an sâma.

⁵Jisua’n an kuang, “Nin milung a ngar sikin kêng, kha dân kha nangni a irziak pe mo sôn mak chêi.

⁶Khannisianlân, rammual irsiang ata Pathian thubu’n a iti angin, ‘Pathianin pasal le nupang a siam a ni’.

⁷Khasikin pasalin a nu le a pa masan a ta, a dôngma thop a ti.

⁸Khanchu, an ruaiin taksa pumkhat hong ni ta an ta, inhni ni ta no nihaia; taksa pumkhat hong ni ta an ti.

⁹Pathianin a irzom tâk chu mihriamin sen ta no ri se,” a tia.

¹⁰Khan in sûng an lût tena chu a irchutirhaiin kha thu kha an irdon nôka.

¹¹Ama khan an kuang, “Tukhom a dôngma mâka mi dang nei chu, a dôngma a iuiresan a ni;

¹²Khaang dênin nupang khomin a pasal a mâka, mi dang nei chu a pasal a iuiresan a ni,” a tia.

¹³Mi senkhatin a kuang nâipangtehai an hong hruaia, an chunga kut irnghat hrangin, irchutirhai khan an lei halhaia.

¹⁴Khannisianlân, Jisua’n kha kha a hmu’n chu a ning an mura, a irchutirhai kuang, “Nâipangtehai kha ki kuang inhongtirhai unglân, khaphai no roi, Pathian Ram chu hiang mihai ta kêng a ini.

¹⁵A dik takin nangni ki hril, tukhom nâipangte’n Pathian Ram a ilôm anga lôm loi chu a sûnga lût thei viat no ni,” a tia.

¹⁶Khanchu, nâipangtehai kha an kuahaia, an chunga kut irnghatin sat a vurhai ta.

¹⁷Khan, Jisua kha fe nôk hrangin a hei irphêt le chu, mi inkhat a kuang a hong intâna, khûksadelin, “Irchutirtu sa, kumtuanga hringna ki nei theina hrangin imo ki itho hrang?” tiin ar dona.

¹⁸Jisua’n a kuang, “Itho sika mo sa ni ni iti? Pathian ti no chu tûte sa om mahai.

¹⁹Thupêkhai kha chu nin hriat khate: ‘Mi that no roh; uire no roh; inru no roh; milakin bâto tho no roh; mi huang no roh; ni nu le pa mahrip tho roh,’ tihai hi,” a tia.

²⁰Khan khapa khan a kuang, “Irchutirtu, kha thupêk murdihai kha chu nâipangte ki ni lai ata ki izôm ngai kêng,” a tia.

²¹Jisua’n khapa kha en ngitin, lungthungna tak neiin a kuang, “Lamkhat ni la’rsam, fe’n lân ni inei murdi zuarin lân, kha sum kha inrianghai pe’n lân, khanchu, irvâna irchon nei ni ti; kha hnung chu hongin lân, ni hong zui roh,” a ti pea.

²²Khapa khan kha chongbâi kha an hriatin chu, a hmâi a môk rupa, milung inzîng takin a rota, sum tamtak nei mi a ni sikin.

²³Khan, Jisua kha a hong irhei vêla, a irchutirhai kuang, “Irchonghai hrangin chu Pathian Rama lût hi, idôra intak mo a ini tâk!” a tia.

²⁴Khan, a irchutirhaiin a thuhril kha ar khêl an ti oka, khannisianlân, Jisua’n a sâmhai nôka, an kuang, “Nâihaio, Pathian Rama lût hi chu an tak kêng:

²⁵Mi’rchong Pathian Rama lût nêkin chu, saringsei simphuai mikuara lût hi ol ual a ti,” a tia.

²⁶Khan, anni’n chu ar khêl an ti tak taka, “Khante, tu mo inzôkin om thei hrang?” tiin an sâma.

²⁷Jisua’n anni kha a ena, “Kha kha mihriam hrangin tho thei zât ni maka, Pathian hrangin chu tho thei loi om ma, Pathian hrangin chu itinrêng tho thei a ni,” a tia.

²⁸Petera’n a kuang “Irngai ta, thil tinrêng mâksanin nang kin zui tâk a ni,” tiin a hrila.

²⁹Jisua’n, “A dik takin nangni ki hril, tukhom keima sik le Thurchi Sa sika in mani, urênghai mani, farnuhai mani, nu mani, pa mani, nâihai mani, ramhai mani, mâksan ka chu,

³⁰hi dam sûng renga hin in mani, urênghai mani, farhai mani, nu mani, pa mani, nâihai mani, ramhai mani, a bâk irza’n hmu an ta, dengintheina le, zoro la hong hranga kumtuang hringna hmu sa a ti.

³¹Khannisianlân, mi tamtak a masa taka omhai kha inhnung taka la om an ta, inhnung taka omhai chu maton taka la om an ti,” a tia.

³²Khan, Jisua le a irchutirhai kha Jerusalem hong fe hrangin lampuia an oma, Jisua chu maton an saa. A irchutirhaiin ar khêl an ti oka, a zuipu murdi’n chu an chia. Khan a irchutirhai kha an bingin a hruaihai nôka, a chunga thil la hong tung hranghai an sîr pehai nôka, an kuang,

³³“Irngai u ta, Jerusalema ei hong ife nôk hrang a ni hi; Mihriam Nâipa hi Ochai inlalhai le Dân irchutirtuhai kuta incheltirin om a ti. Thi hrangin rêlinchuk an ta, kha hnung chu Jentailhai kuta pêk an ti.

³⁴Anni khan nuiza siamna’n hmang an ta, inchil sa an ta, zêm an ta, that an ti, khannisianlân, sûn thum zoia thoi nôk a ti,” a tia.

³⁵Khan, Zebedaia nâihai Jakoba le Johana’n Jisua an hong nâia, a kuang, “Irchutirtu, ni kuanga kin nghihai hi, ni ni itho pe kin nuam,” an tia.

³⁶Khan, Jisua’n an kuang, “Nin ta hrangin imo nangni tho pe inlân nin inuam?” a tia.

³⁷Anni khan a kuang, “Ni roiinpuina Rama ni rêngtoihmun chang tiang inkhat vei tiang inkhat nin toitir hrangin kin nuam,” tiin an sâma.

³⁸Jisua’n an kuang, “Nin izong hi nin inhriatloi kêng. Dengtheina khilât ki iin hrang hi nin iin thei hrang ma ni?” a tia.

³⁹Khan, anni’n chu, “Kin thei,” tiin an sâma. Jisua’n an kuang, “Ki khilât in hrang chu in thei nin ta, ki baptisma chang hrang khom chang thei nin ti.

⁴⁰Khannisianlân, ki chang tiang mani ki vei tiang mani a toi hrangin chu keima inthang hrang ni maka, kha hmunhai kha chu Pathianin a inkung pehai ta hrangin kêng a ini,” a ti pehaia.

⁴¹Kha thu kha a irchutir sômkhathaiin an lei inhriatin, Jakoba le Johana chunga khan an ning an mura.

⁴²Khasikin, Jisua’n an rêngin a koihaia, an kuang, “Jentailhai chunga roirêltua an iphunhai chu an chunga an inlal tak tak ngaia, an hruaituhai khom an chunga ircham an nei tak tak ngai tih khom nin inhriat a ni.

⁴³Khannisianlân, nangni laia chu khaang kha ni no ni, tukhom nin laia mi lian chang a nuamin chu, nin sinthotua a iom bak ngêt hrang a ni.

⁴⁴Khabana, nin laia tukhomin maton tak ni a nuamin chu mi murdi suaka a iom bak ngêt hrang a ni.

⁴⁵Mihriam Nâipa lua hi mi’n a sin an itho pe hranga zuang ni maka, mi sintho pe hrang le mi tamtak irtanna hranga a hringna pe hrangin kêng a izuang a ni,” a tia.

⁴⁶Khan, Jeriko an hong tunga, Jeriko rengata Jisua le a irchutirhai le mipui tamtak le a suak laiin kutdo mitcho, Timaia nâipa Bartimaia kha lampui kôla a lei toia.

⁴⁷Nazaret Jisua a nih ti an hriatin chu a khêka, “Jisua Davida nâipa! Lung nin kham roh,” a tia.

⁴⁸Mi tamtakin dâihrek hrangin an hala, khannisianlân, ama khan, “Davida nâipa, lung nin kham roh!” tiin a khêk nôk ual uala.

⁴⁹Jisua a ngîra, “Hong koi u ta”, a tia. Khan mitchopa kha an hong koia, a kuang, “Lungirngam takin omin lân, thoi roh, nang a koi,” an ti pea.

⁵⁰Khan, a puan a pai raka, ar chôma, Jisua kuang a fe ta.

⁵¹Jisua’n a kuang, “Ni chunga imo nang tho pe inlân ni inuam?” ti’n a’rdona. Khan mitchopa khan a kuang, “Irchutirtu, hmu thei ki nuam,” tiin a sâma.

⁵²Jisua’n a kuang, “Fe ta roh, ni iamna hi ni idampui a ni,” a ti pea. Khanchu, a hmu thei zôi tâka, lampuia khan Jisua a zui tâka.