Read Hrangkhol MARKA 11 Bible Online

MARKA 11 - Hrangkhol bible

MARKA 11

¹Khan Jerusalem khua an tung tônin, Bethfage le Bethani kho kôl Oliv tâng an hong tungin, a irchutirhai laia mi inhni a tîra,

²an kuang, “Nin maton khuaa son fe unglân, nin tungin chu sakuartungte irkhit, tûte la chuang ngai loina va hmu nin ti. Kha kha sût unglân, hin hong kai roi.

³Khan, tukhomin, ‘Kha kha ithoa mo nin ikai?’ tiin nangni an irdonin chu, ‘Rengpa’n a izong kêng, hong inthaktir nôk zôi a ti,’ ti roi,” a tia.

⁴Khanchu an fe tâka, sakuartung te, mikot kôla irthung, pên tiang mikot kôla ngîr kha, an va hmua, an sût tâka.

⁵Khataka ngîrhaiin, “Ithoa mo sakuartung te kha nin isût?” an ti pehaia.

⁶Jisua’n a ihril pehai lam ang takin an sâma, khanchu an ife an phal tâka.

⁷Sakuartungte kha Jisua kuang an hong kaia, a chunga an puanhai an dâp zoiin chu, Jisua kha a chuang tâka.

⁸Mi tamtakin lampuia an puanhai an dâpa, mi dangin loia sôlhna sâtin an dâp saa.

⁹Khanchu a mân tianga fehai le a hnunga zuipuhai khan, “Hosana! Rengpa irhminga zuang chu inpâkin om ri se;

¹⁰Ram zuang tung hrang ei pa Davida ram chu inpâkin om ri se; Anchungtaka khin Hosana,” tiin an khêka.

¹¹Khan, Jerusalem a tungin chu Tempila a lûta, thil tinrêng a en vêla. Khannisianlân khohloi a lei ni tâk sikin a irchutir sômhleihnihai leh Bethani-a an fe tâka.

¹²Zîng nôka chu Bethani rengata an hong kîr nôkin, Jisua kha a phîng a châm pea.

¹³Khan, theipui kung hna nei hla vit ata a hei hmua, “A ra mo ki hmu ro rôi,” tiin a va pana; khanisianlân, a va tungin chu a hna ti no chu ite va hmu maka; a ra zoro a ni no sikin.

¹⁴Jisua’n theipui kung kuanga khan, “Atûn ata chu tûte’n ni ra fa ta no ri sehai,” a ti pea. A irchutirhai khomin kha chong kha an inhriat.

¹⁵Khan, Jerusalem an tungin chu Jisua Tempila a va lûta, Tempila neinun zuartuhai le irchôkpuhai kha a’rzûlpaihaia. Sum thûltuhai maichâm le phervali zuartuhai toihmun khom a nam inrîlpai pehaia.

¹⁶Khan, tukhomin Pathian Tempila neinun an ichôi khom phal ta mah.

¹⁷Khanchu, an kuang, “ ‘Ki in chu nam tin ta hranga chongchaina in ti an tih,’ ti irziak a ini loi ma ni? Nangni rêkin chu inruhai chêng inbualna’n nin isiam hi,” tiin a’rchuhaia.

¹⁸Khan Ochai inlalhai le Dân irchutirtuhaiin kha kha an inhriatin, an that theina hrang lampui an zonga. Ama kha a sân an chia, asan chu mipuihai khan ar chutirna kha ar khêl an ti zap sikin.

¹⁹Khan, khohloi rikipin Jisua le a irchutirhai kha khopui ata an fe suak ngai.

²⁰A tûk zînga chu lampui kha an hong hro’n theipui kung kha a’rzung dêna thêmin an hmu tâka.

²¹Khanchu, Petera’n a hong inhriat suak nôka, a kuang, “Irchutirtu, en ta, theipui kung khua ni isâl kha a thêm ving ta,” a tia.

²²Jisua’n a kuang, “Pathian iam roi.

²³A diktakin nangni ki hril, tukhom hi Oliv tâng hi irsonin lân, so tuikhangliana zu irpai roh, ti sianlân, lungrîla lunghla viat loiin a ihril kha tung ngêt a ti, iamtuhai ka chu an ihril ang takin hmu an ti.

²⁴Khasikin nangni ki ti, itinrêng chongchaia nin inghi ka chu hmu sai angin irbe unglân, khanchu, hmu nin ti.

²⁵Khan, chongchai hranga nin ngîr rikipa, tu chunga khom nuarna nin nei khomin ngaidam roi, nin pa irvâna mi khomin nin inchâinahai nangni a ngaidam theina hrangin.

²⁶Khannisianlân, nin ngaidam no’n chu nin pa irvâna mi khomin nangni ngaidam ual no ni,” tiin a hril pehaia.

²⁷Khan, Jerusalem an tung nôka, Tempila a lêng laiin Ochai inlalhai, Dân irchutirtuhai le upahai kha Jisua kuang an honga,

²⁸“Tu irchamin mo hihai hi ni itho? Hi thilhai hi tho hrangin tu’n mo ircham nang a ipêk?” tiin an irdona.

²⁹Jisua’n, “Kei khomin chongbâi khat nangni irdon ki ta, ni don unglân, khanchu, tu irchamin mo hi thilhai hi ki itho nangni hril ki ti.

³⁰Johana’n baptisma a itho theina ircham kha, Pathian ata mo, mihriam ata mo? ni sâm roi,” a tia.

³¹Khanchu, an bingin an irsêla, “Imo ei iti hrang tâk? ‘Pathian rengata’ ei ti lakin te, itho sika mo a chong nin iiam loi? ni ti a ta.

³²‘Mihriam rengata’ mo ti ih?” an tia. Khannisianlân, mipuihai kha an chia, asan chu, mi murdi’n Johana kha deipu’n an lei pom sikin.

³³Khasikin, “Inhre ma ung,” tiin Jisua kha an sâma. Khan Jisua’n, “Kei khomin tu irchamin mo hi thilhai hi ki itho, nangni hril ual no ning,” tiin a sâmhaia.