Read Hrangkhol MARKA 12 Bible Online

MARKA 12 - Hrangkhol bible

MARKA 12

¹Khan, Jisua’n chongirkhekin an kuang thu an sîra, “Voikhat chu mi inkhatin Grep irhuan a siama, dâiin ar kula, grep sômna hrang khur a choia, in irsâng a sina. Khanchu, loi enkol ngaihai kuang a chuan irhlo hrangin a pêka, ram danga an zin tâka.

²Khan, grep irhmal zoro a hong ni’n chu, a dongtum la hrangin a enkolhai kuang a suak inkhat a tîra.

³A enkolhaiin a suak kha an lei chela, an vîka, kut rongin an infetir tâka.

⁴Khan, ama khan suak dang a tîr nôka; kha khom kha a lu an lei vîk phopa mualphoi an lei sak bita.

⁵Ama khan suak dang a tîr nôka; kha pa kha chu an lei that ta. Suak tamtak khom senkhat an lei vîkhaia senkhat an lei thathai.

⁶Inkhat a nâi lungthungtak a la neia; ‘Ki nâipa hi chu mahrip lei tho ngêt an ti,’ tiin a nâipa kha a hnungkhôn taka a tîr tâka.

⁷Khannisianlân, irhuan enkoltuhai khan, ‘Hi pa hi irchon lua hrangtu chu a ni, tho that ei ti, ar chon lua hrang hi ei lua theina hrangin,’ an irtia.

⁸Khaang khan a nâipa kha an chela, an thata, a ruak khom grep irhuan pên tiang an pai tâka.

⁹“Khan, irhuan chongpu khan imo a ilo hrang tâk?” tiin Jisua’n ar dona. Hong a ta, kha mihai kha thathai a ta, grep irhuan kha enkoltu dang pe paihai a ti.

¹⁰Hi Pathian thu hi nin itep loi ma ni? ‘In sinhaiin lung an ipai, hmanghmunboia an ibe kha. A kila lung kâmom tak a hong ni ta.

¹¹Kha kha Rengpa itho a nia, ei mit hmua ar khêl tak chu a ni!’ ti hi,” a tia.

¹²Kha chongirkhek kha Juda hruaituhai demin a insîr tih inhriatin Jisua kha chel an tuma, khannisianlân, mipui an chia, ama kha an mâka, an rot ta.

¹³Khan, a thu’nsîra irthokin chel hrangin Farisai senkhathai le Heroda pâla mi senkhat a kuang an tîra.

¹⁴A kuang an hong tungin chu, “Irchutirtu, mi dik tak ni nia, tukhom ngaisak bîk nei mak che ti kin inhriata, tukhom hnôl ual loiin thei dôrin Pathian thu mi nir chuhai ngaia, khan, Kaisara kuanga khâzana chôi hi mo a’rthiang, irthiang ma mo? kin ipêk hrang mo, kin ipêk loi hrang mo?” an tia.

¹⁵Khannisian, Jisua’n an vârirletzia kha an hriat chiana, an kuang, “Itho mo nin ni ifia? Aduli pum inkhat hong chôi u ta, lei en rong,” a tia.

¹⁶Khanchu, an hong chôi pea, ama khan an kuang, “Tu irlim le tu irhming mo a chuang?” tiin ar donhaia. Anni khan, “Kaisara,” tiin an sâma.

¹⁷Khanchu, Jisua’n an kuang, “Kaisara ta chu Kaisara pe unglân, Pathian ta chu Pathian pe roi ba,” a ti pehaia. Kha hnung chu Jisua chunga khan a sân an irngai ar khêl tak taka.

¹⁸Khan, thoinôkna om ma ti ngai Sadukaihai Jisua kuang an honga.

¹⁹“Irchutirtu, Mosia’n hi dân hi kin ta hrangin a’rziaka; tukhomin nâi nei loiin a dôngma thisan sianlân, a sangpa khan kha meithâi kha a inei ngêt hrang a ni, nâi an neia a thitu upa nâihaia ibe an nina hrangin.

²⁰Voikhat chu urêng sari an oma; a ulian takin dôngma a neia, irchi nei loiin a thia.

²¹Kha hnung an hnina khomin a nei nôka, irchi nei loi ngêtin a thia. An thumna khomin khaang dênin a neia.

²²A hnuai nôkahai khomin khaang dên khan an hong nia; urêng sarihai khan kha nupang kha an lua senga, tukhomin nâi neipui loiin an thi zita. A hnungkhôn taka nupangnu khom kha a thi sa ta.

²³Thoinôk tikin teh tu dôngma tak mo a ini hrang tâk? Kha sarihai khan an rêngin an lua senga,” an tia.

²⁴Jisua’n an kuang, “Nin irngai insual bâka na! Imo asan nin inhriat mo? Asan chu, Pathian thu le irtha nin inhriat no sika a ni.

²⁵Mithihai an thoi nôk tika chu irvâna vântîrtônhai angin om ta an ta, dôngma pasal irnei ta no nihai.

²⁶Khan, mithihai kaithoia an om hrang thurchi chu, Mosia lekhabua chînribuk thurchia khan Pathianin, ‘Keima Abrahama Pathian, Isaka Pathian, Jakoba Pathian ki ni,’ tia a ichongpui lam kha nin la itep ngai loi ma ni?

²⁷Ama chu a hringhai Pathian kêng a ini, mithihai Pathian ni mah. Nin irngai insual ok!” tiin a sâma.

²⁸Dân irchutirtu inkhatin an chong an hriata, Jisua’n Sadukaihai kha sâmna satak a pêk ti an hriatin chu a honga, Jisua kuang, “Thupêkhai laia i hi mo a kâmnang tak?” tiin ar dona.

²⁹Jisua’n a kuang, “A kâmnang tak chu hi hi a ni, ‘Israelhai, irngai roi! Rengpa ei Pathian vai hi Pathian a ni.

³⁰Rengpa ni Pathian chu ni lungrîl murdi’n, nir tha murdi’n, ni ngaituana murdi’n, ni hrâtna murdi’n lung ni ithung hrang a ni’ ti hi.

³¹A voi hnina kâmnang chu hi hi a ni, ‘Nangma lung ni irthung ang dênin ni bômhai lungthung roh’ ti hi. Hi inhnihai nêka thupêk nang ual reng om mah,” tiin a sâma.

³²Dân irchutirtu khan Jisua kuang, “A ni khate, irchutirpu! Ni iti angin Rengpa vai hi Pathian a nia, ama bana chu Pathian dang zel om mahai.

³³Khasikin Pathian chu mihriamin a lungrîl murdi’n, a lunginchongna murdi’n, a hrâtna murdi’n lung a ithung ngêt hrang a ni, Khabana ama lung a irthung ang khan a bômhai khom lung a ithung hrang a ni. Pathian kuang pumhâl irbôl le irbôlna danghai nêkin khom, kha thupêk inhnihai zôm kha a nang ual,” a tia.

³⁴Khan, vâr takin a sâm ti Jisua’n an hriatin a kuang, “Pathian Ram chu hla mak che,” a ti pea. Kha zoiin chu tûte’n chong rêng rêng irdon ngam ta mahai.

³⁵Khan, Jisua’n Tempila ar chuhai laiin an kuang, “Itin mo Dân irchutirtuhaiin Mesia kha Davida irchia mi a ni an iti thei?

³⁶Davida ngeiin Irtha Irthiangin, ‘Rengpa khan ki Rengpa kuang, ki chang tiang toi mai roh, Ni râlhai ni kezapha hnuaia ki sia mâka chu,’ a ti a ni.

³⁷Davida ngei khan ama kha ‘Rengpa.’ a iti kêng, khasikin itin mo Mesia hi Davida irchia mi a ini thei hrang?” a tia. Mipui tamtakin Jisua thu’nsîr kha lôm takin an irngaia.

³⁸A’rchutirhai pumin an kuang, “Dân irchutirtuhai ata irdîn roi, anni chu songkol irfual innghâka chai an nuam ngaia, bazar haia, chubai irmûk an irngaiirsânga.

³⁹Sinagok haia, toihmun satak hai, hruaithena hmuna hmun satak takhai an irngên ngai.

⁴⁰Meithâihai sum an fâka, mi huangna hrangin sôt tak tak an chongchai ngai. Khasika khan an dûk tuang na ual ok a ti,” a ti pehaia.

⁴¹Khan, Jisua Tempila tholôm bôm kôla a toia, tholôm bôma mipuihaiin tholôm an thâklai kha a lei thîr chiana. Irchong tamtakin sum tamtak an thâk rui ruia.

⁴²Khan, meithâi inriangte a honga, damali inhni a thâka, kha kha poisa khat dôr a ni.

⁴³Kha hnung chu Jisua’n a irchutirhai a koi bûma an kuang, “Nangni ki hril, tholôm bôma tholôm thâk murdihai nêkin hi meithâi inriangtenu hin a thâk intam ual tak.

⁴⁴Mi danghaiin chu an inei mihlia, an ihmang zoi loi an thâka, ama’n chu a ineisun, a irdonsuina hranga kha a ithâk zit a ni,” a tia.