Read Hrangkhol MARKA 14 Bible Online

MARKA 14 - Hrangkhol bible

MARKA 14

¹Khan, sûn hni zoia Ferkân kût le bai chol kop loi kût om hrang a nia; Ochai inlalhai le Dân irchutirtuhai khan Jisua dâihreka chela, that hrangin lampui an zong maia.

²“Kût sûng chu ni no ri se, mipui laia buaina suakna ti,” an tia.

³Bethani-a phâr Simona ina Jisua a oma, bu a nêk laiin nupang inkhatin nard Sahriak mirimhoi man hlutak alabastar bûrin a hong chôia, a bûr kha an khoia Jisua lua a buaka.

⁴Khataka mi senkhathai chu an ning an mura, “I hrang mo hi sahriak mirimhoi hi a inchêk?

⁵A duli irzathum nêka tama zuarin a sum kha inrianghai pe thei kêng a ni hi te!” an tia, kha hnung chu a chunga an chiar chuka.

⁶Khannisian, Jisua’n an kuang, “Ite ti no roi, ithoa mo nin inbuai? Ki chunga a itho hi thil sa le enhoi tak a itho a ni.

⁷Inrianghai chu nin kuanga om mai an nia, nin nuam te tena nin san thei. Kei chu nin kuang om mai hrang ni ma ung.

⁸A thei lam dôra a itho a ni; ki takpum hi phûm hranga mirimhoi a lei ibuak irh a ni.

⁹Thudik nangni hril ki ti, rammual pumpuia Thurchi Sa hi an hrilna rikipa, hi nu sintho khom hi ama inhriat maina hrangin insîr an ti,” a tia.

¹⁰Khan, irchutir sômhleihnihai laia Juda Iskariota khan Jisua an cheltir tumin Ochai inlalhai kuang a va fea.

¹¹Kha kha an lei inhriatin a sân an lôma, poisa pêk an inkung tâka. Khanchu, incheltir hrang lam zoro’nchum a zong tâka.

¹²Bai chol pol loi kût sûn maton tak Ferkân kûta hrang belrate an that ngai nia khan irchutirhaiin a kuang, “Ferkân khalâi hi khôn mo nang irfûk pe inlân ni inuam?” tiin Jisua an irdona.

¹³Khanchu, irchutirhai laia mi inhni a tîra, “Khopuia va fe ta unglân, pa inkhat bêla tui chôiin nangni irtongpui a ti. Ama kha zui unglân,

¹⁴a lûtna taka in chongpu kuang khan, ‘Irchutirtu’n kho hin mo ki irchutirhai leh Ferkân Kût khalâi kin ifâkna hrang chontan kha?’ a ti, va ti roi.

¹⁵Khanchu, ama ngeiin chontan chuanchung irzat tak, neinun om sai, rêlinfel diam nangni irhmu a ta, khataka khan ei ta hrangin va’rfûk roi,” a tia.

¹⁶Khan irchutirhai kha an suaka, khopuia khan an fea, Jisua’n a ihril lam ang takin an va hmua, Ferkân Kût khalâi kha an irfûktir ta.

¹⁷Khohloi tiang a hong ni’n chu Jisua kha irchutir sômhleihnihai leh an fe ta.

¹⁸Khan, khalâi an irhîl lai takin, Jisua’n “A dik takin nangni ki hril; nin laia mi inkhat, ki kuanga khalâi otpu lele hin nin cheltir a ti” a ti pehaia.

¹⁹Khanchu, irchutirhai milung dûk a tonga, an bi bingin “Keima ma ni?” tiin an irdon irhlôma.

²⁰Jisua’n an kuang, “Sômhleihnihai laia inkhat, khênga ni otpuipu tak hi a ni.

²¹Pathian Thubu’n Mihriam Nâipa hi thi a ti, a lei iti ang takin a ithi hrang a ni; Khannisian, Mihriam Nâipa incheltir hrangtu chung chu a rik e! kha mihriam kha a irzir loi chian ni sian a ta hrangin sa ual a ti!,” a tia.

²²An fâk lai takin Jisua’n bai a lâka, lômthu an sîr zoiin chu a khoia an kuang a pêka, “Fa roi, hi hi ki takpum a ni,” a tia.

²³Kha hnung chu khilât a lâka, Pathian kuang lômthu an sîr zoiin chu an kuang a pêka; an rêngin an in chit ta.

²⁴Khanchu, Jisua’n an kuang, “Hi hi ki thisen mi tamtak ta hranga suak, Pathian Thuthung Thar namindetna a ni.

²⁵Nangni ki hril; Pathian Rama uain thar ki in nî a tung mâka chu hi uain hi in nôk ta no ning,” a tia.

²⁶Kha zoiin chu hla inkhat an saka, an sak zoiin chu Oliv tânga an fe ta.

²⁷Khan, Jisua’n a kuang, “Nin rêngin laizâm tho nin ta, ni la ma zit nin ti, Pathian Thubu’n, ‘Pathianin belrapu kha that a ta, belrahai kha irthekindarh chit an ti,’ a ti sikin.

²⁸Khannisianlân, ki thoinôk hnungin Galili rama nin matona lei fe ki ti,” a tia.

²⁹Petera’n a kuang, “A danghaiin nang mâk zithai khomsian, keima, chu nangma viat no ning,” tiin a sâma.

³⁰Jisua’n Petera kuang, “Nang ki hril; a vuan zân voihni âr a khuang mân nangin voithum ni phil ni ti,” a ti pea.

³¹Petera’n chong na ualin a sâma a kuang, “Ni thina thi sa hrang khom ni inlân nang phil viat no ning,” a tia, irchutir danghai khomin khaang dênin an ti seng sa.

³²Khan, Gethsemani an iti hmun kha an hong tunga, Jisua’n a irchutirhai kuang, “Ki chongchai sûngin chu hin lei toi roi,” a ti pehaia.

³³Petera, Jakoba le Johana hai kha a hruaia; a saterengin irthanvâiin a milung dûk a tong tâka.

³⁴Khanchu, an kuang, “A sân ki milung dûk a tong hraia thi hrang ang dôrin kêng ki iom. Hin toi unglân, le’rtûng chian roi,” a tia.

³⁵Maton tiang a va fe viata, irnênga khûksadelin, thei a ni’n chu, kha tuangna zoro kha irlêk hrangin a chongchaia.

³⁶“Abba! Ka pa! Nangma ta hrangin itinrêng thothei a ni, hi tuangna khilât hi ki kuanga irthokin ni khâipai pe roh, Khannisianlân, Keima ircham ni loiin nangma ircham ni ri se,” a tia.

³⁷Kha hnung chu a hong kîr nôka, irchutir inthumhai kha a inin a hmuhaia, khanchu, Petera kuang, “Simon, ni iin kêng na? Dârkâr khat lua irtûng chianin ni iom thei loi na?

³⁸Inthêmnaa nin lût nona hrangin irtûng chianin chongchai roi, Irtha’n chu a nuama, taksa’n a iphâri loi a ni,” a tia.

³⁹Khan, voikhat a va fe nôka, a iti ang dênin a va chongchai nôka.

⁴⁰Kha hnung chu a irchutirhai tiang a hong kîr nôka, an in ngîrin a hmuhai nôka; an in a mu hrai sikin a sâm hrang lam khom inhre mahai.

⁴¹Khan, a hong kîr voi thumna’n chu an kuang, “Atûn chu, irngam unglân in ta roi. A ruk ta! A zoro a hong tung ta! en u ta, Mihriam Nâipa hi mi sualhai kuta an ichel hrang tâk a ni.

⁴²Thoi unglân, fe ta ei ti, en u ta, nin chel hrangtu hi a hong nâi ta,” a tia.

⁴³Khaanga a la chonglai takin irchutir sômhleihnihai laia Juda kha a hong tung zôia. Ama le Ochai inlalhai le Dân irchutirtuhai le upahai itîr mipui, khandai le hêmvuak chôiin an hong tung saa.

⁴⁴An chel hrangtu khan, “A biang ki itum tak kha nin izongtu ni a ti. Chel unglân, sataka enkolin hruai roi,” tiin a lei hrilhai diam tâk a ni.

⁴⁵Khan, Juda kha a hong tung le chu Jisua kha a va pan pata, “Irchutirtu,” tiin a biang a tuma.

⁴⁶Kha hnung chu Jisua an chela, an intûk khak tâka.

⁴⁷Khan, khataka ngîrhai laia mi inkhatin a khandai a kai doka, Ochai inlaltak suak, mikuar a sât thâk paia.

⁴⁸Kha hnung chu Jisua’n anni kha a chongpuihaia an kuang, “Khandai le hêmvuak chôiin hrâtlaksong chel hrang ang dêna ni chel nin ihong na?

⁴⁹Tempil haia a nitin irchutirin nin kuang ki om ngaia, ni chel ual mak chêia, khannisian, Pathian thu a hong tung indikna hranga a ni hi,” a tia.

⁵⁰Kha kha ar zoiin chu irchutirhai khan ama kha an mâk raka, an intân pat ta.

⁵¹Khan, ruatharte inkhat, puan irphân sila irvo’n Jisua a zuia. Ama kha chel an tuma.

⁵²Khannisianlân a puan marakin, a rongin an tân pat ta.

⁵³Jisua kha Ochai inlaltak ina an tuanga, Ochai inlalhai, upahai le Dân irchutirtuhai an hong irbuk sa zôia.

⁵⁴Petera’n hla vit ata a zuia, Ochai inlaltak kholâi dênin a fea. Khataka khan mi chel ngaihai leh mei uatin a toia.

⁵⁵Ochai inlalhai le Sanhedrin murdi khan Jisua an that theina hrang bi an zonga, khannisian hmu mahai.

⁵⁶Mi tamtakin milak an intuma, khannisianlân, an intumna bi irhmu mah.

⁵⁷Mi senkhat an ngîra milak an intuma.

⁵⁸“Hi pa hin, ‘Hi tempil kuta sin hi insiat ki ta, sûn thumin a dang kuta sinloi inding nôk ki ti,’ a ti kin inhriat,” an tia.

⁵⁹Kha khoma khan an intumna bi irhmun thei ual mah.

⁶⁰Khanchu, Ochai inlaltak kha an matona a va ngîra, Jisua kuang, “Nang an intumna thua hin ite ni isâm loi hrang mo?” tiin ar dona.

⁶¹Jisua kha a dâihreka, i ang khomin sâm mah, Ochai inlaltak khan a kuang, “Inpâk inruk Pathian Nâipa Mesia chu ni ni mo?” tiin ar don nôka.

⁶²Jisua’n a kuang, “Ki ni, Mihriam Nâipa hi sinthotheitu chang tianga toiin, irvâna sûm kâra zuang la hmu nin ti,” tiin a sâma.

⁶³Kha hnung chu Ochai inlaltak khan a puansilhai ar ekthêra, “Inhriatpuitu dang ite nang ta ma?

⁶⁴Pathian a ihrilinsiatzia hi nin inhriat tâka, itin mo nin irngaidân?” a tia. An rêngin ama kha that inruk a ni an ti chita.

⁶⁵An laia senkhatin an inchila, a hmâi an tuam pea, an zêma. A kuang, “Ti ro! tu mo nang zêm!” an tia, khabana a chelpuhai khomin hruai pumin an inbên thiaia.

⁶⁶Khan, Petera kha hnuai tiang a in irhual sûnga a la om laiin Ochai inlaltak siahlo laia dôngmate inkhat a honga.

⁶⁷Petera mei lei uat kha a hmu le chu a en infela, a kuang, “Nang khom hi, hi Nazaret Jisua kuanga om ngai kha ni ni khate,” a ti pea.

⁶⁸Petera’n, “Ni thu’nsîr omzia inhre viat ma ung, a’rngaina lam chang khom inhre ma ung,” tiin a phila, kha zoiin chu dâi pên tiang a va suaka, âr khom a khuang zôi ta.

⁶⁹Khan, dôngmatenu khan a en maia, a kôla ngîrhai kuang khan, “Hi pa khom hi an laia mi inkhat a ni sa,” a ti nôka.

⁷⁰Khannisian, Petera’n a phil nôka, chomkhat a hong ni nôk tena chu, a kôla ngîrhai khan Petera kuang, “Galili rama mi ni ni sa sikin, nang khom an laia mi ni ni ngêt,” an tia.

⁷¹Khannisianlân Petera’n an kuang, “Thudik hrilin khomâk ki irsâm a ni! A dik no’n chu Pathianin deng nin theitir ri se! kha mihriam nin iti kha inhre viat ngai ma ung!” a tia.

⁷²Kha zoiin chu âr voihni a khuang nôk tâka, khanchu Jisua’n Petera kuang, “Âr voihni a khuang mân nangin voithum ni phil ni ti,” a iti pe chong kha a hong irhriat suak nôka, kha chong kha a ngaitua’n a chap tâka.