Read Hrangkhol MARKA 3 Bible Online

MARKA 3 - Hrangkhol bible

MARKA 3

¹Khan, Sinagoka a lûta, kha khan mi inkhat kut zenginthi a lei oma.

²Ama an hnôl theina hrangin sabat nia an damtir le indamtir loi an enirchika.

³Khan, Jisua’n kut zenginthi kuang khan, “A laia hin hong suak roh,” a tia.

⁴Khan, Jisua’n mipuihai kuang, “Ei dânin Sabat niin imo tho hrangin a ni iphal? Sabat nia insatir mo a’rthiang, insiat mo? mi hringna san mo a’rthiang, that mo?” tiin a’rdonhaia; khannisianlân an dâihreka.

⁵An milung ngarzia an hriatin poi a ti tak taka, ningmur takin a enhai hnungin kha pa kuang khan, “Ni kut inphar roh,” a tia. A hong phar suaka, a kut kha a hong dam pe tâka.

⁶Khanchu, Farisaihai kha an suaka, Jisua an that theina hrang dân ngaitua’n Heroda pâla mihai leh khan an chong zôi tâka.

⁷Jisua kha a irchutirhai leh dîl pang tiang an fe thal tâka, Galili ram ata mipui tamtakin an zuia. Khan a sintho roiinpuizia an inhriatin Judai ram le

⁸Jerusalem hai ata, Idumai ram le, Jordan râl hai ata, Tura le Sidon hual hai ata kha mipui tamtakin ama an hong pan saa.

⁹Mipuiin an hong hneng hrai loina hrangin irkuang lei ngaitua hrangin a irchutirhai kha chong a bêhaia.

¹⁰Mi tamtak an damtir tâk sikin natna nei murdi’n ama tôn tumin an ûm mur mur tâka.

¹¹Ramilhli ichelhai khomin ama kha an hmu rikipin a makunga an hong inboka, “Nang Pathian Nâipa ni ni,” tiin an khêk ngaia.

¹²Khanchu a thurchi kha tûte inhrilhai loi hrangin a khaphai ngita.

¹³Khan, Jisua kha tânga a fea, a mi hranga a indit ualhai kha a koihaia, khan anni kha a kuang an honga.

¹⁴A kuanga om theina hrangin le thuhril hranga a tîr suak theina hrangin.

¹⁵Ramilhlihai chunga ircham an nei theina hrangin sômhleihni an thanghaia.

¹⁶Khahai kha Simona, (Jisua’n Petera tia a iphua tâk kha).

¹⁷Zebedaia nâi Jakoba le a sangpa Johana (kha mihai kha “Boanergea” a tihaia, kha omzia chu “Khonri Nâihai,” tihna a ni).

¹⁸Andria, Filipa, Bartholomaia, Mathaia, Thoma, Alfaia nâi Jakoba, Thadaia Kanaan mi Simona,

¹⁹a cheltu Juda Iskariota hai an ni.

²⁰Khan, Jisua kha in tiang a va kîra, mipui an lei hong irbukkhôm nôka, Jisua le a irchutirhai khan bu anh fâk irman mahaia.

²¹A in sûng mihaiin an inhriatin chu ama hruai hrangin an irthoka, mipuihaiin, “An vêt tâk kêng!” an ti pehai sikin.

²²Dân irchutirtuhai Jerusalem rengata zuanghai khan, “Belzebula ikop a ni hi te. Ramilhli rêng sikin kêng ramilhlihai a inhnot suak ngai,” an tia.

²³Jisua’n a koihaia, chongirkhekin an kuang, “Setana’n Setana ngêt itin mo a inhnot suak thei hrang?

²⁴Ram khom, mâni le mâni an irdoiin te, kha ram kha ngîr thei no ni.

²⁵In sûngkua khom anni le anni an irdoiin te kha in sûng kha ngîr suak thei no nihai.

²⁶Khaang khan, Setan khom ama le ama irdoi ta sianlân chu, ngîr suak thei no ni, irhmang a ti.

²⁷Mi hrât chu an khitphiar bak no’n chu, a in lûtin ar chon lapai pe thei ngai mahai, an khitphiar zoiin kêng a in kha an inram thei hrang.

²⁸A dik takin nangni ki hril, mi an sualna murdi le an hril insiatna murdia khom ngaidam ni a ti.

²⁹Khannisianlân, Irtha Irthiang hrilsiat chu itiklai khom ngaidam ni ta no nihai, kumtuanga sualna an itho a ni,” a tia.

³⁰Kha kha Jisua’n, “Ramilhli ikop a ni,” an ti sika khan kha kha a insîr a ni.

³¹Jisua nu le a urênghai kha an hong tunga, pên tiang an ngîra, mi an hong inkoitira.

³²A kôlvêla mipui toihai khan a kuang, “En ta, pên tiang son, ni nu le ni urênghaiin nang an zong,” an tia.

³³Ama khan a sâma, “Ka nu le ki urênghai kha tuhai mo an ini?” a tia.

³⁴A kôla toihai kha a hong en vêla, “Hei en u ta, Ka nu le ki urênghai hi.

³⁵Tukhom Pathian nuamlam thotuhai kha kêng, ki urênghai, ki farnuhai, ka nuhai an ni,” a tia.