Read Hrangkhol MARKA 5 Bible Online

MARKA 5 - Hrangkhol bible

MARKA 5

¹Jisua le a irchutirhai chu Galili dîl râl, Gerasin ram an hong tunga.

²Khan, Jisua kha irkuang ata a suak le chu ramilhli ichel, thâna irthoka hong suak mi inkhatin a tonga.

³Kha mi kha thânhaia a om ngaia, tukhomin thîrhrui khomin khit thei ngai mahai.

⁴Thîrhruia khitin thîrkolhai inbuntir ngai khomsian, thîrhruihai kha an pot sata, thîrkolhai kha a khiak chit ngai; a hrât hrai sikin tûte’n sep inhne thei mahai.

⁵A sûn a zânin thâna le tânga a khêka, lunghai leh khom ar ât ngai.

⁶Hlatak ata Jisua kha a hmu’n chu a maton tiang panin an tâna, kûnin chubai a mûka.

⁷Inring takin a khêka, “Jisua, Inchungtaka Pathian Nâipa, imo ni lo hrang ni iti? Deng nin thei loi hrangin Pathian irhmingin nang ki ngên,” a tia.

⁸(Hi a itih nasan chu Jisua’n a kuang, “Nang ramilhli, hi pa sûng ata hi hong suak roh,” a lei ti tâk sika a ni).

⁹“Imo ni’rhming?” tiin a’rdona. Ama khan, “Ki’rhming chu Nuaia a ni, kin tamtak tak a ni,” a tia.

¹⁰Khabana, kha ram ata kha inhnot suakhai loi hrangin Jisua a ngên ngita.

¹¹Khan, kha hmun kôla tâng panga fâk zong, vok tamtak an oma.

¹²Ramilhlihai khan Jisua kuang, “Vok sûnga nin lûttir roh,” tiin an ngêna.

¹³Jisua’n a phal pehai ta. Khanchu, ramilhli kha an suaka, vokhai sûnga an lûta, vok rualhai kha sânghni vêl an nia, khoisabaka an intâna, dîla khan an tâk that ta.

¹⁴Vok vâituhai kha chi pumin an intâna, kho sûng le a kôlvêla mihai kha an va hrila. Khanchu, thil omzia eninfel hrangin mipui an fe ta.

¹⁵Jisua kuang an hong tungin chu ramilhli ichel, Nuaia icheltu kha, puan sila lungrîl pangai irputa lei toi an va hmua; an chi tak taka.

¹⁶Kha a hmutuhai khan ramilhli ichelpa chunga thil tunghai le vok thurchihai kha an lei hril saa.

¹⁷Kha mihai khan Jisua kha an ram ata suak hrangin an ngêna.

¹⁸Jisua irkuanga a chuang tôn chu ramilhli ichelpa khan Jisua kuang, “Ni kuang hong ki ti,” tiin a ngêna.

¹⁹Khannisian, Jisua’n phal mah, phal nêkin a kuang, “Ni in mihai kuang fe’n lân, Rengpa’n ni chunga sin nang a itho pezia le lung nang a inkhamzia kha va hril roh,” a ti pea.

²⁰Khapa kha a fea, Dekapoli khuahaia khan thil a itho pezia kha tâng an sampui tâka, mi murdi’n ar khêl an ti tak tak.

²¹Khan, Jisua kha irkuangin varâl a kâi nôkin chu, dîl panga mipui tamtak a kuang an hong irbûma.

²²Sinagok hruaitu laia inkhat, ar hming Jaira kha a honga, Jisua a hmu’n chu a ke bula khûksadelin chubai a mûka,

²³“Ki nâi nâipangte a sân a naa, a hong hara, a hong dam theina hrangin a chunga ni kut ni’rnghat pe roh,” tiin a ngên ngita.

²⁴Khanchu, a fepui tâka, mipui tamtakin ama kha an zui saa, ihneng rengin an hnenga.

²⁵Nupang inkhat, kum sômhleihni thi suaka damloi a oma.

²⁶Daktor tamtakin an en chit tâka, a sum nei murdi leh ar enkol tâka, khannisian, irzâng ual nêkin inrikin an rik pe ual uala.

²⁷Jisua thurchi a hong inhriatin chu a hnung tianga mipui kâra khan a honga,

²⁸a lungrîlin, “A puan vai khom tôn inlân dam zôi ki ti,” a tia.

²⁹Khanchu, a puan a tôna a thi suak kha voikhat rengin a hong chat pit ta, a natna kha indam a ni tah ti ar hriat zôi ta.

³⁰Jisua khom khan ama ata sinthotheina a suak tih ar hriat zôia, mipui tiang ar hei vêla, “Tu mo ki puan tôn kha?” a tia.

³¹A irchutirhaiin, a kuang, “Mipuiin ihneng renga nang an ihneng hi ni hmua, itina mo, tu mo ni tôn? ni iti hi?” an tia.

³²Khan, Jisua’n chu a tôntu hmu nuamin a hei thîr vêla.

³³Khanchu, a chunga thil zuang tung tâk kha ar hriatin, nupangnu kha ichi le inthing pumin a honga, khûksadelin chubai a mûka, itinrêng dik takin a hril tâka.

³⁴Jisua’n a kuang, “Ki nâinu, ni iamna hi ni idampui a ni, irtharngam takin fe tan lân, ni natna ata kha hong dam suak ta ni ti,” a tia.

³⁵Jisua kha a la chong lai takin, Jaira in ata mi honghai khan, “Ni nâinu a thi ta. Itho sikin mo irchutirpu hi lan sôltir hranga?” an hong tia.

³⁶Jisua’n an thu’nsîr kha a len hriat saa, Sinagok hruaitupa, Jaira kuang khan, “Chi no roh, iam mai roh,” a tia.

³⁷Petera, Jakoba le a sangpa Johana hai tih no chu mi dang tukhomin an izui phal ta mah.

³⁸Khan, Jaira in an va tungin chu, lei irse mer mur le lei chap ngei ngûia lei hong khêk lel lul a va hmua.

³⁹A lût malamin an kuang “Ithoa mo nin ibuai nin ichap mer mur? Nâipang kha thi mah, a iin kêng,” a tia.

⁴⁰Anni khan an innuisana, khanchu, an rêngin an hnot suakhaia, nâipangtenu nu le pa le ama zuituhai kha a hruaia, nâipangtenu zâlna hmuna khan an lûta.

⁴¹Khan, nâipang kut kha a chela, a kuang, “Talitha, Kum,” a tia, (kha kha tôinu, thoi ro!) tihna a ni.

⁴²Nâipangtenu kha a hong thoia ar lôi thei zôia, ama kha kum sômhleihni mi a ni. A sân ar khêl an ti tak taka.

⁴³Jisua’n an kuang, tûte kuanga insîr loi hrangin hê a bêhaia a khapa, “Fâk rua pe roi,” a ti saa.