Read Hrangkhol MARKA 6 Bible Online

MARKA 6 - Hrangkhol bible

MARKA 6

¹Jisua’n kha hmun kha a suaksana, a omna ngai khua tiang a fe nôka, a irchutirhai khomin an zui maia.

²Sabat ni a hong nia, Sinagoka khan mi a hong irchutir phut tâka; mi tamtak an oma, a thu an inhriatin chu ar khêl an ti tak taka, “Hi hi kho tak ata a inhriat ma ni? A kuang vârna khom ipêka a iom hi? Itin mo sinirkhêl a itho thei hi te?

³Mari nâipa mistiri , a urênghai khom Jakoba, Josefa, Juda le Simona hai hi ni mahai mo? A farhai khom ei kuanga om mo ni mahai?” an tia. Kha hnung chu ama kha an hnôl ta.

⁴Jisua khan an kuang, “Deipu chu a khua le a urênghai laia ti no chu hmun tina chôiindômin a om ngai,” a tia.

⁵Khan, damloi tômte chunga kut a’rnghata a indam ti no chu khataka khan sinirkhêl reng tho thei mah.

⁶An iam no sika khan ar khêl a ti ok a ni.

⁷Khan, mi irchu thiaiin khuahai a’rfang vêla. Sômhleihnihai kha a koia, inhni hnia irkopin a tîr suakhaia, ramilhlihai chunga irchamneina a pêkhaia,

⁸an kuang, “Nin inzinnaa khianghrol ti no chu bai mani, hmarsa mani, nin zêpa sum mani chôi no roi.

⁹Kekok chu bun unglân, khannisian, songkol inhni irthuam chu chôi no roi,” tiin chong a bêhaia.

¹⁰Hiang hin a ti sa, “Nangni an inhamin chu nin suaksan mâka chu nin va itungna in ngeia khan om mai roi.

¹¹Kho khua khomin nangni lôm loia, nin thu an irngai no’n chu, marak unglân, nin kea vâiphin kha hui tha roi. Kha kha an ta hrangin irningna ni a ti,” a tia.

¹²Khanchu, an fe suaka, mipuihai irletna hrangin thu an insîra.

¹³Ramilhli tamtak an inhnot suaka, damno tamtak sahriak an pola an dam ta.

¹⁴Jisua irhming kha a sân an thang tâk sikin, rêng Heroda khan a len hriat sa tâka. “Baptistu Johana kha mithi lai ata a hong thoi nôk tâka, hi sinthotheina irtha hi a inei,” an tia.

¹⁵A danghaiin chu, “Elija a ni,” an tia. Mi danghai nôkin chu, “Tiana deipuhai anga deipu inkhat a ni,” an tia.

¹⁶Heroda’n chu a len hriatin, “Johana, a lu ki itanpai kha, a hong thoi nôk ta a ni khate,” a tia.

¹⁷Heroda ngeiin Johana kha an cheltira, khitphiarin intângna ina a lei ikhum a ni. Heroda’n hianga a ithôna chu a sangpa Filipa dôngma ni khom sian, ama’n dôngma’n a inei nôk, Herodi sika a ni.

¹⁸Johana’n Heroda kuang, “Ni sangpa dôngma ni inei hi dik mah,” tiin a lei hril mai ngaia.

¹⁹Khasikin Herodi’n Johana kha a hmumâk tâka, that a tuma, nikhomsian, Heroda sikin that thei mah.

²⁰Heroda’n Johana kha mi dik le mi’rthiang a nih ti an hriat sikin a chia, a inzôk ngai a ni. Johana thu’nsîr an hriat rikipin a sân a buai ngai khomin, a thu’nsîr irngai a nuam ngai a ni.

²¹Heroda khan a mi roiinpui hai, sipai hruaitu lian hai, Galili rama mi lianhai a koia, a suak champha hruai an thea, kha nî khan chu Herodi’n zoro’nchum a hmu ta.

²²Herodi nâinu kha a hong lûta, a lâma, Heroda le khual mihai an lômtir oka, khasikin rêng khan nâipangtenu kuang, “Imo ni inuam? Ni inuam tak ni zong roh, nang pe ki ti,” a tia.

²³Chonginkung tamtak neiin a kuang, “I khom ni ni inghi ka chu ki ram chimrip khom nang pe ki ti,” tiin chong ar khâm saa.

²⁴Khanchu, nâipangtenu kha a suaka, a nu kuang, “Imo ki izong hrang?” tiin a nu kha a var dona. A nu khan, “Baptistu Johana lu,” tiin a lei sâma.

²⁵Inrang takin rêng kuang a kîr lata, “Khênga Baptistu Johana lu ni pe zôi roh,” a tia.

²⁶Reng khan poi a ti tak taka, khannisian, a khual mihai makunga a chonginkungna sika khan irkhâl thei maka.

²⁷Reng khan a nghâktu sipai inkhat a tîr zôia; intângna ina khan Johana lu kha a tana,

²⁸Kha hnung chu khêngin a hong chôia, nâipangtenu kuang a pêka, khan a nu a va pêk ta.

²⁹Kha kha a irchutirhaiin an inhriatin chu an va fea, a ruak kha an tuama, thâna an phûm ta.

³⁰Tirtônhai kha Jisua kuang an hong kîr nôka, an sintho murdi le an irchuhai murdi Jisua an hrila.

³¹Mipui a fe hong an tam hrai sikin Jisua le a irchutirhai kha bu anh khom fâk irman mahai. Khasikin ama khan an kuang, “Tho ei bingin ei om theina hrangin fe ei ta, lei irngam ta rei,” a tia.

³²Khanchu, fianrial panin irkuanga an fe ta.

³³Nikhomsian, an isuak chu mi tamtakin an hmua, tuhai mo an nih ti khom an lei inhriathai zôi zela, kho tina irthokin an intâna, Jisua le a irchutirhai kha an lei khâla.

³⁴Jisua kha irkuang ata a chumin chu mipui tamtak a hmua, enkolpu nei loi belra ang an ni sikin lung an khamhai tak taka, sathnem irngai takin ar chutirhai tâka.

³⁵Khante khohloi a hong ni tâka, a irchutirhai kha Jisua kuang an honga, a kuang, “Hi hi hmun fianrial a nia, a sân an hnung ok tâka,

³⁶ei kôlvêl loia mani, khuaa mani infetirhaiin lân, an fâk hrang imo khat ircho ri sehai,” an tia.

³⁷Jisua’n an kuang, “Nangni’n fâk rua imo khat pehai roi,” tiin a sâma. Khan, anni’n a kuang, “Bai a duli irzahni man va’rchôkin fâk rua kin ipêk hrang ma ni?” tiin an irdona.

³⁸Khasikin Jisua’n an kuang, “Bai iza mo nin inei? fe unglân, va en u ta,” a tia. Khanchu, an inei zât an inhriat le chu, “Bai ringa le nga inhni,” tiin an hrila.

³⁹Kha hnung chu, Jisua’n mipuihai kha, a pâl pâlin irsena, hloisûl chunga intoihai hrangin irchutirhai chong a bêhaia.

⁴⁰Khaang khan mipuihai kha a thâr thârin irzakhatin, sômringa’n an intoitirhai tâka.

⁴¹Kha zoiin chu Jisua’n bai ringa le nga inhni kha a lâka, Pathian kuang lômthu a hrila. Kha hnung chu bai kha a khoia, mipuihai sem pehai hrangin a irchutirhai kuta a pêk ta. Nga khom kha an rênga laia a sem pehai sa tâka.

⁴²Mi tinin an fâka an khop senga.

⁴³Bai le nga an fâk mihlia kha khamphulu sômhleihni an la hrût insipa.

⁴⁴A ivâihai kha pasal ulian ringot khom sângringa an ni.

⁴⁵Khan, mipuihai an chîntir laiin varâl tianga Bethsaida khuaa a matona lei fe hrangin ama ngêtin a irchutirhai irkuanga an chuangtirhaia.

⁴⁶Mipuihai kha an thahai zoiin chu chongchai hrangin tânga a fe tâka.

⁴⁷Khohloi a hong ni’n chu, irkuang kha dîl laia a om tâka, ama kha a bingin muanga a oma.

⁴⁸Phâivua’n a ni nona tiang a nam tâk sika khan lunginzîng taka irkuang an ivailâi chu a hmua; kôlirsal tônin dîl chunga khan anni tiang a honga, pialhai a tuma.

⁴⁹Khan, anni khan dîl chunga a ife an hmu’n chu mithi irtha an sôna, an khêk mur mura.

⁵⁰Ama an hmua an rêngin irtha tâk rakin an oma. Voikhat rengin Jisua’n an kuang, “Lungirngam takin om roi! Keima kêng ki ni, chi no roi,” a ti pehaia.

⁵¹Khanchu, an kuang irkuanga khan a chuang saa, phâivua kha a’rngam ta. Irchutirhai chu an irngai ar khêl tak taka,

⁵²an milung ngar sika sângringa a ivâina thu omzia diktak kha an inhriat thei no sikin.

⁵³Khan, varâl an kâiin chu Genesaret ram an tunga, khatak khan an irkuang an khita.

⁵⁴Irkuang ata an chum le chu Jisua a nih ti mihaiin an inhriat zôi ta.

⁵⁵Kha ram pumpuia mihai an hong intân sup supa, a omna an inhriatna rikipa, a kuang damloihai an puantha pumin an hong irzôna.

⁵⁶Kho hmuna khom khuaa mani, khopuia mani, loia mani, Jisua fena rikipa chu bazara khom damloihai an hong tuanga, a puan hmor lua tôn thei hranga phalna an zonga; khaang khan a tôn murdi chu an dam thiai a ni.