Read Hrangkhol MARKA 8 Bible Online

MARKA 8 - Hrangkhol bible

MARKA 8

¹Kha zoro lai khan mipui tamtak an hong irbûm nôka, ite fa hrang an nei no sikin, Jisua’n a irchutirhai kha a koihaia, an kuang,

²“Mipuihai hi ki kuang sûn thum bang an om tâka, ite fa hrang an nei ta no sikin lungkham an om bâka.

³Phîngchâma in tiang kin fetirhai lakin lam laia châmsôl irveina an ta, senkhat len vâng chu an hongna a sân a hla pehai sikin,” a tia.

⁴A irchutirhaiin “Tu mo hi ramchâra hin hiang dôra mipuihai infâna hrang bai hmu thei hrang?” tiin an sâma.

⁵Jisua’n, “Bai idôr mo nin inei?” tiin ar donhaia. “Sari,” tiin an sâma.

⁶Khanchu, mipuihai kha irnênga toi hrangin thu a pêka, kha hnung chu bai sari chu a lâka lômthu a hril zoiin, a khoia; mipuihai laia sem hrangin a irchutirhai kuang a pêka, an sem tâka.

⁷Nga tômte an nei saa kha khom kha satvurna a hril zoiin an semtirhaia.

⁸Mi tinin an khop dôr dôrin an fâka, an fâk mihlia a’rnôi chu khamphulu sari an hrût insipa.

⁹An rêngin sângminli vêl an ni; kha hnung chu Jisua’n mipui kha an chîntirhai tâka.

¹⁰Jisua chu a irchutirhai leh irkuanga an chuang zôi zela, Dalmanutha ram tiang an fe ta.

¹¹Khan Farisaihai kha Jisua kuang an honga ama an chel theina hrangin an irsêlpuia. Pathianin ama a inham le inhamloi ti inhriat theina hrangin irvân ata irsinsiana irhmuhai hrangin an ngêna.

¹²Khan, Jisua kha a milungin ar hniaka, “Itho sikin mo atûnlaia mihaiin irsinsiana an izong? A dik takin nangni ki hril, atûnlaia mihai kuang irsinsiana rêng rêng pêk ni no ni,” a tia.

¹³Khan, anni kha mâksanin, irkuang chunga chuang nôkin varâl tiang panin a fe tâka.

¹⁴A irchutirhaiin bai chôi hrang an irnghila, irkuanga khan bai tang khat vai ti no chu bai dang rêng rêng nei mahai.

¹⁵Khan, Jisua’n an kuang, “Farisaihai chol le Heroda chol ata irhrung unglân, irdîn roi,” a ti ngita.

¹⁶Anni’n chu, “Bai ei nei viat no sikin hi hi a iti kêng,” tiin an irti irhlôma.

¹⁷Jisua’n an chong kha a len hriatin chu an kuang, “Itho sikin mo bai nin inei loi thu ngot nin ibuaipui? Atûn ten nin la inhriat thei loi ma ni? A’rngailam khom nin la inhriat loi ma ni? Nin milung a ingar hrai ma ni?

¹⁸Mit nei chakin ithoa mo mit boi anga nin iom? Mikuar nei chakin ithoa mo mikuar boi anga nin iom? Nin inhriat ta loi ma ni?

¹⁹Mipui sângringa, bai ringa ki khoi lai khan an ifâk mihlia a’rnôi kha khamphulu iza mo nin ihrût insip kha?” tiin a’rdonhaia. Anni’n “Sômhleihni,” tiin an sâma.

²⁰Khan, “Sângminli, bai sari ki khoi laia khan a’rnôi kha khamphulu i za mo nin ihrût insip kha?” a tia. Khan anni’n, “Khamphulu sari,” tiin an sâma.

²¹Khanchu Jisua’n an kuang, “Atûn ten khom a’rngaina lam nin la inhriat loi mo?” a tia.

²²Khan, Betsaida khua an hong tungin chu, mipui senkhatin Jisua kuang mitcho inkhat an hruaia, khapa kha tôn hrangin an ngêna.

²³Khan Jisua’n mitcho kut kha chelin kho pên tiang a fepuia; a mit an chil pe zoiin chu a chunga kut a’rnghata, a kuang, “Ni hmu thei ta mo?” tiin ar dona.

²⁴Khan a’rhei vêla, “O mihriam ki hmua, thingkung fe dêtdût angin ki hmu,” a tia.

²⁵Khan Jisua’n khapa mita khan a kut a’rnghat nôka. Kha zoroa khan kha mitchopa khan a en ngita, a mit a hong vâr nôka, itinrêng fel takin a hmu thei ta.

²⁶Khan Jisua’n, “Kho sûnga lût ta no roh,” tiin a in tiang an fetir ta.

²⁷Khan, Jisua le a irchutirhai kha an fe suaka, Filipa Kaisari ram khuahai kha an irfanga; khan an fe pumin a irchutirhai kuang, “Mihaiin keima hi tu mo ki ni, an ni ti ngai?” tiin ar donhaia.

²⁸Khan anni’n chu, “Baptistu Johana,” nang an tia; senkhatin chu, “Deipu Elija, senkhatin tiana deipuhai laia inkhat khôk nih a ti, nang an ti ngai” tiin an sâma.

²⁹Khan Jisua’n an kuang, “Khante, nangni’n te tu mo nin ni ti?” tiin ar donhaia, Petera’n a kuang, “Krista” tiin a sâma.

³⁰Kha hnung chu a thurchi kha tûte hril viat loi hrangin a khaphai khaka.

³¹Khan, a irchutirhai kuang, “Mihriam Nâipa’n intakna tamtak a ituang ngêt hrang thu hai, upahai, Ochai inlalhai le Dân irchutirtuhaiin an ihnôl hrang thu hai, an ithat ngêt hrang thu hai, sûn thum hnunga a ithoinôk ngêt hrang thu hai,” ar chutir irphut tâka.

³²Kha thu kha fel takin an sîr pehaia. Khanchu, Petera’n ama kha a bingin a hruaia a hala.

³³Khannisian, Jisua kha a’rheia, a irchutirhai tiang a ena, “Setan, ki hnunga fe roh. Ni ingaituana hi Pathian ata ni loiin, mihriam ata kêng a ini!” tiin Petera kha a hala.

³⁴Khan, Jisua’n mipuihai le a irchutirhai kha a koihaia; an kuang, “Tukhom a ni zui nuam ka chu mâni irnghilin, a Kros irputin ni zui ri se.

³⁵Tukhom mâni hringna inzôk nuam ka chu inchân a ta, khan tukhom keima leh Thurchi Sa sika a hringna inchân ka chu inzôk a ti.

³⁶Mi’n rammual hi a pumin nei sianlân, a hringna inchân ta sian, a ta hrangin imo a’rfêna?

³⁷Mi’n a hringna hmu nôk hranga a pêk hrang ite a nei no sikin.

³⁸Tukhom atûnlaia mihai, uire hmang le sual takhai laia keima le ki thu inzakpui chu, Mihriam Nâipa hi vântîrtôn irthianghai le a Pa roiinpuina leh a zuang tika chu lan zakpui a ti,” a tia.