Read Hrangkhol MARKA 9 Bible Online

MARKA 9 - Hrangkhol bible

MARKA 9

¹Khan, ama ngêtin a irchutirhai kuang, “A dik takin nangni ki hril, nangni hitaka ngîr senkhathai hi chu Pathian Ram kha a sinthotheina leh a zuang tung an hmu mâka chu thi no nihai,” a tia.

²Khan, sûn ruk zoia chu Jisua’n, Petera, Jakoba le Johana hai, tâng irsâng taka a fe puihai tâka, an makunga a hmêl omzia kha a hong danglam tâka.

³Khanchu, a silkaihai khom rammuala puan irsûkpuhaiin an isôp inchek thei bana chekin a hong irtêk tâka.

⁴Khan Elija le Mosia kha an zuang inlâra, Jisua’n a chongpuihaiin an hmua.

⁵Khanchu, Petera’n Jisua kuang, “Irchutirtu, hitaka om hi ei ta hrangin a sa! Kairêng sin ki ta, nangma hrang inkhat, Mosia hrang inkhat, Elija hrang inkhat,” a tia.

⁶An chi hrai tâk sikin, ti hrang khom a inhriat ta loi a ni.

⁷Khan, sûm zuang zîngin, a’rhlîhaia; sûm ata kha hnuk irhai a zuang suaka, “Ama hi ki Nâipa lungthung tak a ni, a chong irngai roi,” a tia.

⁸Khanchu, inrang takin an en vêla, Jisua ti no chu tukhom hmu ta mahai.

⁹Tâng rengata an zuang chum laiin Jisua’n an kuang, “Mihriam Nâipa mithi lai ata a thoinôk mâka chu nin thil hmuhai kha tûte kuang hril no roi,” tiin a hrilhaia.

¹⁰Khanchu, kha a thupêk kha an zôma, nikhomsian, “Mithi lai ata thoinôkna thu a hril kha i tihna ma ni ta?” tiin an irdon irhlôma.

¹¹Khan anni’n chu Jisua kuang, “Itho sika mo Dân irchutirtuhaiin Elija kha zuang bak a ti an iti ngai?” tiin an irdona.

¹²Khan Jisua’n an kuang, “Thil tinrêng siam infel hrangin Elija kha a izuang masa ngêt hrang a ni, khannisianlân, itho sika mo Pathian Thubu’n Mihriam Nâipa dengtheina tamtak tuangin mi ihnôlin la om a ti, a iti?

¹³Khan, nangni ki hril: Elija chu a zuang tâka, a thurchi an lei irziak ang tâk khan ama chu an nuam ang takin an lei lo tâk,” a tia.

¹⁴Khan a irchutir danghai kuang an zu tungin chu, an kôla mipui tamtakhai le Dân irchutirtuhaiin an lei irsêlpuihai lai tak an zu hmua.

¹⁵Khan mipui murdi’n Jisua kha an hmu’n chu, ar khêl an ti oka, ama tiang an van tâna chubai an va mûka.

¹⁶Jisua’n a irchutirhai kuang, “Annihai leh khan itho mo nin irsêl?” tiin ar donhaia.

¹⁷Mipui laia mi inkhatin a kuang, “Irchutirtu, ki nâipa ramilhli ichel chong theiloi nin dam pe hrangin ki hong ihruai a ni.

¹⁸A puang pe zoro’n chu an rîltir rak ngai, a chilhuan an suaka, a ha a riala, an ngar khak ngai. Inhnotpai pe hrangin ni irchutirhai ki ngêna, khannisianlân thei mahai,” tiin a hrila.

¹⁹Jisua’n an kuang, “Idôra iamna boi mihriam mo nin ini tâk? Idôr ten mo nin kuanga omin nangni ki irngaitua thei hrang? Nâipang kha ki kuang hong hruai roi,” a tia.

²⁰Khanchu, a kuang an hong hruaia, ramilhli khan Jisua a hmu’n chu nâipangtepa kha a sân deng an theitira; hnuaia a chinginrîla, a chilhuan suakin a hong inhlum a va inhluma.

²¹Khan Jisua’n a pa kha ar dona, “Hianga a om phutna hi itiklai ata ma ni?” a tia. “Nâipangte a ni lai ata kêng,” tiin a sâma.

²²Ramilhli’n voi iza meia le tuia namthâkin that hrang a tuma, khasikin, nangin ni thei paiin chu lung nin khamin lân, ni san roh, tiin a ngêna.

²³Jisua’n a kuang, “Ni theiin chu, mo ni iti! A iamhai ta hrangin chu itinrêng hi tho thei a ni, ti hi ni inhriat loi ma ni?” a tia.

²⁴Khanchu nâipangte pa kha khêkin, “Ki iam, ki iam thei ualna hrangin ni san roh,” a tia.

²⁵Khan, Jisua’n mipui hong intân irbukkhôm kha a hmu’n, ramilhli kha a hala, a kuang, “Nang ramilhli chongtheiloi le kuarsêt, thu nang ki pêk nâipangtepa sûng rengata kha hong suakin lân, lût nôk ta no roh,” a tia.

²⁶Khan a khêk suaka, deng an theitir bit hnungin a hong suak tâka, nâipangtepa kha thi ang dôrin a oma, mi tamtakin chu, “A thi tâk kêng,” an tia.

²⁷Khannisianlân, Jisua’n a kuta a chela, a kaithoia, khanchu a hong thoi tâka.

²⁸Khan Jisua ina a va lûtin, chu a irchutirhaiin a kuang, “I sika mo keini’n te kin inhnot suak thei loi?” tiin inrûkin an irdona.

²⁹Jisua’n, “Hiang hi chu chongchaina le bu ngheina ti no’n chu, insuak thei ni mah,” a tia.

³⁰Jisua le a irchutirhai kha Galili hro’n an fe suaka, a omna kha tûte inhriat nuam maka.

³¹A irchutirhai kha a hrila, an kuang, “Mihriam Nâipa hi mihriamhai kuta incheltirin om a ta, that an ti; khan an that hnung sûn thum tena thoi nôk a ti,” a tia.

³²Khannisianlân a thu insîrhai kha a omzia inhre thei mahai, ar don lak ngam mahai.

³³Khan, Kapernaum an hong tunga, in sûnga an lût tena chu, Jisua’n a irchutirhai kuang, “Lampuia khan i thu mo nin insîr irhlôm kha?” tiin a’rdonhaia.

³⁴Lampuia khan tu mo ei laia hin a lian tak hrang, ti thu an insîr irhlôm sikin an dâihreka.

³⁵Khanchu Jisua kha a toia, a irchutir sômhleihnihai kha a koia, an kuang, “Tukhom a maton tak ni nuam chu, a hnungkhôn taka an iom hrang a ni, mi tin sinthotua om bak a ti,” a tia.

³⁶Khan, Jisua’n nâipangte a kaia, an laia an ngîrtira, inkua pumin an kuang,

³⁷“Tukhom ki’rhming sika hianga nâipangte inkhat khom lôm ka chu keima ni lôm ni an ti; tukhom keima ni lôm chu, a ni tîrpu lôm khom an ni sa,” a tia.

³⁸Johana’n a kuang, “Irchutirtu, mi inkhat nir hminga ramilhli inhnot suak kin hmua, kin chanpui a ni no sikin kin hong khap,” a tia.

³⁹Jisua’n, “Khap ta no roi, tukhom ki’rhminga sinirkhêl thoa, a ni hril insiat thei om mahai.

⁴⁰Tukhom a ni doi loitu chu ei tianga kop a ni.

⁴¹Tukhom Krista mi nin ni sika, tui khilât khat in hranga nangni pêkpuhai ka chu, a diktakin nangni ki hril, kha mi khan a lômman hmu ngêt a ti.

⁴²“Tukhom, hi a ni iampu chîntehai laia inkhat khom intûktir ka chu, an ringa bu nôina lung liantak inhlitirin tuikhangliana inthahai sian, a ta hrangin sa ual a ti.

⁴³Khan, ni kutin nang an tûktirin chu, tan zôi ro! kut kianghni neia hremhmuna fe nêkin chu kut bûia hringnaa fe ni ta hrangin a sa ual.

⁴⁴Kha hmuna khan chu irnge thi ta ngai maka, mei khom ram ngai ma.

⁴⁵Khan ni ke’n nang an tûktirin chu tanpai zôi roh, ke kianghni neia hremhmuna pai nêkin chu, ke bûia hringnaa lût ni ta hrangin a sa ual.

⁴⁶Kha hmuna khan chu irnge thi thei ngai maka, mei khom thi ta ngai mah.

⁴⁷Khan, ni mit inkhatin nang an tûktirin chu kêlsuak roh! Mit kiangkhat neia Pathian Rama lût, ni ta hrangin a sa ual: mit kianghni neia hremhmuna pai nêkin chu,

⁴⁸Kha hmuna khan chu an irnge thi ta ngai maka, mei khom ram ngai ma.

⁴⁹“Irbôlna michi al leh an irthâr ngai angin mi tinrêng meiin irthâr la nih an ti.

⁵⁰Michi hi a sa; khannisianlân, a dong hnungin te i leh mo nin in-al nôk hrang? Nangni ngeia michi nei unglân, irngei irhlôm roi,” a tia.