Read Hrangkhol LUKA 11 Bible Online

LUKA 11 - Hrangkhol bible

LUKA 11

¹Voikhat chu hmun inkhata a chongchaia. A hong mongin chu a irchutirhai laia inkhatin a kuang, “Rengpa, Johana’n a irchutirhai chongchai dân a irchutir angin keini khom nir chutir roh,” an tia.

²An kuang, “Nin chongchaiin hiang hin ti roi: ‘Kin pa, Ni’rhming mahrip om ri se, Ni Ram zuang tung ri se.

³A ni tin kin rukin bu ni pe roh.

⁴Keini khomin kin chunga tho’nsual murdi kin ngaidam ngai angin, Nang khomin kin sualhai ni ngaidam roh, Thêmnaa ni hruai lût no roh,’ ti hi,” a tia.

⁵Jisua’n a irchutirhai kuang, “Nin laia mi inkhatin rual nei sianlân, zânlaia a kuang va fe’n, ‘Mala, bai tiam nin pûktir ta’:

⁶Ki rual inzinin a ni hro lika, ite infatir hrang lak nei ma unga,” va ti sianlân;

⁷in sûnga a rualpa’n, ‘Ni hong inbuai ta no roh, mikot kin kal zit ta, ki nâihai leh kin izâl tâk kêng, thoiin nang inhong pe thei no ning,’ ti sianlân;

⁸Nangni ki hril, a rual a ni sikin thoiin va pe no khom sian, a zong ngot ngot sikin thoiin a nuam dôr pe a ti.

⁹“Khanchu, nangni ki hril, nghi unglân, pêk ni nin ti; zong unglân hmu nin ti, into unglân inhong pe ni nin ti.

¹⁰A nghi murdi chu pêk ni an ta, a zong murdi’n hmu an ta, an tôk murdi chu mikot inhong pe ni an ti.

¹¹Nangni laia pahai hin, nin nâipahaiin nga nangni nghi sianlân, nga irthûla tu mo mirûl pe hrang?

¹²Ârtui irthûlin khom tu’n mo âinuvêt pe hrang?

¹³Khasikin, nangni mi sualhai luan nin nâihai thil sa pêkna châng nin inhriatin te nin pa irvâna mi khan a nghituhai kha Irtha Irthiang a ipêk hrang mo ni mah!” a tia.

¹⁴Khan, Jisua’n ramilhli chong theiloi inkhat an hnot suaka, a suak le chu chong theiloi kha a hong chong tâka. Mipui khan ar khêl an tia.

¹⁵Khan, mi senkhatin chu, “Ramilhli rêng Belzebula a ni sikin, ramilhlihai a inhnot suak thei a ni,” an tia.

¹⁶Senkhatin ama fiana hrangin irvân ata irsinsiana sinirkhêl inentir an inphûta.

¹⁷Jisua’n an milung inchong an hriata, an kuang, “Kho ram khom irsena, mâni le mâni irdoi ka chu ram chit an ti, in sûngkua khom mâni le mâni irdoi ka chu irhmang an ti.

¹⁸Setana khom mâni le mâni an irdoiin te, itin mo a ram kha a inding thei hrang? Belzebula sikin ramilhlihai inhnot suak nin ni ibe, a ti pehaia.

¹⁹Keiin Belzebula sikin inhnot suak ni inlân, nin mihai khan tu sikin mo ramilhli an lei inhnot suak ngai? Khanchu, anni kêng thiamno nangni inchangtir ual hrang.

²⁰Khan, Pathian irchama ramilhlihai ki inhnot suak ngai a niin chu, Pathian Ram nin kuang a zuang itung tak tak a ni.

²¹Mi hrâtin hriamhrei irkipin a hrung kâr ka chu, neinun murdi kha zômin a om ngai.

²²Aniachu, ama nêka hrât ualin a hong beia, a hong inhne’n chu, a isong râlthuam kha sutpai a ta, a neinun khom lapai pe a ta, a nu nuamin sempai a ti.

²³Tukhom, ki tianga kop loi ka chu a ni doi a ni, tukhom ni bûmpui no ka chu a inthek indarh a ni.

²⁴“Ramilhli kha, mi sûng ata a suakin chu, irngam hmun zongin tui om loina hmunhaia a’rvâk a’rvâka; khannisian a hmu no sikin, ‘Ki in, ki isuaksan tâknaa khan, kîr nôk chian ki ti,’ a tia.

²⁵A hong kîr nôkin chu, phît fâia infel diamin a hmua.

²⁶Khanchu, a fea, ama nêka sual ramilhli dang sari a hong hruai lûta, kha khan omhmun an khuar tâka; kha mihriam om dân kha chu matona nêkin a hong siat ual ta a ni,” a tia.

²⁷Jisua’n kha thu kha an sîr laiin mipui laia nupangnu a khêka, a kuang, “Nupang nang vongtunu le nang donsuinu chu a vân a sa e,” a tia.

²⁸Jisua’n a sâma, “Pathian thu inhriata zômhai chu an vân a sa ual,” a ti pea.

²⁹Khan, mipui an hong pungkhôm mura, Jisua’n, “Atûnlaia mihai hi a sân an sual; irsinsiana sinirkhêl an zonga, Jona irsinsiana ti no chu irsinsiana sinirkhêl zel inentir ni no nihai.

³⁰Ninevi kho mihai hranga deipu Jona irsinsiana a ini ang khan, atûnlaia mihai hrangin chu Mihriam Nâipa hi irsinsiana ni a ti.

³¹Roirêl Nia chu sim tianga rêngnu Seba la ngîr a ta, atûnlaia mihai thiamno inchang a ti. Reng Solomona vâr irngai hrang pialin ram hla tak ata a hong sikin. Nangni ki hril Solomona nêka lian ual hin a om.

³²“Roirêl Nia chu Ninevi mihai khom hong ngîr an ta, thiamno nangni inchang an ti. Jona thuhril sikin an sualna ata an irleta; irngai roi, nangni ki hril, Jona nêka roiinpui ual hin a om,” a tia.

³³Tûte’n meiser inchokin, hmun irthupa se ngai mahaia, khamphulu khom irkhu ngai mahai, a siana hmuna kêng an sia ngai, mi a lût murdi’n a vâr an hmu theina hrangin.

³⁴Ni mit hi ni takpum ta hrangin meiser ang a ni; ni mit a dikin chu ni takpumpui kha invâr zit a ti; a dik no’n chu ni pumpui inthim khak a ti.

³⁵Irdîn roh, nangmaa vâr om kha inthim ni lik ni.

³⁶Khanchu, meiser, nangni a i-êl invâr hlang ngai ang khan, nin takpum ôn inthimna boi zitin, nin pumpuiin vâr hlang a ti.

³⁷Khan, Jisua’n an sîr lai khan Farisai inkhatin bu nêk a koia; a fea, bu nêk hrangin a toia.

³⁸Farisai khan, kut irsu loia, Jisua’n khalai a i-ot kha a hmu’n chu ar ngai ar khêl oka.

³⁹Khan, Rengpa’n a kuang, “Nangni Farisaihai, khilât le khêng a pên tiang nin infâia, khan, nin sûng tiang chu huatirhamna le sualna’n a sip a ni.

⁴⁰Nin invêt bâka! pên tiang siamtu, Pathianin a sûng tiang khom a isiam mo ni ma?

⁴¹Ni khilât le khêng sûnga thil om kha mi’nrianghai pe unglân chu nin ta hrangin itinrêng a irthiang mai hrang a ni.

⁴²“Nangni, Farisaihai nangni lan tak pe a ti na! lêngmiser, podina le chîmu tinrênghai sôma inkhat Pathian nin pêk ngai, khannisianlân, dikna le Pathian lungthungna chu nin irngaiinnêp ngai; khahai kha kêng nin itho ngêt ngêt hrang chu, a danghai khom khi mâk ual loiin.

⁴³Nangni Farisaihaio, nangni lan tak pe ti, Sinagoka toina satakhai le dukanhaia chubai mûk nin irngaiinhlu ngaia.

⁴⁴Nangni lan tak pe ti, mi’n thân ti inhre loia a chunga mi an ifena ngai ang hi nin ni e,” a tia.

⁴⁵Dân irchutirtuhai laia inkhat khan, “Irchutirtu, hi thu ni insîr hin keini khom ni ni dem sa a ni,” tiin a sâma.

⁴⁶Jisua’n, “Dân irchutirtuhaio, nangni khom nangni an tak pe; mi chunga pêl intak, puakrik nin bânga, a pêlpui hrangin chu nin kuthmor luan tôn nuam mak chêi.

⁴⁷Nangni an tak pe vang na! Nin irchibulhai ithat deipuhai thân nin siam insata.

⁴⁸Nin irchibulhaiin deipuhai an lei that kha, nin inhampui inlangna’n, nangni’n an thânhai nin siaminsata.

⁴⁹Khasikin, Pathian vârna’n, ‘Deipuhai le tirtônhai tîr ki ta, senkhathai that an ta, senkhathai dengintheitir an ti,’ a tia.

⁵⁰Khasikin, rammual irsiang ata deipuhai an lei that sikin, atûnlaia mihai hi denginthei ni an ti.

⁵¹Abela an that ata Zakaria dênin, ama len vâng chu maichâm le hmun irthiang kâra that a ni. Nangni ki ti, khahai sik piala khan atûnlaia mihai chunga phuba lâk ni an ti.

⁵²Dân irchutirtuhai khom nangni an tak pe vang na! vârna châbi nin chôipaia, nangni lak lût no chin ni, a lût nuamhai tena nin khâl ngai”, a tia.

⁵³Khan Jisua’n kha hmun kha a mâkin chu, Dân irchutirtuhai le Farisaihaiin an sêla, thil tamtak an irdona.

⁵⁴A sâm insual a nei le an chel theina hrangin an enirchika.