Read Hrangkhol LUKA 12 Bible Online

LUKA 12 - Hrangkhol bible

LUKA 12

¹Mipui sâng tamtak irsirpol bet but ang dôr an pungkhôma, Jisua’n a maton taka, a irchutirhai kuang, “Farisaihai chol vârirletna ata irdîn roi.

²Ite thupsua thei ni mah, an lang nôk zel ngai, ite inhriat loi hranga ip om mah, inhriat suak a ni nôk ngai.

³Zân inthima nin itihai kha sûn khovâra lan puang an ta, chontan sûnga inrûka nin iti kha in chunga chuangin tâng lan sampui an ti, a ti pehaia.

⁴“Ki rualhaio, nangni ki hril, takpum thata, kha zoia ite tho thei ta loi chu chi no roi.

⁵Tu mo chi rua, nangni hril ki ti; takpum thata, thi zoi hnunga hremhmuna pai theina thuneitu, Pathian vai kha chi roi; a ni, nangni hril nôk ki ti, Ama vai kha chi roi.

⁶Chongzong ringa poisa hni’n an izuar ngai mo ni ma? Pathianin chu an laia inkhat te lua irhmâi ngai ma. Nin samzâihai ten khom a itep zit kêng.

⁷Chi no roi, chongzong tamtak nêkin nin hlu ual.

⁸“Nangni ki hril, mihai makunga ni thop ka chu Pathian vântîrtônhai makunga Mihriam Nâipa hin thop a ti.

⁹Khannisianlân, mihai makunga ni hnôl ka chu Mihriam Nâipa khomin Pathian vântîrtônhai makunga hnôl a ti.

¹⁰Tukhom Mihriam Nâipa sêl chu ngaidam nih a ta; khannisianlân, Irtha Irthiang sêl ka chu ngaidam ni no ni.

¹¹“Khan, nin roirêl hrangin, Sinagoka mani, Ramoptu makunga mani, roirêltuhai makunga mani, nangni an hruai tikin, itin mo ki isâm hrang, imo ki iti hrang, tiin milung inkâng no roi.

¹²Nin iti hrang chu a zoro taka Irtha Irthiangin nangni hril a ti,” a tia.

¹³Mipui laia mi inkhatin Jisua kuang, “Irchutirtu, ka upa kuang kin pa irchon mâk ni sem sa hrangin ti pe roh,” a tia.

¹⁴Jisua’n a sâma, “Mihriam, nangni ta hrangin tu mo roirêltua le irchon sempua ni siam?” a tia.

¹⁵Khan an kuang, “Irdîn unglân, irzukna tinrêng ata irdîn roi, mihriam hringna bi hi irchon lâmkhîl sika ni mah,” a ti pehaia.

¹⁶Khan, hi chongirkhek hi an sîra, “Mi irchong tak inkhat hi a loia a sân an lâpa.

¹⁷Khanchu, ar ngaituaa, ‘Itin mo ki itho hrang tâk? ki bu le bâl siana hrang nei zoi ta ma unga,’ a tia.

¹⁸‘Hiang hin tho ki ti; ki fasiar set ki ta, a nêka lian ual sin ki ta, kha khan ki bu le bâl, ki neinun murdi sia ki ti,’ a tia.

¹⁹Khanchu, ki’rtha kuang, “Irtha, kum tamtak hrangin sum tamtak ni buk ta; irngamin lân, fa’n lân, inin lân lungthi takin om ro, irti ki ti,” a tia.

²⁰Khan, Pathianin a kuang, ‘Mi’nvêt, a vuan zân zel hin ni hringna a iboi hrang tâk kêng, hi thil ni isuahai hi tu ta hrang mo a ini tâk?’ a ti pea.

²¹Khan, Jisua’n, “Pathian tiang irchon buk loia, mâni ta hrang vaia irchon buk chu khaang khan nih an ti,” a tia.

²²Jisua’n a irchutirhai kuang, “Khasikin, nangni ki hril nin takpum fâk nêk hrang, nin sil le kai hrang lunginkâng no roi.

²³Fâk nêk hrang nêkin hringna a hlu ual, silkai hrang nêkin takpum a hlu ual.

²⁴Vaâkhai hi en u ta, bu khom tû mahai; khannisianlân, Pathianin an fahai ngai; nangni chu vahai nêkin chu nin ihlu ual kêng.

²⁵Nangni laia lunginkâng sikin tu mo mâni hringna inseitir ual thei?

²⁶Hi dôr lua nin itho thei loi khate, imo a da dang len vâng khate nin lunginkânga?

²⁷Tûktin pârhai hi en u ta, sin khom zong mahai, puan khom không mahai, khan, nangni ki hril, kha dôra irchong Solomona khom khan hi pârhai hi pha mah.

²⁸Khanchu, ram hloisûl, a vuana hring, nangtûka meia tuah nôk hrang lua Pathianin khaang dôra a’rvôtirin te, o nangni iamna tômhaio, khahai nêkin nangni irvôtir no ni mo!

²⁹Khasikin, nin fâk nin nêk hrang thua lunginkâng no roi.

³⁰Hi hi rammual mi murdi’n an ibuaipui tak ngai a ni; nangni khomin nin innang ngai ti, nin Pa’n an hriat;

³¹Ama Ram kha zong bak unglân, khanchu, hihai khom hi nangni a ipek belsa hrang a ni.

³²Pôl tômtehaio, chi no roi, Ram nangni pêk hi nin pa nuamlam tak a ni.

³³“Nin inei murdi zuar unglân, inrianghai pe roi, irvâna inru fe loinaa, irthî ifâk thei loinaa khan, sum kok phâi thei loihai, sum hek theiloihai irsiam roi.

³⁴Nin irchon omna kipa nin lungrîl khom a om ngai.

³⁵“Irthok sai diamin, meiser bel sai leh irsiam mai roi.

³⁶Siahlo, an pu irnei hruaithe ata zuang hrang lei nghâk chianhai angin. A zuanga mikot a hong intôk le, inhong zôi hrangin.

³⁷Siahlo, an pu zuanga irtûng chiana om a ihmuhai chu, mi vânnei an ni. Nangni ki hril, ama kha irsiam a ta, khalâi dohai a ta, an bu nêk donhai a ti.

³⁸“Zân chimripa, âr khuanchunga mo, a zuanga irtûng chiana om a ihmuhai chu mi vânnei an ni.

³⁹Hi hi nin inhriat, inru hong hrang inneitu’n inhre sianlân chu hrung a ta, a in inset no ni.

⁴⁰Khasikin, nangni khom irtûng chianin om roi, nin tûng no lai takin Mihriam Nâipa zuang a ti,” a tia.

⁴¹Petera’n, “Rengpa, hi chongirkhek hi keini vai mo ni ni ihril mi murdi mo?” a tia.

⁴²Rengpa’n, “An pu’n a siahlohai hruaitua le an bu sem tika sem ngaitu hrangin sum enkoltu iamom tak le vâr tak a inkung hrang kha tu mo a ini hrang?

⁴³A pu a honga, khaanga lei tho siahlo a ihmu chu mi vânnei a ni.

⁴⁴A dik takin nang ki hril, a inei chunga hruaitua hong siam a ti.

⁴⁵Khannisian siahlo khan, ‘Ka pu hong kîr lat no ni,’ tiin nupang pasal zêm sianlân, lei fâk lei nêkin len rui sianlân,

⁴⁶Kha siahlo pu kha ar tûng no kârin, a iam no nikhuaa a pu zuang a ta, tukkhoi a ta, mi iamloihai dongtum indong a ti.

⁴⁷Siahlo, an pu nuamlam inhre chiana tho loi le irtûng loi chu a sate’n zêm ni an ti.

⁴⁸Aniachu, inhre loi sika hremna dôr thil tho chu nêp uala zêm nih an ti. Tukhom tamtak indongtira omhai chu tamtak ingên ni an ti.

⁴⁹“Irnêng hâl hranga zuang ki ni, atûn khom kâng zôi ta sian ki ti!

⁵⁰Baptisma ki ichang hrang a om, kha kha ki tho mâka chu ki ning ar hal vang na!

⁵¹Irnênga irngei inlêng hranga zuang ni ma ung, irsenna inlêng hranga zuang kêng ki ini.

⁵²Atûna irthokin in sûng khata mi ringa irsen an ta, inthumin, inhni doi an ta, inhniin inthumhai doi an ti.

⁵³Pa’n a nâipa doi a ta, nâipa’n a pa; nu’n a nâinu doi a ta, nâinu’n a nu; a tarpiin a moinu doi a ti, moinu’n a tarpi doi a ti,” a tia.

⁵⁴Jisua’n mipuihai kuang khan, “Misa tâk tiang sûm a hong zîngin chu rua a itho hrang kêng nin tia, a tho khom a tho ngai.

⁵⁵Khan sim tiang phâivua a hong tho nin inhriatin chu, a ilum hrang kêng nin tia, lum khom a lum ngai.

⁵⁶Vârirlethaio! Irnêng irvân nin ena, kho om hrang lam nin inhriata, khannisianlân, atûnlai zoro om lam hi itho mo nin inhriat theiloi?” a tia.

⁵⁷“A dik le dikloi kha ithoa mo nangni khomin nin itheithâk mai loi?

⁵⁸Thuneitu makunga ni irdoipui leh nin inlang hrangin, fe pumin ama leh irngeina lam zong roh; khano’nchu, roirêltu makunga nang hruai inlût a ta, Roirêltu’n pulis kuang nang inhlan a ta, pulis khan intângna ina nang khum a ti.

⁵⁹Nang ki hril, poisa khatte khom ni thâk irkip mâka chu, khatak ata kha suak viat no chi ni,” a tia.