Read Hrangkhol LUKA 16 Bible Online

LUKA 16 - Hrangkhol bible

LUKA 16

¹Khan, a irchutirhai kuang khan, “Mi irchong inkhatin sum enkoltu a neia, kha mi khan a sum a hmang inchêk mai mai a ni ti’n a kuang an va dema.

²Khanchu ama kha a koia, ‘Ni chungchâng thu ki inhriat hi itin lama mo? Ni sum enkol irziakna bu kha hong chôi roh sum enkoltua kop thei no chi ni,’ a ti pea.

³Kha sum enkoltu khan a lungrîlin, ‘Ka pu’n sum enkoltu ki nina a ni inmâktir hrang ni a ti, itin mo tho ta ning? Irnêng tuk lak hrât ma unga, kut do lak kin zaka, a tia.

⁴Sum enkoltu a nin mâktir tika mihaiin an ina an ni inomtir theina hrang lam kin hriat ta,’ a tia.

⁵Khanchu, a pu lâkai intângtuhai kha inkhat khatin a koihaia, a maton tak kuang khan, ‘Ka pu kuang i dôr mo ni intâng?’ a tia. Ama khan ‘Sahriak tîn irzakhat,’ a tia.

⁶Ama khan, ‘Ni’rziakna lekha hi lan lân, toiin lân, sômringa ti irziak roh,’ a tia.

⁷Mi dang kuang, ‘Nang te i dôr mo ni intâng kha?’ a tia. Ama khan, ‘Bu tîn sângkhat,’ a tia. Ama khan, ‘Ni irziakna lekha hi lan lân, tîn sômriat ti irziak roh,’ a tia.

⁸A pu khan sum enkoltu sual vâr thiamzia kha an pâk tâka, vâr nâihai nêkin atûnlai mihai hi rammual thila chu an vâr ual a ni,” a tia.

⁹Jisua’n, “Nangni ki hril, rammual irchonin rual siam unglân; irchon a hek tika kumtuang rama lôm lût ni thei nin ti.

¹⁰Tômte chunga iamom chu tamtak chunga khom iam a om ngai.

¹¹Rammual irchon chunga lua nin iamom no’n te tu mo irchon tak tak kha nangni inkoltir ngam hrang?

¹²Mi dang ta chunga lua iamom loiin teh nin ta hrang ngei khom tu mo nangni pêk hrang?

¹³Siahlo tukhomin hruaitu inhni sin tho irkop thei ni no ni, inkhat hnôl ni a ta, inkhat pom ni a ta, a ninole inkhat kha irngaiinnat a ta, inkhat hmusit a ti. Pathian Sin le sum sin tho irkop thei no chin ni,” a tia.

¹⁴Farisai, sum irngai inhluttuhaiin kha thu kha an inhriatin, Jisua kha an innuisana.

¹⁵Jisua’n an kuang, “Mi mit hmu’n mi fel anga inlang mai mai nin ni; khannisian, Pathianin nin lung sûng an hriata. Mihriamhai irngaisâng hi Pathian mit hmu’n intirom a ni.

¹⁶Baptistu Johana a hong mâka chu, Mosia Dân le deipuhai lekhabu thuhai kha hmang hrang a nia; kha rengata chu Pathian Ram Thurchi Sa hril a nia, mi tinin lût tumin an inbo sup sup a ni.

¹⁷Khannisianlân, Dân thu inkhat chînte boi nêkin chu irnêng le irvân boi hi ol ual a ti.

¹⁸“Dôngma mâka, mi dang nei ka chu an iuire a ni, mi dôngma mâk tâk nei khom an iuire a ni.

¹⁹“Mi irchongpa inkhat a oma, puan man tamhai silin a nitin a hoihôka lêngin a om ngai.

²⁰A mikot kôla khan mi inriang tak inkhat, ar hming Lazara, pân ituam zuak, an zâltir ngaia;

²¹Irchongpa maichâm ata a ifâk irnôi tâkhai kha fâk hrang arzuka, uihai lakin a pân an hong inliak ngaia.

²²Mi inriang kha a thia, Abrahama kôla toi hrangin vântîrtônhaiin an fepui tâka. Mi irchongpa khom a thia, an phûma.

²³Mithi khuaa intak tak a tuanga; a hong tanga; hla taka om Lazara, Abrahama kôla toi a hong hmua.

²⁴Khan, a hong sâma, ‘Ka pa Abrahama, lung nin khamin lân, Lazara kha a kut pâr hmor tuia inchie sianlân, ki milei indâi hrangin zuang tîr ro ba, hi mei choka hin a sân ki na tak tak kêng,’ a tia.

²⁵“Abrahama’n chu, ‘Ki nâipa, nangin ni dam laiin thil sa inzen ni donga, khaang dênin Lazara’n thil saloi inzen a idong kha inhre mai ro ba; atûn chu ama chu irtharngam takin hi hin a om ta, nang chu natna tuangin ni iom tâk a ni.

²⁶Khabana, hitak ata nangni kuanga fe tumhai mo, kha tiang ata keini tianga hong tumhai mo, an kâi thei nona hrangin irnêng chat inthûk tak ei kâra a iom kêng,’ a tia.

²⁷“Irchongpa khan, ‘A ninole, ka pa Lazara kha ka pa ina infetir hrangin nang ki ngên.

²⁸Irzirpui pasal ringa ki neia, hi na tuangna hmuna hin hongna an ti, sathnem irngai takin hrilhai ri se,’ a tia.

²⁹Abrahama khan, ‘Ni urênghai hril hrang te, Mosia le deipuhai an nei khate, khahai thu kha irngai ri sehai,’ a tia.

³⁰Ama khan, ‘Ka pa Abrahama, ni make, mithi laia mi ngêt an kuang fe sianlân irlet an ti,’ a tia.

³¹Ama khan, ‘Mosia le deipuhai thu an zôm no’n chu mithi laia mi thoinôk thu khom zôm ual no nihai,’ ” a ti pea.