Read Hrangkhol LUKA 18 Bible Online

LUKA 18 - Hrangkhol bible

LUKA 18

¹Khan, beidong loia chongchai mai mai hrang a nizia chongirkhekin Jisua’n a hrila.

²Khua inkhata hin roirêltu a oma; Pathian khom chi maka, mihriam khom uksak mah.

³Kha khuaa khan meithâi inkhat a oma, kha meithâinu khan, “Ki irdoipui leh kin thubuai ni set infel pe roh,” tiin roirêlpu kuang a hong fe mai ngaia.

⁴Ama khan i dôr ten mani chu lei nuam maka, nakan tena chu a lungrîlin, “Pathian chi loiin mihriam uksak no khom inlân,

⁵hi meithâi hin a sân a nin buaia, infel pe ki ti; khano’nchu, la hong mai a ta, ni lan buai irzêltir ngêt a ti,” a tia.

⁶Rengpa khan an sîr maia, “Roirêltu felloi thu’nsîr chu inhre roi.

⁷Pathianin a mi inthang, sûn zâna ama insamtuhai thu kha Pathianin a iset infel pe lat loi hrang ma ni? A ir-ial hrang ma ni?

⁸Nangni ki hril, zuang set infel pe lat a ti. Khannisian, Mihriam Nâipa hin a zuang tika rammuala iamna nei zuang hmu ni mo?” a tia.

⁹Mânia ki fel irtia, mi danghai hmusit ngaihai kuang Jisua’n chongirkhek thu an sîra.

¹⁰“Mi inhni Tempila chongchai hrangin an fea; inkhat chu Farisai a nia, inkhat chu khâzana irfuangtu a ni.

¹¹Farisai kha a ngîra, hiang hin a chongchaia, ‘O Pathian, kei chu mi dang anga mi huang ngai, iamomloi le uire mi khom ki ni no sikin le hi khâzana irfuangtu ang khom hi ki ni no sikin, lômthu nang ki hril.

¹²Hapta tin bu ki nghei ngaia, ki inei murdi sôma inkhat ki pêk ngai,’ a tia.

¹³“Khâzana irfuangtu chu inhnung tiang a ngîra, irvân tiang khom tang ngam maka, ‘O Pathian, keima mi sual hi lung nin kham roh,’ tiin a rôp ar chûm tâka.

¹⁴“Jisua’n nangni ki hril, a masapu nêkin hi pa hi thiam changin a in tiang a kîr tâka. Tukhom irngaiinhlu murdi’n irhniam an ta, irngaiintôm murdi’n chôiindôm ni an ti,” a tia.

¹⁵Mi senkhat an nâitehai Jisua kuanga, an chunga kut irnghat hrangin an hruaihaia, irchutirhai khan an lei hnôlhaia.

¹⁶Khannisianlân, Jisua’n anni kha a koihaia, “Nâipangtehai kha ki kuang inhongtirhai unglân, hnôlhai no roi; Pathian Ram chu hianga nâipangtehai ta kêng a ni.

¹⁷Thudik nangni ki hril, Pathian Ram chu nâipangte anga lôm loi ka chu tûte a sûnga lût viat no nihai,” a tia.

¹⁸Khan, hruaitu inkhatin a kuang, “Irchutirtu sa, kumtuang hringna ki dong theina hrangin imo ki itho hrang?” tiin ar dona.

¹⁹Jisua’n, “Itho sika mo sa ni ni iti? Tûte sa om mahai, Pathian vai no chu.

²⁰Thupêkhai kha nin hriat khate uire no roh, mi that no roh, inru no roh, milakin mi hnôl no roh, ni nu le ni pa chôiindôm roh,” a tia.

²¹Ama khan, “Khahai murdi chu ki thoibop ata ki zôm ngai,” a tia.

²²Kha kha an hriatin Jisua’n a kuang, “Lam inkhat ni la’rsam; ni inei murdi zuarin lân, inrianghai sem roh, khanchu, irvâna irchon nei ni ti; khan, hongin lân, ni zui roh,” a tia.

²³Kha thu kha a hong inhriatin chu a sân a char a dong tâka irchongpa a ni sikin.

²⁴Jisua’n ama kha a hmu’n, “Irchonghai ta hrangin Pathian Rama lût an tak vang na!

²⁵Pathian Rama mi’rchong lût nêkin chu simphuai mikuara saringsei lût a ol ual,” a tia.

²⁶A lei irngaituhai khan, “Khano’nte, tu mo saninhring ni thei hranga?” an tia.

²⁷Ama khan, “Mihriam itho theiloi hi Pathianin chu a tho thei zit kêng,” a tia.

²⁸Petera khan, “Irngai ta, kin in le loi mâksanin nang kin zui tâka,” a hong tia.

²⁹Jisua’n, “Thudik nangni ki hril, tukhom Pathian Ram sikin a in mani, dôngma mani, urênghai mani, nu le pa mani, nâihai mani mâksan tâk ka kai chu,

³⁰a nêka tam ual, atûna hring sûng le zoro la hong tung hranga kumtuang hringna le ileh hmu ngêt a ti,” a tia.

³¹Sômhleihnihai kha an bingin a hruaihaia, an kuang, “Irngai u ta, Jerusalema ei ife hrang a ni; Mihriam Nâipa chungchâng thu deipuhai hmanga irziak murdi kha tung irkip a ti.

³²Jentailhai kuta pe an ta; anni khan len nuisan an ta, inzakom takin soisak an ta; inchil an ta.

³³Zêm an ta, that an ta; sûn thum ni’n thoinôk a ti,” a tia.

³⁴Khannisianlân, a irchutirhai khan kha thu kha a’rngaina lam chang inhre mahai, anni ta hrangin kha thu kha irthup a ni sikin, imo a ihril khom inhre mahai.

³⁵Khan, Jisua chu Jeriko khua a tung tônin mitcho inkhat hi lampui sîra kut do’n a lei toia.

³⁶“Mipui fe irhai kha imo a ini tâk,” tiin a’rdonhaia.

³⁷“Nazaret Jisua a hong a ni,” an ti pea.

³⁸Khanchu, “Jisua, Davida Nâipa, lung nin kham roh,” tiin a khêk tâka.

³⁹Fe masahai khan an ngoa, dâihrek hrangin an ti khomin a matona nêka inringin, “Davida Nâipa, lung nin kham ro,” tiin a khêk nôk ual uala.

⁴⁰Jisua kha a ngîra, a kuang hong hruai hrangin a tia.

⁴¹A kôl a hong tungin chu, “Imo nang tho pe inlân ni inuam?” a tia. Ama khan, “Rengpa, hmu thei ki nuam,” a tia.

⁴²Khanchu Jisua’n, “Hong hmu thei ta roh, ni iamna hi ni idampui a ni,” a tia.

⁴³Irningloiin a hong hmu thei tâka. Mi murdi’n kha kha an hmu’n chu Pathian an inpâka.