Read Hrangkhol LUKA 20 Bible Online

LUKA 20 - Hrangkhol bible

LUKA 20

¹Sûn khat chu Jisua’n Tempila mihai Thurchi Sa hrilin ar chutir laiin, Ochai inlalhai, Dân irchutirtuhai le upahai a kuang an honga.

²“I irchamneina’n mo hi thil hi ni itho? Tu’n mo thu nang a ipêk nin hril roh,” an hong tia.

³Jisua’n a sâma, “Kei khomin chongbâi khat nangni irdon ki ti;

⁴Johana baptisma kha irvâna om ircham mo a ini, mihriam ircham mo? ni hril roi,” a tia.

⁵An irsêl irhlôma, “Pathian ircham ei ti le, ‘Ithoa mo a thu nin izôm loi’ ni ti a ta;

⁶Mihriam ircham ei ti lakin mipui hin an rêngin lungin ni dêng an ta, Johana kha deipu ni ngêtin an pom sikin,” an tia.

⁷Khanchu, “Kho tianga irchamin mo, hi thil hi a itho inhre ual ma ung,” an tia.

⁸Jisua khom khan, “Kei khomin tu irchamin mo hi thil hi ki itho nangni hril ual no ning,” a tia.

⁹Vântâng mipui kuang Jisua’n hi chongirkhek thu hi a hril tâka, “Mi inkhatin grep irhuan a siama, irhuan enkoltuhai kuang a chuan a’rhlotirhaia, ram danga zoro sôttak a zu irhmanga.

¹⁰A’rhmal zoro’n chu a dongtum la hrangin suak inkhat irhuan enkoltuhai kuang a tîra, Khannisianlân, irhuan enkoltuhai khan an lei zêma, kut rongin an inkîrtira.

¹¹Suak dang a tîr nôka, kha khom kha an lei zêma, inzakom takin an soisaka, kut rong dênin an inkîrtîr nôk tâka.

¹²A voithumnaa a itîr len vâng chu thisen an lei insuaa, irhuan ata an pai suaka.

¹³“Grep irhuan neitupa khan, ‘Itin mo ki itho hrang tâk? ki nâipa inditom tak hi tîr ta ki ta; ama hi chu lei inza an ti duah,’ a tia.

¹⁴Irhuan enkoltuhai khan an lei hmu’n chu, ‘Hi mi hi irhuan luatu hrang chu a ni, tho that ei ta, eini’n ar chon kha ei dongna hrangin,’ an irtia.

¹⁵Grep irhuan ata kha an pai suaka, an that tâka. Khanchu, Jisua’n, “Grep irhuan neitupa khan itin mo lohai ta ni?” a tia.

¹⁶“Hong a ta, irhuan enkoltuhai kha that irhmanghai a ta, irhuan kha mi danghai pe a ti,” a tia. Kha thu kha an inhriatin chu, ‘Kha tenpa bâk kha chu tho tet no ni,’ an tia.

¹⁷Khannisianlân, an nihai kha Jisua’n a ena, “Imo a omzia? ‘In sinpuhaiin lung an inuam loi kha, kha ngêt kha a kila lung poimo tak a hong ni ta,’ ti irziak hi i tihna ma ni?

¹⁸“Tukhom kha lung chunga tûk murdi chu koi irnôi an ta, a idel len vâng chu irnôi indi chit a ti” a tia.

¹⁹Kha lai khan Dân irchutirtuhai le Ochai inlalhai khan, kha chongirkhek thu kha anni demin a insîr ti an inhriat sikin, chel zôi zel an nuama, aniachu vântâng an chihaia.

²⁰Khanchu, zoro’nchum an irdîp chaka. Ramoptu roirêlna le ar chamneinaa an tung theina hrangin a chong insuala chel hrangin enirchiktu senkhat mi dik anga inlang, an tîra.

²¹Kha mihai khan, “Irchutirtu ni thu’nsîr le ni thu irchutir hi a dik ti kin inhriat; tukhom inza bîk nei ual loiin Pathian thu dik tak nir chutir ngai.

²²Kaisara kuang khâzana kin ichôi hrang mo, chôi loi hrang mo? nin hril roh,” tiin an irdona.

²³Khannisianlân, butdi an itho a nih ti an hriata, an kuang,

²⁴“A duli ni hong inentir u ta, tu dûr le tu irhming mo a chuang?” a tia. Anni khan, “Kaisara,” an tia.

²⁵Ama khan, “Khano’nte, Kaisara ta chu Kaisara pe unglân, Pathian ta chu Pathian pe roi ba,” a tia.

²⁶Khanchu vântâng makunga a thu’nsîra chel an itum kha hlo an sam tâka; a isâmna kha a sân ar khêl an tia, an dâihrek ta.

²⁷Sadukaihaiin thoinôkna om mak an tia; an laia senkhat Jisua kuang an honga.

²⁸“Irchutirtu Mosia’n, Tukhom dôngma neia nâi nei loiin thi sianlân, a urêngpa ta hrangin irchi a inei hrang a nih ti a’rziaka.

²⁹Khan, urêng pasal sari an oma, a ulian tak khan dôngma a neia, nâi nei loiin a thia;

³⁰a inhnina khan a lua nôka,

³¹Inthumna khomin; a lua nôka, khaangin sarihai khan an lua senga, nâi nei loiin an thi zita.

³²Kha hnung chu nupang khom kha a thi sa tâka,

³³Khanchu thoinôkna khan kha nu kha tu dôngma tak mo a ini hrang tâk? Urêng sarihai khan dôngma’n an nei senga,” tiin an irdona.

³⁴Rengpa’n an kuang, “Hi rammual mihai hi dôngma pasal an irnei ngaia,

³⁵rammual la hong om hranga thoinôknaa chang hranga inkunghai rêk chu dôngma pasal irnei ta no nihai.

³⁶Thi khom thi nôk thei ta no nihai, vântîrtônhai angin om an ti. Thina ata an thoi nôk tâk sikin Pathian nâihai ni ta an ti.

³⁷Mithi kaithoi thu kha Mosia khomin an langtir khate; chînribuk mei chok thua khan Rengpa kha, ‘Abrahama Pathian, Isaka Pathian, Jakoba Pathian’ tia a insîr kha.

³⁸Ama chu mithihai Pathian ni maka, mi hringhai Pathian a ni ual. Ama ta hrangin chu an ihring zit a ni,” a tia.

³⁹Dân irchutirpu senkhatin, “Irchutirtu, a sân nin sîr indik,” an lei ti saa.

⁴⁰Kha hnung chu, thu dang irdon ngam ta mahai.

⁴¹Jisua’n an kuang, “Krista kha Davida nâipa, itin lama ti mo an ini?

⁴²Inpâkna hla bua Davida ngeiin.

⁴³‘Rengpa khan ki Rengpa kuang ki chang tiang hong toi roh, Ni râlhai ni ke irnghatnaa ki sia mâka chu,’ a tia.

⁴⁴Davida’n ama kha, ‘Rengpa’ a tiin teh, itin mo Mesia kha Davida nâipa a ini thei hrang?” a tia.

⁴⁵Vântâng mipui inhriatin Jisua’n a irchutirhai kuang khan,

⁴⁶“Dân irchutirtuhai ata irdîn roi. Anni khan songkol irfual innghâka chai vêl an uara, bazar hmuna chubai irmûk an irngaisânga, Sinagoka toina langsâr tak le hruaithena hmuna toina satakhai an irngên ngai.

⁴⁷Hi mihai hin meithâi sum fa pe zoia, mi hmu hrangin vai, sôt tak tak chongchai ngaihai hin hremna tuang ual an ti,” a tia.