Read Hrangkhol LUKA 21 Bible Online

LUKA 21 - Hrangkhol bible

LUKA 21

¹Tholôm bôma mi irchonghai tholôm thâk kha Jisua’n a thîr maia,

²meithâi inriang tak inkhatin poisa hni a hong ithâk a hmua.

³Khanchu, “Thudik nangni ki hril, hi meithâi inriang tak hin mi danghai nêkin a thâk intam ual a ni.

⁴Mi danghaiin chu an inei lêta om kha kêng an ithâk ngai, ama hin chu a ineisun a ir-enkolna hranga kha kêng a hong ithâk a ni hi,” a tia.

⁵Khan, irchutir senkhathaiin Tempil, lung satakhai leh an irvôtir le Pathian kuanga an thilpêkhai an insîr laiin, Jisua’n,

⁶“Hi nin thil hmuhai, lung irchuan rêng rêng hi inchim loia hitaka hin om no ni; khaang zoro kha la tung a ti,” a tia.

⁷Anni’n, “Irchutirtu, kha kha itika mo a hong iom hrang?” tiin an irdona.

⁸Ama’n, “Hruai pai nin ni nona hrangin irdîn roi; ki’rhming songin, ‘keima hi ki ni, a zoro tung hrang a ni ta,’ tiin mi tamtak hong suak an ti, an hnung zui no roi.

⁹Irdoi irhai le tehel sika buaina irhai nin inhriatin chi ual no roi, khahai kha tung masa hrang rêng a ni, zoro mongna chu la ni no ni,” a tia.

¹⁰Khan, an kuang, “Nam dang le nam dang irdoi an ta, ram dang le ram dang irdoi sa an ti.

¹¹Hnîngnupui tho a ta, hmun dang danga châm tâk a ta, hrihai pung a ta, irvân ata ichiomhai le siatna irkhêl tak tak hong om a ti.

¹²Khannisianlân, kha thilhai kha a hong tung mân nangni chel an ta, Sinagokhaia hruaiin, intângna ina nangni khum an ti, deng nangni an inthei hrang a ni. Ki’rhming sikin rênghai le roirêltuhai makunga nangni hruai an ti.

¹³Kha kha nin ta hrangin Thurchi Sa hril inchumna zoro la nih a ti.

¹⁴Lei inhre diam roi, itin mo irphilin kin lei isâm hrang, tiin lunginkâng no roi.

¹⁵Nin irdoipuihai murdi’n nangni an sêl thei nona hrangin vârna le mi sâm theina nangni pêk ki ti.

¹⁶Nin nu le nin pahai, nin urênghai, nin sûngsuakhai le nin rualhai dên khomin nangni incheltir an ta, senkhat vâng chu nangni thatpai an ti.

¹⁷Ki’rhming sikin mi tinin nangni hnôl an ti.

¹⁸Khannisianlân, nin samzâi malkhat khom irhmang no ni.

¹⁹Diar ngitin ngîr unglân, khanchu zôk nin ti.

²⁰“Khan, sipaihaiin Jerusalem an irhual nin hmu tika chu a siat hrang anai tah ti inhre roi.

²¹Kha zoro tika chu Judai rama omhai chu tâng ramhaia intânhai sian; khopui sûnga omhai khan suaksan ri sehai, rama omhai chu a sûnga lût no ri sehai.

²²Pathian thubua irziak a hong tung indik theina hrangin, kha nikhuaa chu ‘Phuba lâk nihai,’ ni a ti.

²³Kha ni’n chu, inrâihai le nâite pom laihai kha a sân intak a ti. Hi rammuala hin a sâna intak tung a ta, hi irchihai chunga hin ningmur a hong tung hrang sikin.

²⁴Khandaiin thi an ta, nam tin kuang suaka hruai indarin om an ta, khan, Jentailhai zoro a mong mâka chu Jerusalem hi Jentailhai isirbe ni a ti.

²⁵“Khan, misa haia, tha haia, ârsi haia khin irsinsiana irkhêl tak tak hong om a ta; irnênga khom tuikhanglian irsôn le irhai an inhriatin nam tin thôna lam inhre loiin kamang an ta;

²⁶Irvân sinthotheinahai kha inhnîngtir ni a ta, rammuala thil ichiom hong tung hrang an ngaitua’n ichia irthatâkin chinginrîl an ti.

²⁷Kha zoro tika chu Mihriam Nâipa hi sinthotheina le roiinpuina irkhêl tak leh sûm laia zuang hmu an ti.

²⁸Kha thil kha a zuang tung tikin chu chung tiang enin tang unglân, nin zôkna hrang kha a zuang nâi sikin,” a tia.

²⁹Jisua’n an kuang chongirkhek thu an sîr saa, “Theipui kung le thing danghai khom hi en u ta,

³⁰A hong incher irnoi nin hmu’n, kholum a hong irphut ta, ti nin inhriat ngai.

³¹Khaang takin nangni khomin, khahai murdi zuang tung nin hmu tikin chu, Pathian Ram chu a zuang nâi tah ti inhre mai ngai roi.

³²Thudik nangni ki hril, khahai thil murdi kha a zuang tung mâka chu atûnlaia mihai hi boi irman no nihai.

³³Irnêng le irvân boi a ta, ki thu chu boi viat no ni.

³⁴“Khanchu, nuam le ninga omhai, zu’nrui hai, a nitin om dân ngaituana hai, nin lungrîla a sip nona hrangin irdîn roi.

³⁵Chânga in-ôk angin nangni tongna ti. Irnêng pumpui chunga a zuang itung hrang a ni.

³⁶Kha thil zuang tung hranghai tuang suaka, Mihriam Nâipa makunga nin ngîr theina hrangin itiklai khomin irngaitua’n chongchai roi,” a tia.

³⁷Jisua’n sûna chu Tempila ar chutirhaia, khohloi tiang chu a suaka, Oliv tâng an itia khan a riak ngai.

³⁸Mi murdi khom a thu irngai hrangin zînga Tempila an hong ngai.