Read Hrangkhol LUKA 22 Bible Online

LUKA 22 - Hrangkhol bible

LUKA 22

¹Khan, bai chol koploi Kût, Ferkân Kût an iti kha a hong nâi tâka.

²Ochai inlalhai le Dân irchutirtuhai khan vântâng mipui an chihai sikin inrûka that hrang lam an ngaituaa.

³Sômhleihnihai laia kop sa, Juda, Iskariota an itihtu sûnga Setan a lûta.

⁴Khanchu, a va fea, Ochai inlalhai le ulian hruaituhaiin an ichel hrang lam a van sîrpuihaia.

⁵Anni khan a sân an lei lôma, sum pêk hrang an inkung ta.

⁶Ama khom khan sa a tia, mipui om loi laia incheltirna zoro’nchum a zong tâka.

⁷Bai chol kop loi Kût ni, Ferkân Kûta belrate an that nî chu a hong tunga.

⁸Khanchu, Petera le Johana kha a tîra, “Ferkân Kût khalâi bu ei inêk hrang va sinsiam roi,” a tia.

⁹Anni khan “Khôn mo va sinsiam inlân ni inuam?” an tia.

¹⁰Ama khan, “Irngai u ta, khopuia nin va lûtin pa inkhat bêla tui chôiin nangni irtongpui a ti; a lûtna ina zui lût roi.

¹¹Khan, in neipupa kuang, ‘Irchutirtu’n ki irchutirhai leh Ferkân Kût khalâi kin nêkna hrang chontan kha kho hin mo a ti,’ ti roi.

¹²Ama khan chontan chuanchung irzat tak; itinrêng omsai, nangni inkhîk irhmu a ti. Kha khan sinsiam roi,” a tia.

¹³Khanchu an fea, an kuang a insîr lam ang tak khan an va hmua, Ferkân Kût khalâi bu kha an sinsiam tâka.

¹⁴Khan, a fâk zoro’n chu ama le a irchutirhai khan khalâi kha an ot tâka.

¹⁵An kuang, “Ki tuang mân hi Ferkân Kût khalâi bu hi nangni otpui ki nuam tak tak a ni.

¹⁶Nangni ki hril, Pathian Rama a tak tak a tung mâka chu hi khalâi bunêk hi fa ta no ning,” a tia.

¹⁷Khanchu, khilât a lâka, Pathian kuang lômthu an sîr zoiin, an kuang, “Hi hi la unglân, irsem roi.

¹⁸Nangni ki hril, atûn ata Pathian Ram a zuang tung mâka chu, hi uain tui hi in nôk ta no ning,” a tia.

¹⁹Khan, bai a lâka, Pathian kuang lômthu an sîr zoiin a khoia, an kuang a pêkhaia, “Hi hi ki taksa a ni, nin ta hranga pêk a ni; nin ni inhriat maina hrangin hi ang hin tho ngai roi,” a tia.

²⁰Zân bu nêk zoia chu khaang dênin khilât a lâka, “Hi khilât hi ki thisena thuthung thar, nin ta hranga suak chu a ni.

²¹Khannisianlân, irngai u ta, a nin cheltir hrangtu chu hi maichâma hin a ot chian a ni.

²²Mihriam Nâipa hi Pathian inkung angin a ife hrang a ni, aniachu, an cheltirtu hrang mihriam chung chu a rik e,” a tia.

²³Anni khan an laia khaanga tho hrang kha tu tak mo a ini hrang tâk, tiin an indon irhlôma.

²⁴Khan irchutirhai laia tu mo roiinpui tak ni ni, ti thu irsêlna a hong suaka.

²⁵Ama khan an kuang, “Jentailhai rênghai chu inlal an irti tak taka, an chunga irchamneituhai lakin, ‘Hruaitu sa,’ ti irhming an irphuaa.

²⁶Khannisianlân, nangni laia chu khaang khan ni mah. Nin laia roiinpui tak chu a chîn tak angin om sianlân, hruaitu tak kha sinthopu angin om ual ri se.

²⁷Tu mo roiinpui ual, khalâi ottu mo a sinthotu mo? khalâi ottu kha mo ni no ni? Khannisianlân, keima’n chu sinthotu angin ki iom kêng.

²⁸“Intakna ki tong sûngin nangni’n nin ni ompuia.

²⁹Ka pa’n ram a ni inkung pe ang dênin kei khomin ram nangni kin kung pe;

³⁰khanchu, ki rama chu ki maichâma fâkin, in nin ta, rêngtoihmuna toiin Israel nam sômhleihnihai chunga roirêl pe nin ti.

³¹“Simon, Simon, irngai ta! Setana’n butak le bu irsi sensâi hrang, bu’n sêp anga nangni fiaa, a sa le a sia nangni theithâk hrangin, Setana’n phalna a hmu tâk.

³²Khannisianlân, ni iamna a boi nona hrangin nang ki chongchai pe. Khan, ni hong irhei nôk tika chu ni urênghai indet ro,” a tia.

³³Ama khan, “Rengpa, ni kuang chu intângna ina lût hrang le thi hrang khomin fe sa mai ki’rphal,” a tia.

³⁴Ama khan, “Peter, nang ki hril, ‘Ama kha inhre ma ung’ tia voithum ni ni phil mâka chu a vuan zân âr khuang no ni,” a tia.

³⁵Jisua’n an kuang, “Sum choli, hmarsatehai, kekokhai chôi loia nangni ki tîra khan, thil irsam nin nei moh?” a tia. Anni khan, “Nei viat ma ung,” an tia.

³⁶Ama khan, “Atûn chu sum choli neipu’n chu chôi sianlân, hmarsate khom chôi ri se; khandai nei loi chu a puan zuar sianlân, irchôk ri se.

³⁷Nangni ki hril, ‘Ama chu mi sual laia an tep sa ta,’ ti Pathian Lekha thu chu ki chunga tung ngêt hrang a ni. Ki chungthu an irziak kha tung irkip hrang a ni ta” a tia.

³⁸Anni khan, “Rengpa, en ta, hin khandai inhni a om e,” an tia. Ama khan, “A ruk ta,” a tia.

³⁹Khan, ama kha a suaka, a tik danga angin Oliv tânga khan a fea, a irchutirhai khom khan an zui saa.

⁴⁰A hmun a va tungin chu an kuang, “Thêmnaa nin lût nona hrangin chongchai roi,” a tia.

⁴¹Lung dêng phâk ten vêla, a bingin a va fea, khûksadelin a chongchaia.

⁴²“Ka pa, sa ni ti’n chu, hi khilât hi ni lapai pe roh, khannisianlân, keima ircham ni loiin nangma ircham ni ual ri se,” a tia.

⁴³Irvân ata vântîrtôn inkhat inhartir hrangin a kuang a zuang inlâra.

⁴⁴A zâm a’rzal tak taka, a’rthân kha thisen zung lian tak angin a zunga.

⁴⁵A chongchai zoiin chu irchutirhai kuang a honga, an beidong inmusu kha a hong hmua, an kuang, “Ithoa mo nin inmusu?

⁴⁶Thoi unglân, thêmnaa nin lût nona hrangin chongchai roi,” a tia.

⁴⁷Khan, a la chong lai takin mipui an hong tunga, sômhleihnihai laia kop Juda an iti khan mah a hong hruaia, tum hrangin Jisua a hong pana.

⁴⁸Khannisianlân, Jisua’n a kuang, “Juda, Mihriam Nâipa hi i tumin mo, ni incheltir hrang?” a tia.

⁴⁹A kôla mihai khan thil hong tung hrang kha an hmu’n, “Rengpa, khandai irlek kin ti duah?” an tia.

⁵⁰An laia inkhatin chu Ochai inlal tak siahlo mikuar chang tianga a sât thâkpai pea.

⁵¹Jisua’n a sâma, “A ruk ta,” a tia. A mikuar kha a tôn pea, an damtir ta.

⁵²Ochai inlalhai, Tempil hruaituhai le upa honghai kuang khan, Jisua’n, “Khandai le hêmvuak chôiin hrâtlâksong chel hrang ang dênin nin hong ipût mo?

⁵³A nitin, Tempila nin laia ki om ngai lai khan ni chel mak chêia; khannisianlân, inthim irchamneina’n roi a rêl lai hin nin sintho zoro a ni,” a tia.

⁵⁴Jisua an chel tâka, Ochai inlaltak ina an hruai lût ta; Petera khan hla vit ata a zuia.

⁵⁵Khan kholaia mei an thoa, an toi irbuka, Petera khom kha an laia khan a toi saa.

⁵⁶Mei vâra a toi laiin siahlo dôngmate inkhatin a hong hmua, a en vong vonga, “Hi pa khom hi a kuanga om sa a ni hi te,” a tia.

⁵⁷Ama’n, “Nupang, ama chu inhre ma ung,” a tia, a phila.

⁵⁸Kha hnungin mi dangin a hong hmu nôka, “Nang khom hi, an laia mi ni ni hi te,” a tia. Petera’n, “Mihriam, kei chu ni viat ma ung,” a tia.

⁵⁹Dârkâr khat vêl hnunga chu mi dangin, “Hi pa khom hi a kuanga kop sa kha a ni ngêt hi te, Galili mi a ni hi,” a ti ngita.

⁶⁰Petera khan, “Mihriam, ni thu’nsîr kha inhre viat ma ung,” a tia. A chong mai lai takin âr a khuang zôia.

⁶¹Rengpa chu a hong irheia, Petera kha a ena. Petera khan, ‘A vuan zân âr a khuang mân nangin voi thum ni phil ni ti,’ Rengpa’n a kuanga a lei iti kha an hriat suaka.

⁶²Pên tiang a suaka, a chap irhniak bop bop tâka.

⁶³Jisua cheltuhai khan nuiza siamna’n an hmanga, an inbêna,

⁶⁴A mit an tuama, “Tu mo nang an bên, ti ro?” an tia.

⁶⁵Chong saloi tak takin an ngoa.

⁶⁶Khan, khua a vârin chu vântâng upahai, Ochai inlalhai le Dân irchutirpuhai kha an irbuka; an Sanhedrin-ah khan Jisua kha an hong hruaia.

⁶⁷A kuang, “Krista ni ni lele’n chu nin hril roh,” an tia. Ama khan, “Nangni hril khom inlân, iam ual no chin nia,

⁶⁸Chong nangni irdon khom inlân ni sâm ual no chin ni.

⁶⁹Khannisianlân, atûn ata chu Mihriam Nâipa hi Pathian sinthotheina chang tiang toi ta a ti,” a tia.

⁷⁰Khan an rêngin, “Nang hi Pathian Nâipa ni ini mo?” an tia. Ama’n, “Ni nih, nin ni ti khate,” a tia.

⁷¹Anni’n, “Inhriatpuitu dang tu mo ei la innang hrang? Eini ngeiin a chongbâi suak ata ei inhriat tâk hi te,” an tia.