Read Hrangkhol LUKA 3 Bible Online

LUKA 3 - Hrangkhol bible

LUKA 3

¹Kaisara Tiberi-a an lal kum sômhleiringa kuma chu, Pontia Pilata chu Judai rama Ramoptu a nia, Heroda chu Galili rama rêng a nia, a sangpa Filipa kha Iturea le Trakonitis rama rêng a ni. Lusania chu Abilene rama rêng a ni.

²Anna le Kaiafa hai kha Ochai inlaltak an nia; kha zoro lai khan ramchâra Zakaria nâipa Johana kuang Pathian thu a zuang tunga.

³Khanchu, Johana’n Jordan vadung pang ram tin ar fanga, “Nin sualhai ata irlet unglân, baptisma chang roi; khanchu, Pathianin nangni ngaidam a ti,” tiin thu an sîra.

⁴Deipu lekhabua irziak angin; “Ramchâra mi hnuk irhai khan, ‘Rengpa lampui siam unglân, a fena hrangin lamintûn siam roi!

⁵Irhôr tin insip ni a ta, mual le tâng tin irhniamtir ni a ti. Lampui kôihai intûntir ni a ta, Lampui inrualloihai kha inrualtir ni a ti.

⁶Khanchu Pathian saninhringna kha mi tinin hmu an ti,’ ” ti irziak ang khan.

⁷Khan, Johana kuang baptisma chang hrangin mipui an honga, an kuang, “Mirûl irchihaio, Pathian ningmur zuang tung hrang ata zôk hrangin tu mo nangni hril?

⁸Nin sual nin irlet tak tak tih nin nunchana inlangtir roi. Abrahama kha ei irchibul a ni khate, lei ti chin ni; nangni ki hril, Pathianin hi lunghai khom Abrahama irchi a inchang thei kêng.

⁹Thing tin a’rzung dêna phûr hrangin hreipui an sia ta. Thing tin ra saloia ra chu, irkita meia pai ni an ti,” a tia.

¹⁰Khan, mipuihaiin an irdona, “Imo kin itho hrang tâk?” an tia.

¹¹An kuang, “Songkol irthuam neihai chu a nei loihai sem unglân, fâkrua neihai khomin a neiloihai sem roi,” a tia.

¹²Khâzana irfuangtuhai khom baptisma chang hrangin an honga, a kuang, “Irchutirtu imo kin itho hrang?” an tia.

¹³“Dân bituk bana chu irfuang no roi,” a tia.

¹⁴Sipaihai khom an honga, a kuang, “Keini te imo kin itho hrang?” an tia. Ama khan, “Nakhrâtin mo minlakin mo tûte thil la pe no unglân, nin hloa nin milung inchuk roi,” a ti pehaia.

¹⁵Mipuihaiin chu a sân sabei takin, Johana kha Krista kêng ni a ti, tia an ngaitua laiin,

¹⁶Johana’n, “keima’n chu tuiin nangni ki baptisa, keima nêka roiinpui ual zuang hrang a nia, keima chu a kekok hrui sût inruk khom ni ma ung; Ama’n chu Irtha Irthiang le meiin nangni baptis a ti.

¹⁷An sêpna hrangin mira a chôia, insêp a ta, butak chu a panga thun a ta, a’rsî kha mei thi ngailoia hâlirvôm a ti,” a tia.

¹⁸An om dân irlet hrangin, Johana’n mipuihai kuang lam tamtakin Thurchi Sa a hril ngaia.

¹⁹Reng Heroda khom kha, a urêngpa dôngma Herodi a nei sikin le thilsual dang a itho murdi thua a halirchua.

²⁰Khanchu, Heroda’n Johana kha intângna ina a khum tâka.

²¹Khan, mi murdi baptisma an chang zoiin, Jisua khom baptisma a changa, a chongchai laiin irvân ar honga.

²²Irtha Irthiang chu taksa irputin a chunga vasu angin a zuang chuma, irvân ata hnuk irhai a zuang suaka, “Ki Nâi lungthung tak ni ni; ni chunga ki lôm tak tak,” a zuang tia.

²³Jisua sintho a phuta khan ama kha kum sôminthum a nia. Mi irngai lamin chu Josefa nâipa a ni. Kha pa kha chu Helia nâipa a nia;

²⁴ama chu Matthata nâipa a ni; ama chu Levia nâipa a ni; ama chu Melkia nâipa a ni; ama chu Jannaia nâipa a ni; ama chu Josefa nâipa a ni;

²⁵ama chu Mattathia nâipa a nia, ama chu Amosa nâipa a nia, ama chu Nahuma nâipa a nia, ama chu Eslia nâipa a nia, ama chu Naggaia nâipa a nia;

²⁶ama chu Maatha nâipa a nia, ama chu Mattathia nâipa a nia; ama chu Simeia nâipa a ni; ama chu Joseka nâipa a ni; ama chu Joda nâipa a ni;

²⁷ama chu Joana nâipa a ni; ama chu Resa nâipa a ni; ama chu Zerubabela nâipa a nia, ama chu Sealtiela nâipa a ni; ama chu Neria nâipa a ni;

²⁸ama chu Melkia nâipa a ni; ama chu Addia nâipa a ni; ama chu Kosama nâipa a ni; ama chu Elmadama nâipa a ni; ama chu Era nâipa a ni;

²⁹ama chu Josua nâipa a ni; ama chu Eliazara nâipa a ni; ama chu Jorima nâipa a ni; ama chu Matthata nâipa a ni; ama chu Levia nâipa a ni;

³⁰ama chu Simeona nâipa a ni; ama chu Juda nâipa a ni; ama chu Josefa nâipa a ni; ama chu Jonama nâipa a ni; ama chu Eliakima nâipa a ni;

³¹ama chu Melea nâipa a ni; ama chu Menna nâipa a ni; ama chu Mattatha nâipa a ni; ama chu Nathana nâipa a ni; ama chu Davida nâipa a ni;

³²ama chu Jesaia nâipa a ni; ama chu Obeda nâipa a ni; ama chu Boaza nâipa a ni; ama chu Salmona nâipa a ni; ama chu Nasona nâipa a ni;

³³ama chu Aminadaba nâipa a ni; ama chu Admina nâipa a ni; ama chu Arnia nâipa a ni; ama chu Hezrona nâipa a ni; ama chu Pereza nâipa a ni; ama chu Juda nâipa a ni;

³⁴ama chu Jakoba nâipa a ni; ama chu Isaka nâipa a ni; ama chu Abrahama nâipa a ni, ama chu Tera nâipa a ni, ama chu Nahora nâipa a ni;

³⁵ama chu Seruga nâipa a ni; ama chu Hragaia nâipa a ni, ama chu Falega nâipa a ni, ama chu Ebera nâipa a ni, ama chu Sela nâipa a ni,

³⁶ama chu Kainana nâipa a ni, ama chu Arpaksada nâipa a ni, ama chu Sema nâipa a ni, ama chu Nova nâipa a ni, ama chu Lameka nâipa a ni,

³⁷ama chu Methusela nâipa a ni, ama chu Enoka nâipa a ni, ama chu Jereda nâipa a ni, ama chu Mahalalela nâipa a ni, ama chu Kenana nâipa a ni,

³⁸ama chu Enosa nâipa a ni, ama chu Setha nâipa a ni, ama chu Adama nâipa a ni, ama chu Pathian Nâipa a ni.