Read Hrangkhol LUKA 4 Bible Online

LUKA 4 - Hrangkhol bible

LUKA 4

¹Jisua kha Irtha Irthiangin a sipa, Jordan dung ata a kîr nôka, Diabola inthêmin ramchâra a fe tâka.

²Khan Diabola’n sûn sômminli an thêma. Kha sûnga khan ite a fâk no sikin inhnunga chu a phîng a châm tâka.

³Diabola’n a kuang, “Pathian Nâi ni ni’n chu, hi lung hi bai inchangtir ro,” a tia.

⁴Jisua’n chu, “Bai ringotin chu mihriam hi an ihring hrang ni ma tih irziak a ni,” a tia.

⁵Khanchu, Diabola’n a hong hruaia, mitkhap kâr vakin rammual pumpui an entira.

⁶A kuang, “Hi chunga irchamneinahai le roiinpuinahai hi nang pe ki ti; ki kuang ipêk an ni ta, ki inuampu tak kuang ki pêk thei.

⁷Chubai ni mûkin lân, a rêngin nang pe ki ti,” a tia.

⁸Jisua’n, “Rengpa ni Pathian chu chubai mûkin lân, Ama sin vai tho ro, tih irziak a ni,” tiin a sâma.

⁹Khanchu, Diabola’n Jerusalema a hruaia, Tempil sîp irzuma a siaa, “Pathian Nâipa ni ni’n chu irchôm tha roh.

¹⁰‘Pathianin a vân vântîrtônhai nang indom hrangin zuang tîr a ti,’ ti irziak a ni.

¹¹An kutin nang indom an ta, ni ke khomin lung irfûi no chi ni,” a ti pea.

¹²Jisua’n chu “Rengpa ni Pathian fia no roh,” ti irziak a ni, tiin a sâm nôka.

¹³An thêmna hrang dôra an thêm zoiin chu, Diabola’n zoro’nchum danga hrangin a rotsan tâka.

¹⁴Khan, Jisua kha Irtha Irthiang sinthotheina neiin Galili rama a kîr nôka, kha ram sûnga khan a thurchi an thang tâka.

¹⁵An Sinagokhaia, mi ar chutir ngaia, mihai inpâkin a oma.

¹⁶A seilianna Nazaret khuaa a fea, Sabat ni’n chu a tho ngai lam angin Sinagoka a fea, Pathian Thubu tep hrangin a ngîra.

¹⁷Deipu Isaia lekhabu an pêka, lekha irzuat kha a phara, hi irziak omna hi a tepa.

¹⁸“Inrianghai kuang Thurchi Sa insîr hrangin a nin thang sikin, Rengpa Irtha ki chunga a oma, mi intânghai kuang zôkna thu inpuang hrangin a ni itîr a ni. Mitchohai, mit vâr nôkna hrang le mi ihnuaisiahai zôkna hrangin.

¹⁹Rengpa’n a mihai an zôkna hrang zoro a hong intung tâk tih inpuang sa hrangin,” ti hi.

²⁰Khanchu, Jisua’n lekha kha an zuata, a dôntu a pêka, a toia, Sinagoka mi murdi’n an en chuta.

²¹Khan, an kuang, “Hi Pathian lekha thu hi a vuan hin nin mikuar inhriata a zuang tung ta,” tiin a hong insîr tâka.

²²A chongbâi suak, lungkham thu insîrin, an lungrîl a tôna, ar khêl an tia, “Hi mi hi Josefa nâipa ni ma mo?” an tia.

²³Khan, an kuang, “Nangni’n hi chongirkhek thu hi, Daktor, ni bingin indam irhlôm roh. ‘Kapernaum-ah ni sinthohai, kin lei inhriathai khom hi ni khua tiang khom hin sin ro,’ ni la ti ngêt nin ti,” a tia.

²⁴Jisua’n, “Deipu chu mâni khuaa tûte’n lôm ngai mahai,” a ti pea.

²⁵“Irngai u ta, hi hi a dik a ni, Elija zoro laiin Israel rama meithâi tamtak an oma, kum thum le tha ruk rua tho loiin a oma, a ram pumpui sûnga châmpui a tâka.

²⁶Israel rama meithâi inkhat Sidon rama Zarefat kho mi kuang bana chu Elija kha tûte kuang itîr ni ma.

²⁷Deipu Elisa zoro lai khomin Israel rama phâr tamtak an oma, khannisianlân, tûte dam loiin, Suria rama mi Naamana vai indamin a om,” a tia.

²⁸Sinagoka mipuihai khan, a chong kha an inhriatin chu a sân an ning an mur.

²⁹An thoia, an khua ata an kaisuaka, khan an khua omna tânga rôla namthâk hrangin an hruaia.

³⁰Khannisianlân, mipui lai ata rel patin a rot tâka.

³¹Khanchu, Jisua Galili rama Kapernaum khuaa a fea. Sabat ni’n mihai ar chuhaia.

³²Irchamnei takin ar chuhai sikin a sân an irngai ar khêl tâka.

³³Sinagoka khan ramilhli irtha ichel a oma, inring takin a khêka.

³⁴“O, Nazaret Jisua, imo ni lo hrang ni ni iti? Ni’rhmangtir hranga ni ihong ma ni? Nang kin hriat Pathian mi irthiang ni ni,” a tia.

³⁵Jisua’n, “Dâihrekin lân a sûng ata hong suak roh,” a tia. Ramilhli khan irnênga an rîltir raka, innatir loiin a sûng ata a suak tâka.

³⁶Khanchu, an rêngin ar khêl an tia. “Itina irchamnei ma ni? Irchamnei le sinthotheina neia ramilhli suak roi a tia, an isuak hi,” an irtia.

³⁷Khanchu, kha rama khan hmun tina Jisua irhming an thang tâka.

³⁸Khan, Jisua Sinagok ata a suaka, Simona ina a fea, Simona tarpi a sân inkhur inrikin a oma, a ta hrangin Jisua a ngên pea.

³⁹A kôla a va ngîra, an khur kha a hala, khanchu, a hong boi zôia, a thoia an sin a tho pehai tâka.

⁴⁰Khanchu, misa a tâk hnungin, natna chi tinrênga damloihai a kuang an hong hruaia, an chung chita a kut pharin an damhai zita.

⁴¹Khan, “Pathian Nâipa ni ni,” tia khêkin ramilhlihai khom mihai sûng ata an suak tâka. Krista a ni tih an inhriat sikin. Jisua’n ramilhlihai kha chong hrang phalhai ma.

⁴²Khan, khua a vâr le chu khua ata fianriala a fea, mipuihaiin an zonga, an hmu’n chu, masanhai loia an kuang la om hrangin an ngêna.

⁴³Khannisianlân, Jisua’n an kuang, “Pathian Ram Thurchi Sa kho tina insîr hrang piala tîr kêng ki ni,” a ti pehaia.

⁴⁴Khanchu, Galili rama Sinagokhaia thu an sîr tâka.