Read Hrangkhol LUKA 5 Bible Online

LUKA 5 - Hrangkhol bible

LUKA 5

¹Sûn khat chu, Jisua Genesaret dîl kôla a ngîra, mipuihaiin Pathian thu irngai hrangin an hong pan mur mura;

²dîl kôla irkuang inhni om kha a hmua, nga cheltuhaiin an lên sôphai an imâk kha a hmua.

³Simona irkuanga khan a chuanga, muang ata irthîn viat hrangin a ngêna, khanchu, irkuanga a toia, mipui ar chuhaia.

⁴Thu an sîr zoiin chu Simona kuang, “Tui inthûkna tiang irkuang infetirin lân, nga man hrangin nin lênhai vôr roi,” a tia.

⁵Khan, Simon khan, “Rengpa, zân sôt kin vôra, ite man ma ung, khannisianlân, nangma irchamin lênhai vôr nôk kin ti,” a tia.

⁶An zu vôrin chu nga tamtak an mana, an lênhai khom a chet vâng vânga.

⁷Khanchu, irkuang danga an chanpui omhai kha hong sanhai hrangin an zâphaia. An honga irkuang inhni ngîm vâng vângin an thun insip zita.

⁸Khan, Simon Petera’n thil omzia a hmu’n chu, Jisua kuang khûksadelin, “Rengpa, ni masan roh, mi sual kêng ki ni,” a tia.

⁹Ama le a rualhaiin an nga chel a tam hrai sikin a sân ar khêl an tia.

¹⁰Simona pâla Zebedaia nâihai Jakoba le Johana khomin ar khêl an ti ok sa a ni. Khan, Jisua’n Simona kuang, “Chi no ro, atûn ata chu mihriam chel ta ni ti,” a ti pea.

¹¹An irkuanghai muanga an hong kaisuaa, thil tinrêng mâk zitin Jisua an zui tâka.

¹²Nikho khat chu, Jisua kha khua inkhata a om laiin, a taksa pumpuia inphâr khan Jisua kha a hmua, khûksadelin damna a zonga, “Rengpa ni nuamin chu ni ni’rthiangtir thei,” a tia.

¹³Jisua’n a hong inbana, “Ki nuam e, hong irthiang ta roh,” a tia. Voikhat rengin a phâr kha a hong boi zit ta.

¹⁴Khan, Jisua’n a kuang, “Tûte inhril no roh, aniachu, Ochai kuang van entirin lân, mi tinin ni dam tâk ti an inhriat theina hrangin, Mosia dân angin irbôlna inhlan roh,” a ti pea.

¹⁵Khannisianlân, Jisua thurchi kha an thang ual uala, a thu’nsîr irngai hrang le an natnahai indam hrangin mipuihai a kuang an hong irbûma.

¹⁶Khan fianriala a fea a chongchaia.

¹⁷Sûn khat chu Jisua’n mi ar chutira, a kôla Farisaihai le Dân irchutirtuhai an toia, Galili le Judai ram kho tin ata le Jerusalem ata hong an nia. Mi indam theina hrangin Rengpa Irtha Jisua chunga a oma.

¹⁸Zenginthi a zâlna pumin an hong irzôna, in sûnga Jisua makunga se hrang an tuma.

¹⁹Khannisianlân, mipui tam sikin lût thei mahaia, in chung tiang an luipuia, in chung ata an lâi taka, Jisua makunga a zâlna pumin an zu inthâka.

²⁰Khan, Jisua’n an iamzia a hmu’n chu, a kuang, “Mala, ni sualhai ngaidam a ni ta kêng,” a tia.

²¹Khan, Dân irchutirtuhai le Farisaihai khan, “Hiang taka Pathian hrilsiat hi tu mo a ini! Pathian vai kêng sual ngaidam thei,” tiin an insîr irhlôma.

²²Jisua’n an ngaituana an hriata, “Itho mo khaanga thil nin ingaitua?

²³‘Ni sualhai ngaidam a ni ta’ ti le thoiin lân ke’n fe ta roh, ti hi kho hi mo a ol ual?

²⁴Mihriam Nâipa hin rammuala sualhai ngaidam theina a nei tih nangni inlangtir pe ki ti,” a ti pehaia.

²⁵Voikhat rengin an mit hmua a thoi zoka, a zâlna puantha a lâka, Pathian inpâk pumin a ina a fe ta.

²⁶An rêngin irngai irkhêlin an chia, “A vuan chu hiang taka thil irkhêl ei ihmu hi,” tiin Pathian an inpâk tâka.

²⁷Kha hnung chu, Jisua a fe suaka, khâzana irfuangna hmuna toi, khâzana irfuangtu inkhat, a’rhming Levia kha Jisua’n a hmua, Jisua’n a kuang, “Ni zui roh,” a ti pea.

²⁸Khanchu, thil tinrêng mâkin a zui tâka.

²⁹Khan, Levia khan Jisua hrangin a ina hruai an thea, khâzana irfuangtu tamtak le mipuihai a fiala.

³⁰Khan, Farisai senkhathai le Dân irchutirtu senkhathaiin Jisua irchutirhai kha an sêla, “Itho mo khâzana irfuangtuhai, mi sualhai leh nin fâkin nin iin suam,” an tia.

³¹Jisua’n an kuang, “Mi hrisêlhaiin daktor innang ngai mahaia, mi irveisiahai kêngin an innang ngai.

³²Mi felhai irlam hranga zuang ni ma unga, mi sualhai an irlet theina hranga zuang kêng ki ini,” a tia.

³³Mi senkhatin Jisua kuang, “Johana irchutirhaiin bu ngheiin an chongchai ngaia, Farisai irchutirhai khomin khaang dênin an tho ngaia, khannisianlân, ni irchutirhaiin chu nghei ngai mahaia?” an tia.

³⁴Jisua’n an kuang, “Irneinaa an rualhai kha moineipu an kuang a om kâr ka chu bu nin inngheitir theihai hrang ma ni? Ni thei no ni!

³⁵Khannisianlân, an kuang ata moineitu an hruaipai nikhua la tung a ta, kha tika chu la nghei an ti,” a tia.

³⁶Jisua’n an kuang chongirkhek dang an sîra, “Tûte’n puan thar inpot thêrin puan milui phô ngai mahai, phô ta ngân sian, a thar khan kaiset a ta, a thar hlek lâkin a milui kha irfûk no ni.

³⁷Tûte’n uain thar savun kok miluia thun ngai mahai, thun ngân ta sianlân, uain khan savun kokhai kha mût khoi a ta, irpai a ta, savun kokhai khom insiat a ti.

³⁸Khasikin, uain thar chu, savun kok thara thun an ti.

³⁹Tûte’n uain milui in hnungin uain thar in nuam ngai mah, uain milui a sa ual sikin,” a tia.