Read Hrangkhol LUKA 8 Bible Online

LUKA 8 - Hrangkhol bible

LUKA 8

¹Chomkhat hnunga chu Jisua’n Galili ram kho lian le kho chîna Pathian Ram Thurchi Sa insîrin a fea. Irchutir sômhleihnihai khom an zui ngai.

²Nupang senkhat, ramilhli ichel indam le an natnahai ata damhai khom an kop sa; Magdala kho mi Mari a sûnga ramilhli sari a irzûlpai pehai,

³Heroda sum enkoltu Chuza dôngma Joani hai, Susani hai, mi dang nupang tamtakhaiin an zui saa. Hi mihai hin an sumin Jisua le a irchutirhai an changpui ngaia.

⁴Kho tina irthokin mipuihai Jisua kuang an hong irbûma, Jisua’n hi chongirkhek thu hi an sîra.

⁵“Mi inkhatin bu inrît hrangin a loia a fea, khaanga fachî a hong inthek khan senkhat lampuia a tâka, an lei sirphaa, vahaiin an hong fâk zôi tâka.

⁶Senkhat lungpherpha pil chunga a tâka, a hong mông lata, khannisian, pil kha a’rzil no sikin a hong châr zôia.

⁷Senkhat hloiilhlingnei kâra a tâka, hloi khan ar sôn dela, a dîp irhmang ta.

⁸Senkhat irnêng saa a tâka, a hong irsôn liana, a bâk irza’n a vûi tâka,” a tia. Kha thu kha an sîra, “Irngaina mikuar nei murdi’n chu irngai ri sehai,” tiin a tia.

⁹A irchutirhai khan kha chongirkhek thu kha i tihna mo, tiin an irdona.

¹⁰Ama khan, “Pathian Ram thurîl chu nangni inhriat hranga tho a nia, mi danghai ta hrang chu thu intak a ni; hmu chian khomhai sian hmu’n fel mahaia, inhre mai khomhai sian an inhriat thei nona hrangin.

¹¹“Chongirkhek omzia chu hi hi a ni: Fachî chu Pathian thu hi a ni.

¹²Lampuia tâk kha chu an iam noa saninhring an ni nona hrangin Diabola a honga, an milunga thu kha a lâkpai pehai ngai.

¹³Lungpherpha chunga tâk kha, an inhriat zôi le thu kha lôm taka pom tâkhai hi an ni; khannisianlân, irzung la maka; zoro sôtnote chu an iam tâka, inthêmna an tong viat le chu an tûk nôk zôi ngai a ni.

¹⁴Hloiilhlingnei laia tâkhai chu thu kha an inhriata, a hong irsôna, khannisian dam sûng hringnun inhoinahai le irchongnahai khan a hong dîpa, ra puihling a insuak ngai loi a ni.

¹⁵Irnêng saa tâk kha hihai hi an ni; thu kha inhriata lungrîl dik le saa, sataka vonga, bei zâma ra suak tâkhai hi an ni.

¹⁶“Tukhomin an meiser hâl kha belin irkhu ngai mahai, zâlhmun hnuaia khom sia ngai mahai, a lût murdi’n a vâr an hmu theina hrangin a sianaa an sia ngai.

¹⁷Ite phuang nôk loi hranga thup om mah, inhriat loi hrang le inlang loi hrangin ite ithup om ual mah,

¹⁸Khanchu, nin thu dong dâna irdîn roi, a nei ka chu pe bel sa an ta, a nei loi chu a neia a inhriat sun khom lapai pe an ti.” a tia.

¹⁹A nu le a urênghai khom a kuang an honga, khannisianlân, mipui sikin nâi thei mahai.

²⁰“Ni nu le ni urênghaiin nang hmu tumin pên tiang son nang an nghâk,” tiin an hrila.

²¹Ama’n a sâmhaia, “Pathian thu inhriata zômhai hi ka nu le ki urênghai an ni,” a tia.

²²Sûn khat chu a irchutirhai leh irkuanga an chuanga, an kuang, “Dîl râl tiang son kâi ei ti,” a tia, an suak tâka.

²³Khaanga an fe lai khan, Jisua kha a lei ina. Voikhat rengin dîla khan phâivopui a hong thoa, an irkuang tuiin a sip vâng vâng tâka, a sân phûkinthingin an om tâka.

²⁴Irchutirhai kha Jisua kuang fein, an va kaithoia, “Irchutirtu, Irchutirtu; kin ithi zoi hrang tâk kêng,” an tia. Khanchu, Jisua kha a thoia, phâivopui le tui irsok kha a hala: a hong monga, a boi rup tâka.

²⁵Irchutirtu khan an kuang, “Kho mo nin iamna?” a tia. An chia, ar khêl an ti tak taka, “Hi mi hi tu mo a ini? phâivua le tui ten khom thu a pêka, an i-zôm hi.” an irti irhlôma.

²⁶Khan, Jisua le a irchutirhai kha Galili dîl râl, Gerasin mihai rama khan an va kâia.

²⁷Jisua varâl a kâi le chu mi inkhat, ramilhli ichel a tonga, kha mi kha zoro sôt taka silkai boiin, in sûnga khom om loiin thâna a om ngai.

²⁸Jisua a hmu’n chu a khêka, a makunga khûksadelin, inring takin, Jisua Pathian Anchungtaka Nâipa, Imo ni lo hrang ni iti? Deng nin theitir no roh, tiin a ngêna.

²⁹Jisua’n irtha porinche kha a sûng ata suak hrangin, thu a pêk sika hianga a iti a ni. Voi iza an chela, lung ina an khum ngaia, a kut a ke thîrhruiin an khita an pôisata, ramilhli khan ramchâr tiang a hruai ngai a ni.

³⁰Jisua’n, “Imo nir hming?” a tia. Ama khan, “Ki’rhming chu Nuaia,” a tia. A sûnga ramilhli lût kha a sân an tam sika, a ni.

³¹Khurmongboia pai thâk loi hrangin Jisua kha an ngêna.

³²Khan, kha tânga khan vok rual fâk zongin an oma, ramilhlihaiin vokhai sûnga lût hrangin Jisua an ngêna, a phal pehaia.

³³Kha pa sûng ata an suaka, vokhai sûnga an lût tâka. Rôl fora khan an intâna, dîla an intân lûta, tui inhakin an thi ta.

³⁴A enkoltuhai khan thil hong tung kha an hmu’n chu an intâna, kho sûng mihai le a kôlvêla mihai kha an inhrilhaia.

³⁵Khanchu, i thil mo a hong itung ta tih en hrangin mihai kha an suaka, Jisua kuang an hong tungin chu, ramilhli isuaksan tâk pa kha puan sila, lungrîl pangai irputin Jisua ke bula toi an hong hmu’n chu, a sân an chi tâka.

³⁶Khan, a hmupu dôrin a dam lam dân kha mihai kuang an va hrila.

³⁷Gerasin rama mihai khan an chi sikin Jisua kha an kuang ata rot hrangin an ngêna, khanchu, Jisua irkuanga a chuanga a mâk tâka.

³⁸Ramilhli sûng ata suak, hong damtu khan, Jisua kuang, “Nang zui ki ti,” a tia.

³⁹Khannisianlân, Jisua’n, “Ni ina fe’n lân, ni chunga Pathian sinthozia hi van sîr roh,” a ti pea. Khanchu, a fea, khopui sûng pumpuia a chunga Jisua sinthozia kha an sîr tâka.

⁴⁰Khan, Jisua hong kîr kha mipuihai khan lei lômin an lei nghâka.

⁴¹Irngai ta, mi inkhat, ar hming Jaira, Sinagok hruaitu kha a honga, Jisua ke bula an bok hrupa, a ina fe hrangin a ngêna.

⁴²A nâinu neisun, kum sômhleihni mi, a thi vâng vâng sikin. Khan, Jisua a fe’n chu mipuihaiin an uap tur tura.

⁴³Nupang inkhat, kum sômhleihni thi suak tâk, a sum nei murdi khom daktora a sêng zoi tâka, tûte’n an indam theiloi kha a hnunga a honga, a puan hmor kha a hong tôna,

⁴⁴Irningloiin a thi suak kha a boi zôi zela.

⁴⁵Jisua’n, “Tu mo a ni tôn kha?” a tia. “Kei chu ni ma ung,” an ti chita, khan Petera’n, “Hruaitupa mipuiin hiang dôra ihneng renga nang an ihneng hi te,” a ti pea.

⁴⁶Khannisianlân Jisua’n, “Tukhôkin mani a ni tôn, keima ata sinthotheina a suak ti kin hriat,” a tia.

⁴⁷Khan, nupangnu khan irthup thei zât ni ta mah ti an hriatin, inthing pumin a honga, a makunga an boka, a itônna san le irningloia a idam tâk thu mi murdi makunga a hril tâka.

⁴⁸Khanchu Jisua’n a kuang, “Ki nâinu, ni iamna hi ni idampui a ni, irtharngam takin fe ta roh,” a tia.

⁴⁹A la chong lai takin Jaira in ata mi inkhat a honga, “Ni nâinu a thi ta, Irchutirtu hi dengintheitir ta no roh,” a hong tia.

⁵⁰Jisua’n an hriatin, Jaira kuang, “Chi no roh, iam maiin lân, dam nôk a ti,” a tia.

⁵¹In kha a va tungin chu, Petera, Johana, Jakoba hai le nupangtenu pa vai ti no chu tûte lût hrang phal maka.

⁵²Khataka om murdi’n nâite lei sûnin an chapa. Jisua’n, “Chap no roi, a thi ni mah, a in kêng,” a tia.

⁵³A thi ngêt a nih ti an inhriat sikin an innuisana.

⁵⁴Jisua’n a kut a chela, “Ki nâinu thoi roh,” a tia.

⁵⁵A’rtha kha a zuang kîr nôka, a thoi zôia; “Fâk rua pe roi,” a tia.

⁵⁶A nu le pa khan ar khêl an ti tak taka, khannisianlân, thil om lam kha mi dang hril a khap khaka.