Read Hrangkhol LUKA 9 Bible Online

LUKA 9 - Hrangkhol bible

LUKA 9

¹Jisua’n irchutir sômhleihnihai kha a koi bûmhaia, an kuang, ramilhli inhnot suak theina le natnahai indam theina sinthotheina le irchamneina a pêka.

²Khanchu, Pathian Ram thu’nsîr hrang le damloi indam hrangin a tîr suakhai tâka.

³An kuang khan, “Inzinna hrangin khianghrol, hmarsa, bai, sum, songkol a’rthuamin chôi no roi, a ti pehaia.

⁴Nangni an lei lômna in taka khan om chian roi, kha khua kha nin mâk nôk mâka chu.

⁵Nangni an lei ingaisak loina khua chu, nin suaksan hrang tika an dikloizia inhriatirna hrangin nin kezaphaa vâiphin kha nûlpai roi,” a ti pehaia.

⁶Khanchu, an suak tâka, kho tin an irfanga, hmun tina Thurchi Sa hrilin mihai an indam thiaia.

⁷Khan, Galili-a rêng Heroda’n, thil omzia an hriatin a buai tâka. Senkhatin, “Johana kha mithi lai ata a ithoi nôk tâk kêng,” an tia.

⁸Senkhatin, “Elija a zuang inlâr nôk ta kêng,” an tia; senkhatin, “Tianlaia deipu tu mo khat a zuang ithoi nôk ta kêng,” an ti sika khan, a’rngaina lam chang inhre maka.

⁹Heroda khan, “Johana kha a lu ki itanpai tâk kha! A thurchi hiang dôra irkhêl ki inhriat hi tu mo a ini tâk?” a tia. Jisua kha hmu a tum tâka.

¹⁰Khan, tirtônhai an hong kîr nôkin chu an sinthohai Jisua kuang an hrila. Khan, a kuang a hruaihaia, Bethsaida khuaa an bingin a fe puihaia.

¹¹Mipuiin an inhriatin chu an zuia, a lei lômhaia, Pathian Ram thu a hrila, indam innang ka chu an damhaia.

¹²Khan, khohloi a hong ni’n chu, irchutir sômhleihnihai an honga, a kuang, “Mipuihai hi infetirhai ta roh, kho sûnga le a kôl vêlhaia hin bu le riak hmun an hmu theina hrangin, ei omna lak hi hmun ramchâra om kêng ei ini,” an tia.

¹³Khan Jisua’n an kuang, “Nangni’n fâkrua pehai roi,” a ti pehaia. Anni’n “Bai ringa le nga inhni vai kêng kin inei.

¹⁴Hiang dôra mipui sângringa fâk hrang, kin va irchôk hrang ma ni?” tiin an sâma. Khan a irchutirhai kuang, “Mipuihai hi a buk bukin sômringa chitin intoitirhai roi,” a tia.

¹⁵Khanchu, irchutirhaiin a chong bê angin an intoihai tâka.

¹⁶Khan, Jisua’n bai ringa le nga inhni kha a lâka, irvân enin Pathian kuang lômthu an sîra, a khoia, khanchu mipuihai kuang sem hrangin a irchutirhai a pêk tâka.

¹⁷Khanchu, an rêngin an khop do dôrin an fâk hnungin, an fâk ban, khamphulu sômhleihni irchutirhaiin an la hrût insip a ni.

¹⁸Voikhat chu Jisua’n a bingin a chongchaia, a irchutirhai an honga, an kuang, “Mipuihaiin tu mo a ni, an ni ti ngai?” tiin ar donhaia.

¹⁹Senkhatin, “Baptistu Johana, senkhatin Elija, senkhatin tiana deipu tu khôk mani, a izuang nôk nang an ti ngai,” tiin an sâma.

²⁰Khante, “Nangni’n teh tu mo nin ni ti?” tiin ar donhaia, Petera’n, “Pathian Mesia ni ni,” tiin a sâma.

²¹Khan, Jisua’n hi thu hi tûte kuang insîr loi hrangin thu a pêka.

²²An kuang, “Mihriam Nâipa hi upahai, Ochai inlalhai, Dân irchutirtuhaiin, hnôl an ta, dengintheitir an ta, that an ti, khan, sûn thum hnunga chu hringin thoi nôk a ti,” a tia.

²³Khan, an rênga kuang, “Tukhomin ni zui a nuamin chu, mâni intakna uksak loiin, a nitin a kros irputin ni zui ri se.

²⁴Tukhom mâni hringna inzôk nuam chu inchân a ta, Tukhom keima sika a hringna inchân murdi’n zôk an ti.

²⁵Mi’n rammual hi a pumin nei sianlân, ama khan siatpuiin irhmangpui sian, a ta hrangin imo ar fêna?

²⁶Ki thu le keima nin zakpui ka chu Mihriam Nâipa khomin a roiinpuina le, Pa le vântîrtôn irthianghai roiinpuina le, a zuang tika anni kha lan zakpui a ti.

²⁷Dik takin nangni ki hril, hitaka ngîr senkhathai hi Pathian Ram an hmu mâka chu thiloi hrang an om,” a tia.

²⁸Kha thu an sîr zoi ata sûn riat vêl anga chu, Petera, Johana, Jakoba hai hruaiin chongchai hrangin tânga an fea.

²⁹Khaanga a chongchai laiin a hmêl inlang dân kha a hong danglam tâka, a puanhai kha a vâr irtêk tâka.

³⁰Irningloiin mi inhni an zuanga, an chongpuia. Mosia le Elija an ni.

³¹Irvân roiinpuina’n an zuang inlâra, Pathian tumna sua hranga, Jerusalema a thi hrang chungchâng thu Jisua leh an insîr a ni.

³²Petera le a rualhai chu an lei ina, an hong harin chu Jisua roiinpuina le a kuanga mi inhni ngîr an hmua.

³³Mihai khan Jisua an mâksan tôn chu, Petera’n a kuang, “Irchutirtu, hitaka om hi ei ta hrangin a sa, kairêng inthum sin ki ta, nangma ta hrang inkhat, Mosia ta hrang inkhat, Elija ta hrang inkhat,” a tia, (kha thu kha imo a iti khom a inhriat infel loi a ni.)

³⁴A la chong lai takin sûmin a zuang irhlihaia, sûmin a zuang irhlihaiin chu irchutirhai kha an chia.

³⁵Sûm ata kha hnuk irhai a zuang suaka, “Ama hi ki Nâipa, ki inthang chu a ni; Ama thu hi irngai roi,” tiin.

³⁶Hnuk irhai a zuang suak zoiin chu Jisua vai an hmua. Irchutirhai khan an thil hmuhai tûte hril loiin an ip chiana.

³⁷Zîng nôka tâng ata Jisua le a irchutir inthumhai an zuangin chu mipui tamtakin Jisua kha an lei nghâka.

³⁸Mipui laia pa inkhat chu a khêk suaka, “Irchutirtu, ki nâipa inkhat neisun kha hong en hrangin nang ki ngên a ni;

³⁹ramilhli’n a chela, a khêk raka, an rîla, a bâia a khasuai zung chupin a soisaka, thi hrang ang dôrin a rotsan ngai.

⁴⁰Ni irchutirhai hi inhnot suak hranga ki ngên lakin tho thei mahai,” a tia.

⁴¹Jisua’n “Iamna nei loi, mi pualoihaio, idôr ten mo nin kuang ki omin nangni ki ingaitua hrang? Ni nâipa kha hin hong hruai roh,” a tia.

⁴²Khan, nâipang kha a hongin chu, ramilhli khan irnênga an zuan raka, an rîl ta. Jisua’n ramilhli kha thu a pêka, nâipang kha an damtira, a pa kuang a pêk ta.

⁴³Pathian sintho roiinpuizia chu ar khêl an ti tak taka. Jisua’n sintho mihaiin ar khêl an la ti laiin, a irchutirhai kuang,

⁴⁴“Nangni ki ihril hrang hi irnghil no roi, Mihriam Nâipa hi mihriamhai kuta ipêk nih a ti,” a tia.

⁴⁵Khan, irchutirhai lakin a omzia inhre thei mahaia. An inhriat thei nona hranga thu irthup a nia, ama lak an chi sikin irdon ngam mahai.

⁴⁶Khan, irchutirhai khan tu mo ei laia a roiinpui tak hrang, tiin an irsêla.

⁴⁷Jisua’n an milung inchong an hriata, nâipangte a kaia, an kôla an ngîrtira.

⁴⁸An kuang, “Tukhom hi nâipangte hi ki’rhming sika lôm chu, keima ni lôm a ni; keima ni lôm chu, a ni tîrtu lôm an ni. Nin laia a chîn tak hi a roiinpui tak a ni,” a tia.

⁴⁹Khan, Johana khan ama kha a chongpuia, “Irchutirtu, mi inkhatin ni’rhmingin ramilhli an hnotsuak kin hmua, keini angin nang a zui no sikin khap kin lei itum kêng,” a tia.

⁵⁰Jisua’n a kuang, “Khap no roi, nangni doi loi ka chu nin tianga kop a ni,” a tia.

⁵¹Jisua, irvân a kâi hrang nî a hong nâiin chu, Jerusalema fe ngêt hrangin milung an chonga.

⁵²A maton tiang thanginthei hrangin mi a tîra, a ta hranga tinrêng lei irfûktir hrangin Samari khua inkhata an lûta.

⁵³Khan Jerusalema fe a nih ti an inhriat sikin lei lôm mahaia.

⁵⁴Khan, irchutir Jakoba le Johana’n an inhriatin chu a kuang, “Rengpa, hihai kâng zit hranga hin Elija angin irvân ata mei koi thâk hrangin ni nuam mo?” an tia.

⁵⁵Khan, Jisua’n anni tiang irheiin a halhaia.

⁵⁶Khanchu, kho danga an fe tâka.

⁵⁷Khan, lampuia an fe laiin, mi inkhatin Jisua kuang, “Ni fena tina nang zui ki ti,” a tia.

⁵⁸Jisua’n a kuang, “Sihalhaiin khur an neia, vahaiin irbu an neia; khannisianlân, Mihriam Nâipa chu a lu irnghatna hrang lua nei mah,” a ti pea.

⁵⁹Khanchu, mi dang kuang, “Ni zui roh,” a ti pea. Khan, kha mi khan “Rengpa, fe ki ta, ka pa va irvûi bak ki ti,” a tia.

⁶⁰Jisua’n a kuang, “Mithi’n anni mithi kha irvûi ri sehai; nang chu Pathian Ram thu hi va hril indarh ual roh,” a tia.

⁶¹Mi dangin a kuang, “Rengpa, nang zui ki ti, khan, ki in mihai chonghoiin ni van thâtir bak roh,” a tia.

⁶²Jisua’n a kuang, “Tukhom âl kainaa kut irnghata, hnung tianga en chu Pathian Rama mi ni inruk ni mah,” a ti pea.