Read Hrangkhol DÂN INHNINA 1 Bible Online

DÂN INHNINA 1 - Hrangkhol bible

DÂN INHNINA 1

¹Hi hi Jordan dung sak tiang ramchâra Israelhai an om laia an kuang Mosia thu’nsîr irziakna bu a ni. Jordan dung phâi, Sufa irhôr Tofel khua, Labana khua, Hazerot khua, Dizahab khua hai le Paran ramchâr kâra an om lai a ni.

²Horeb tâng ata Kades-Barnea kha Edom tâng rama fein sûn sômhleikhat fe a ni.

³Aigupta ram an suaksan kum sômminli, tha sômhleikhat, tarik khat nî chu an kuang hril hrang RENGPA ihril murdi chu Mosia khan a hrila.

⁴RENGPA khan Amor mi, Hesbon khuaa rêng Sihona kha an hnêa, Basan rama Astarot le Edrei kho rêng Oga khom an hnê tâka.

⁵Moab ram, Jordan dung sak tiang an om lai khan Pathian dân le thupêkhai kha Mosia’n an sîrinfel a ni.

⁶Ama khan, “Horeb tânga kin om lai khom RENGPA kin Pathian khan, Hi tânga hin nin om sôt ta.

⁷Nin irbu insiat unglân, irtôl irson roi. Amor-hai ram, tâng rama khan fe unglân, a kôlvêl ramhai irfang roi. Jordan dung phâi, tâng ram, sim tiang ram hai, Mediteranean tuipui kam dênin fe roi. Kanaan hai ram, Lebanon tâng pên Eufrates dung dênin fe roi.

⁸Hi ram hi a ni, nin irchibul Abrahama, Isaka, Jakoba hai le an irchihai kuang pêk ki inkung ram, irfang unglân, van hnê roi duah” a tia.

⁹Mosia’n mipuihai kuang, Horeb tânga ei om lai khan nangni ki ihril kha. Keima ringotin chu a rik nangni ki tia, zoi ta ma ung.

¹⁰RENGPA nin Pathian khan irvâna ârsi dôrin nangni an puangtira.

¹¹Nin irchibulhai Pathian RENGPA khan atûn hin a bâk sângin nangni inpungtir sianlân a inkung angin nangni irhniangtir ri se.

¹²Nin thubuai irngeitir a sân a intak a ni ta; keima vaia tho zoi thei ni ta ma.

¹³Mi vâr, thil sût thei le inhriat irzat, nam tin ata inthangsuak unglân, an kuta nangni inhlan ki ti.

¹⁴Kha kha thil tho zât tak a ni khom nin inhriat.

¹⁵Khanchu, mi vâr le thil inhriat irzat hai, nin nam murdi laia inthangsuakhai kha nangni kin koltira; senkhat chu mi sâng chunga roirêl hrang an nia; senkhat chu irza chunga, senkhat sômringa chunga, senkhat chu sôm chunga: khabana khom nam tina hruaitu hrang nangni phun pe sa ki ti.

¹⁶“Anni kha hiang hin ki hrilhaia: Nin mihai laia thubuai om murdi chu ngûk takin irngai unglân, nangni mi vai kâra thu a ni mani, nin laia nam dang om sahai le nin kâr thu mani dik takin, thiarthâk nei loiin rêl ngai roi.

¹⁷Indit bîk nei no unglân, tukhom ni sian, hmunkhat zita enin an thu rêl pe ngai roi. Tukhom enbîk nei no roi, nin thurêl inchuk chu Pathian ata zuang suak a ni. Nin ta hranga rêl intak ta hrai chu ki kuang hong intung ngai nin ta, lei rêl ki ti.

¹⁸Nin itho hrang danghai khom nangni ki hril kha te.

¹⁹“Kin Pathian RENGPA thu ang khan kin thoa. Horeb tâng kin suaksana, ramchâr irzat tak le irchel taka Amor-hai omna tâng ram lampui kha kin fe thenga, Kades-barnea kin va tunga.

²⁰Keini chu, ‘Amor-hai tâng ram nin hong tung ta, RENGPA kin Pathianin ram kha,

²¹en u ta, RENGPA nin Pathianin ram kha nangni a ipêk diam tâk a ni; lût unglân, RENGPA nin pi le puhai Pathianin a lei ihril tâk angin hong lua roi; chi no unglân, zâmirzal sa no roi,’ ki tia.

²²“Khannisian, nin rêngin nin honga, ‘Ram chu enirchika kin fena hrang hai, khopui kin lûtna hrang thurchi hai ni hong nôk hrangin, ei matona, mi va tîrin lân; nin tia.

²³Kha khan a sân a nin lômtira; khanchu nin laia mi sômhleihni, nam khata inkhat kin thangsuaka.

²⁴An taka, tâng rama khan an hong kâia, Eskol irhôr an tunga, an eninfel zita.

²⁵Thei rahai kha an hong chôia, thu an hong intunga, RENGPA kin Pathian ni pêk ram chu a sân a lei sa’, an tia.

²⁶“Khannisianlân, nin fe nuam noa, RENGPA nin Pathian thupêk kha nin hnôl tâka.

²⁷Nin chiara, ‘RENGPA hin a ni ikhôkmâk a ni, Aigupta ram ata a ni hruai suaka, Amor-hai kuta a ni ipêk hrang a ni, nin siatpai a lei itum a ni hi te.

²⁸Ithoa mo kin hong ife hrang, khi taka omhai chu eini nêkin lian le irsâng tak tak an nia, an khuahai lak a liana, irvân phâkin kul nei an ni; an pathianhai khom kin hmu, tia ei urênghaiin an hong insîr kha kin chi a ni’ nin tia.

²⁹Annihai kha chi no unglân, zâmirzalpui no roi,

³⁰RENGPA nin Pathian kha nin mahruaitu a nia, ama khan nangni doipui a ti; Aigupta rama nin hmu ngeia nin ta hrangin thil a tho ngai ang khan a itho thiai hrang a ni.

³¹Ramchâra nin fe sûng khom khan lam tinrênga nangni a hruaia, pa’n a nâi a ipuak angin hi hmun hi nangni a ipuak intung a nih ti nin inhriat mai a ni,” ki tia.

³²Hi thila hin RENGPA nin Pathian kha nin iiam ngam loi a ni;

³³nin maton a hruai thiaia, nin irbûk irbeina hrang nangni a zong suak pea, zâna mei vâr, sûna sûm indingin nangni a ihruai ngai a ni.

³⁴RENGPA’N nin irhâi a len hriata, a sân a ning an mur a ni.

³⁵“Hi irlo sual tak laia inkhat lua’n, ram satak an pahai kuanga, pêk a inkung kha hmu viat no nihai.

³⁶An laia mi inkhat Jefunea nâipa Kaleba vai hin hmu a ti, a isirna ram ka kai kha a nâihai irchon dongtum thiai hrangin ki ti, RENGPA kha a zui ngit sikin,” tiin thu an kung ngita.

³⁷Nangnihai sikin RENGPA kha ki chunga khom ning an mura, “Nang khomin ram kha hmu no chi ni,

³⁸Nuna nâipa, ni sinthotu Josua rêk hi chu hmu a ti: inthor ual ro, hi ram hi Israelhai an luatir hrang a ni.

³⁹Nin nâi le tehai, râl man mai mai hrang nin itihai, a sia a sa lan hre phâk loihai rêk hi chu, kha rama khan lût an ta, nei an ti.

⁴⁰Nin rengin kîr nôk unglân, Tuipui Sen tiang panin ramchâra fe roi,” a tia.

⁴¹Nangni’n chu ki kuang, “RENGPA chunga thil sual kin itho a ni, tâng rama khan hong doi kin ti,” nin tia. Hriamhrei nin chôi senga, tâng rama hong fe chu a sâna ol hrangin nin bêa.

⁴²RENGPA’N ki kuang: “Hong fe no roi, hong doi sa no roi, nin laia om ma ung, nangni lei that ngêt an ti,” tiin hril roh a ni ti a ni.

⁴³Kha kha nangni ki hrila, irngaitua nuam mak chêia; RENGPA thupêk kha zôm nuam mak chêia, tâng rama khan nakhrâtin nin hong fe tâka.

⁴⁴Kha laia tâng rama om Amor mihai khan nangni an lei doia, khuaiin mi a irzûl ang dênin nangni an lei irzûla. Horma tung thaiin nangni an irzûla, Edom tâng rama nangni an inhnê tâk a ni.

⁴⁵RENGPA tiang nin irheia, a kuang nin chapa; khannisian RENGPA khan nin irhâi len hre nuam maka, lei irngaitua nuam sa ma.

⁴⁶Khanchu, Kades-barnea khan sôttak nin om tâka.