Read Hrangkhol DÂN INHNINA 10 Bible Online

DÂN INHNINA 10 - Hrangkhol bible

DÂN INHNINA 10

¹RENGPA’N ki kuang, ‘Lungphêk inhni, matona ang kha, sinin lân, tânga ki kuang hong nôk ro; a kok hrang bakot siam sa roh.

²Ni inkhoi tak lunga chuang ang kha, kha lunga khan lei irziak nôk ki ti, koka khan ni isia hrang a ni’ a tia.

³Khanchu, Sitim thingin bakot ki siama, matona lungphêk inhni ang kha ki siama, an ruai khan ki hong fepui tâka.

⁴Lungphêkhaia khan matona thu irziak ang chie, thupêk sôm kha a lei irziak nôka; tâng kôla nin pungkhôm nia mei ata nin kuanga a thu’nsîr kha RENGPA’N a ni pêk a ni.

⁵Tâng ata kha ki zuang kîra, kok ki isiama khan lungphêkhai kha ki siaa, RENGPA ni ihril angin atûn ten a la iom a ni.

⁶Israelhai kha Beerot-Bene-Jaakan ata Mosera-ah an irsona, kha khan Arona kha a thia; kin phûma, a nâipa Eleazara khan a’rthûla ochai inlaltak sin kha a tho tâka.

⁷Khatak ata kha Gudgoda-a an irsona, tui tamtak omna hmun Jotbat-a khan an irson a ni.

⁸Kha zoro lai khan Levia irchihai kha RENGPA khan Thuthung Bôm enkoltu hrang le irzôn ngai hrang an kunga; RENGPA makunga an dinga, a sin thoa a’rhminga mipui satvur pe ngai hrangin atûn ten a inkung tâk a ni.

⁹Khasika khan, Levia irchihai khan an urêng danghai angin ramchâr le dongtum dang nei no nihaia, RENGPA nin Pathian ihril angin RENGPA kuang thilinhlan hi an dongtum sa hrang kha a ni.

¹⁰Tânga khan sûn sômminli le zân sômminli ki oma, RENGPA khan kha zoro khom khan ki thu a lei irngaituaa, RENGPA khan ki thu a lei irngaituaa, RENGPA khan nangni that loi a sa a ti tâk a ni.

¹¹RENGPA khan, ‘Thoiin lân, ni mihai mâ hruai ro, an pahai kuanga pêk ki inkung tak ram pana, lua hrangin fe mai ri sehai,’ a ni ti a ni.

¹²Atûn chu Israelhaio, RENGPA nin Pathian hin nangnia imo nangni a inphût? RENGPA nin Pathian kha chia, a nuamlam murdi tho’n, a saterenga lungrîl murdia ama vai lungthung le a sinthohai,

¹³a vuana nangni ki ihril nin sana hranga a thupêk le a thu’nkung zômhai hi mo ni ma?

¹⁴Irvân pumpui hai, irnêng le a sûnga om murdi neitu hi RENGPA kha a ni;

¹⁵khaang dôra mi roiinpui khan nin puhai kha a sân lung a thunghaia, nam dang murdihai nêkin nangni a inthang lik tâk a ni.

¹⁶Khanchu, atûn hin chu RENGPA thu kha zôm unglân, nin tukul inlian ta no roi.

¹⁷RENGPA nin Pathian hi pathianhai Pathian, rênghai Reng, Pathian roiinpui, sinthothei le ichiom tak kha a ni; tûte theibîk nei maka, inthêm inhnê thei lak ni ma.

¹⁸Farahai le meithâihai thu kha dik takin a ngaitua pehai ngai, nin laia nam dang omhai khom lung a thunga, an fâk hrang, an nêk hrang a pêkhai ngai a ni.

¹⁹Khasikin nin laia ram dang mihai kha lungthung sa unglân, nangni khom Aigupta rama mikhual nin ni kha te.

²⁰RENGPA nin Pathian kha chi unglân, a sintho unglân, ama kha chel khak roi; inkungna hrangin a’rhming vai sâm ngai roi.

²¹Nin mit ngeia nin ihmu, thil roiinpui tak tak le irkhêl tak tak tia nangni chôiindômtu hi nin Pathian chu a ni.

²²Nin puhai, mi sômsari kha, Aigupta rama an chuma, atûn chu RENGPA nin Pathian khan ârsi dôra tamin nangni an pungtir tâk a ni.