Read Hrangkhol DÂN INHNINA 11 Bible Online

DÂN INHNINA 11 - Hrangkhol bible

DÂN INHNINA 11

¹Khan, RENGPA nin Pathian kha lungthung unglân, a thu zôm unglân, a thu’nkunghai, om hrang dân a itihai, a thupêkhai zôm mai roi.

²RENGPA chungchâng, nangni ngeiin nin inhriathai kha a ngaitua ngaia. Kha thil inhretuhai kha nin nâi le tehai ni mahai, nangni ngêt hi nin ni, RENGPA isepna irkhêlzia hai, a roiinpuizia, ircham a neiziahai le sin a tho theiziahai nin hmua.

³Aigupta rêng Faroa le a ram sûnga irsinsiana thilirkhêl tak tak a ithohai,

⁴Aigupta sipaihai, an sakorhai le an sakor tâli a isoisak lamhai le nangni an irzûl laia Tuipui Sena a inngîmtir lamhai, a vuan tena a itho’n siat tâk thuhai nin inhriat zit a ni.

⁵Hi hmun nin hong tung mân, ramchâra nin om laia nin chunga a sin tho hai,

⁶Reubena irchi laia Eliaba nâi Dathana le Abirama hai kha, an in sûng mihai, an puan in hai, an siahlohai le an sâhai kha mi tin mithmua irnêng a hong chatin a inlempaihai ving a ni.

⁷RENGPA’N sin roiinpui a ithohai kha nin mit ngeiin nin hmu kha te.

⁸Thupêk, a vuana nangni ki ihril murdi hi zôm unglân; khanchu, inrûkin irfôk thei nin ta, nin fena hrang rama khan lût thei nin ta, lua thei nin ta,

⁹Khuaihlutui le dûttui luangna ram, nin pahai kuanga khom pêk nangni a inkung tak rama khan dam insôt thei nin ti.

¹⁰Nin ram, nin ilua hrang hi, nin omna ngai Aigupta ram ang kha ni ma; khataka nin chîmu songhai kha tuia infâ’n nin indot a nang ngai.

¹¹Nin ilua hrang ram kha tâng le irhôra sip a nia, irvân rotui dong tamna ram a ni.

¹²RENGPA nin Pathian khan kha ram kha a sân an dota, kum bul ata kum mong dênin a donsui mai a ni.

¹³Khanchu, a vuana nangni ki ihril thupêkhai hi zôm roi, RENGPA nin Pathian hi lungthung unglân, a sate’n a sin tho roi.

¹⁴Rua masa le ro hnungkhôn kha nin rama a zoro taka inthotir a ta, nin buhai, nin grephai, nin olivhai, a zoro taka ât thei nin ti;

¹⁵nin sa fâk hrang sûlhai khom indôn a ti. Nangni khom, khop taka fâk man mai thei nin ta, a sân khop nin ti.

¹⁶Irdîn roi, mâni irhuang irhlômin pêtna lik chin ni, pathian danghai chubai mûkin an sin thôna nin ti.

¹⁷RENGPA kha a ninginmur a ta, irvânhai khi khârin, rua inthotir no nia, irnênga ite rana no ni. RENGPA nangni pêk ram satak ata hi irhmangna lat nin ti.

¹⁸Khasikin, a sân inhroi unglân, a sân inhlu roi, nin inhriat mai theina hrangin nin bâna khit khop unglân, nin mit kâra michal khitnahaiin hmang roi.

¹⁹Nin nâihai khom irchutir roi, in sûnga nin toi laiin, lampuia nin fe laiin, nin zâl hrangin le nin thoi hrangin hril ngai roi.

²⁰Nin mikot chunghaia irziak unglân, nin tual lûtna mikothaia târ roi;

²¹Khanchu, nin pahai kuang pêk a inkung rama hin nin nâihai leh sôt tak dam nin ta, irnêng hi irvânin a’rkhu sûng chu dam nin ti.

²²A thupêk nangni ki ihril murdi hi zôm unglân, tho ngai roi. RENGPA nin Pathian kha lungthung unglân, a nuamlam angin om unglân, ama kha chel khak roi.

²³RENGPA khan nin makunga hi nam murdi hi inhnotsuak a ta, nangni nêka nam tam ual le hrât ualhai kha an ram luapai pehai nin ti.

²⁴Nin isirna kipa nin ram ni thiai a ti. ramchâr le Lebanon kâr, Eufrates dung le Mediteranean tuipui kâr ram kha nin ram ni zit a ti.

²⁵Tûte nangni lei danh thei zel om no nihai. RENGPA nin Pathian khan a lei iti tâk angin nin ifena kipa mihai kha nin makunga lei inchitirhai thiai a ti.

²⁶Satvurna dong theina le khosâl tong theina lampui a vuan hin nangni hril ki ti, inthang roi.

²⁷A vuana nangni ki ihril RENGPA nin Pathian thupêk zôm hi satvur dong theina lampui a ni.

²⁸A vuana nangni ki ihril RENGPA nin Pathian thupêk zôm nuam loihai, tho hrang nangni ki ihril, tho loia pêt irhmang hai, nin la inhriat ngai loi pathian dang biakhai hi khosâl tongna lampui a ni.

²⁹RENGPA nin Pathianin nin ilua hrang ram, nin ipan hi, nangni a hruai intung tika chu Gerizim tânga satvurna lampui hi inpuang unglân, khosâl tongna lampui Ebal tânga inpuang sa roi.

³⁰Hi tânghai hi Jordan dung thang tiang, Kanaan ram sûnga om Jordan irhôr kho thang tâng, Gilgal kho kôla om a ni.

³¹Jordan dung nin irkân vâng tâka, RENGPA nin Pathianin ram nangni a ipêk kha nin lua vâng ta. Kha ram kha nin lâka, omhmun nin khuar tika chu,

³²thu’nkunghai le om hrang dân a vuana nangni ki ihril murdi hi zôm ngêt roi.