Read Hrangkhol DÂN INHNINA 12 Bible Online

DÂN INHNINA 12 - Hrangkhol bible

DÂN INHNINA 12

¹RENGPA nin Pathian nangni pêk ram nin luaa, nin dam sûnga ngûk taka nin izôm hrang thu’nkunghai le om hrang lamhai kha hi hi a ni.

²Nin va iluapai pehai hrang namhai an pathian an ibiak, hmun tâng irsângtak taka mihai, muala mihai, thing buk tinrêng buk irhlîma omhai kha, nin insiatpai zit hrang a ni.

³An maichâmhai kha inthekindarh nin ta, an lungphunhai kha sukinsiat nin ta, Aseri irlim an thing phunhai kha hâl nin ta, thinga millim an isinhai kha hlek insiat zit nin ta, hihai makunghaia hin chubai mûka an kûn nôk ta loina hrang dôrin insiatpai nin ti.

⁴Hi mihai itho angin RENGPA nin Pathian hi nin ibiakna hrang ni ma.

⁵Israel nam murdi ramchâr lai ata RENGPA khan a’rhming omna hrang hmun inkhat inthang a ta, kha khan a makunga nin ihong irchun ngai hrang a ni.

⁶Kha khan nin hâlirvôm thilinhlan hai le nin thilinhlan danghai nin hong inhlan hrang a ni; nin sôma inkhathai, nin thilpêk hai, nin inkung chumna thilinhlan hai, nin nuam thilinhlan hai, nin sâ a tê suak masa takhai, nin hong ichôi ngai hrang a ni.

⁷Kha khan RENGPA nin Pathian makunga, nin kutchôi sat a vura, nin thil nei sahai kha, nin sûngkua’n raifân takin nin ifâk ngai hrang a ni.

⁸Kha tika chu atûna mâni nuam nuama nin itho ang hin nin itho ta hrang ni ma.

⁹Atûn chu, RENGPA nin Pathianin nangni a ipêk hrang rama lûtin la’rngam mak chêia.

¹⁰Jordan dung nin kâia, RENGPA nin Pathianin nangni a inluatir hrang rama nin oma, nin kôla nin râlhai ata lungngam taka nin om tika chu,

¹¹RENGPA nin Pathianin a’rhming omna hrang hmun a inthanga khan, nangni ki ihril murdi kha, nin hong ilâk hrang a ni. Nin hâlirvôm thilinhlan hai, nin irbôlna hai, nin sôma inkhathai, nin thilpêkhai, RENGPA kuang nin inkung takna thilinhlan hai kha hong chôi ngai roi.

¹²Nin nâinu, nâipa hai, nin suakpa le suaknu hai, nin khuaa om Levia irchihai le RENGPA nin Pathian makunga raifân takin fâkin ne roi.

¹³Nin inuam nuamna hmuna nin hâlirvôm thilinhlanhai hi nin inhlan hrang ni ma.

¹⁴Nin laia nam khat ram ata RENGPA hmun inhlana vai nin hâlirvôm thilinhlanhai hi inhlan nin ta, tho hrang nangni ki hril murdi hi nin itho hrang a ni.

¹⁵Nin sâ vâihai rêk chu nin omna kipa that thei nin ti. RENGPA nin Pathianin sâ nangni a ipêk ka kai kha fa thei nin ti.

¹⁶Sa thisen rêk chu nin ifâk hrang ni ma, irnênga luang irhmang hrang a ni.

¹⁷Nin ina khan sôma inkhat, nin bu, uain, sahriak hai le nin sâ vâi le belra pâl laia suak masa tak, nin chonginkungnaa, ngaihoi thilinhlan hai, hruaithe irthârna thilinhlan hai kha fa thei no chin ni;

¹⁸RENGPA nin Pathianin hmun inthanga khan, a makunga ngêt nin ifâk lem hrang a ni, nangni le nin nâipahai le nin nâinuhai, nin suakpahai, nin suaknu hai, nin khuaa om Levihai le; RENGPA nin Pathian makunga nin kutsuak murdi raifân takin nin iom hrang a ni.

¹⁹Nin rama nin om sûng chu Levia irchihai hi uksak loiin om no roi.

²⁰RENGPA nin Pathianin a inkung anga nin ramri a’rzattir tika chu nin nuamna kipa nin sâ irzuk ang kha fa thei nin ti.

²¹RENGPA nin Pathianin a’rhming siana hrang hmun a inthang kha, nin omna ata a hla okin chu RENGPA nangni ipêk sâ vâihai kha nangni ki ihril ang hin that thei nin ti, nin nuam dôrin mâni ina a hmê fa thei nin ti.

²²Sakhi le sazuk hme nin ifâk angin mi irthianghai le mi porinchehai khomin a hmê kha fa thei an ti.

²³Sa thisen rêk chu fa viat viat no roi, hringna kha thisena a oma, a hringna le ile nin ifâk hrang ni ma.

²⁴Tui irpai angin irnênga thisen kha irpai ri se, fa no roi.

²⁵A thu anga nin tho’n chu RENGPA chu lôm a ta, nin irchihai le nin ta hrangin la sa a ti.

²⁶RENGPA kuanga inhlan nin inkung thil serhai rêk chu a hmun inkunga khan nin hong ichôi hrang a ni.

²⁷RENGPA nin Pathian maichâma hâlirvôm thilinhlan zâthai, maichâma thisen intheka, a hme fâkhai hrang zât kha, kha ngêta khan nin hong ichôi hrang a ni.

²⁸Hi ki thuhril murdihai hi zôm rip unglân, RENGPA’N sa a iti lam le a nuamlam kha tho nin ta, nin irchihai le nangni hin kumkhua’n hong sapui nin ti.

²⁹RENGPA nin Pathianin, nin va inhnot suakpai hrang namhai kha an boipai pehai tika chu,

³⁰a irhmangpaina ang thil kha nin itho viat hrang ni ma; an ibiak pathianhai kha zong suakin, ‘Itin mo an ibiak ngai?’ tiin an itho anga biak sa tum no roi.

³¹An Pathian an ibiak hrang ni ma; RENGPA intir lam tak, thil chi tinrêng tho hi an uar ngai. An maichâmhai khan an nâinu le nâipa hai ngêt khom hâlirvôm thilinhlana an hâl ngai a ni.

³²Nangni ki ihril murdi hi tho ngêt roi; ite bôk no roi, ite irhmâi sa ual no roi.