Read Hrangkhol DÂN INHNINA 13 Bible Online

DÂN INHNINA 13 - Hrangkhol bible

DÂN INHNINA 13

¹Nin laia deipu mani, irmang nei uar mani thil irkhêl tak tak le irsinsiana nangni lei hril sianlân,

²an lei ihril ang thil irkhêl tak tak le irsinsianahai kha tung dik ngai khomsian, uksak no roi. “Thoi ba, pathian dang biak hrang zong ei ti, nin la inhriat ngai loihai sintho nin ta,” ti khomsian;

³khaanga lei ti deipu le irmang phan uarhai thu kha uksak no roi; RENGPA nin Pathian kha a sate’n le lungrîl murdi’n lung nin thung le lungthung loi ti RENGPA nin Pathianin nangni a ifia a ni.

⁴RENGPA nin Pathian hnung kha zui unglân, a sin kha tho roi.

⁵Khaang deipu le irmang nei uarhai kha nin ithat hrang a ni, RENGPA nin Pathian, Aigupta ram ata nangni hruaisuaktu chunga tehel nangni an zongtira, RENGPA nin Pathianin om hrang dân nangni a inkhîk irhmu ata nangni an pêttir a ni, khaanga nin laia mi sual om kha nin irkiangtir hrang a ni.

⁶Ni urêngpa mani, ni nâipa mani, ni pa’n mani, ni nâinu’n mani ni dôngma nei laiin mani, ni rual irnaipui takin mani, ni nu le ni pahai lan hre ngai loi pathian biak hranga nang an inthêm kha zôm no ro,

⁷Ni kôl nâia omhai pathian mani, irnênga om rêng rêng mi dang pathian mani biak hranga nang an fialin chu,

⁸an thu kha irngai no’n lân, uksak hliak no ro; anni kha lunginkham no’n lân, inren ual hliak no ro, sûnghual khom tum no ro,

⁹khahai kha nin ithatpai hrang a ni, nangin kut tha masa ni ta, an chunga mipui an ipût nôk hrang a ni; suak nin nina, Aigupta ram ata nangni pêt irhmangtir a tum sikin.

¹⁰Khan Jordan dung nin irkân tena RENGPA’N ram a inkung kha nangni inhriattir a ta, nin râlhai ata nangni hrung a ta, irtharngam takin lêng ta nin ti.

¹¹Khanchu, Israel mi murdi’n inhria an ta, chi an ta; nin laia khaanga thilsual kha tho nôk ta ngai no chin ni.

¹²RENGPA nin Pathianin nangni a ipêk khopuihaia nin om tika,

¹³nin laia mi sual, chukloi tak tak omna khuaa mihai kha, nin la ibiak ngai loi pathian biak hrangin an inthêm lût ta, ti nin inhriatin chu,

¹⁴sui nin ta, ngûk takin irdon vêl nin ta, nin laia khaang thil porinche kha a tho an om ngêt ti nin inhriatin chu,

¹⁵kha khuaa mihai kha khandaiin nin ithat hrang a ni, a sûnga mi murdi le an sâhai kha nin ithat zit hrang a ni.

¹⁶An thil nei murdihai nin ilâkhai kha khopui tual zôl irzat taka buk khôm nin ta, an khua le sum nin ilâkpai pehai kha nin ihâl zit hrang a ni; RENGPA ta hranga ser tâk kha tûte’n la no ri sehai; RENGPA nin Pathian ta hrang hâlirvôm thilinhlana hâl irhmang zit hrang a ni; kumkhuaa thil chim siat chit ang ni a ta, tûte’n an inding nôk hrang ni ma.

¹⁷RENGPA tah hranga ser tâk chu tûte’n la no ri se; khanchu, RENGPA ningmur kha chum a ta, lung nangni inkham a ta, nin chunga khâzana nei a ta, nin pahai kuanga a inkung angin nangni inpungtir nôk a ti.

¹⁸RENGPA nin Pathian irhâi hi irngaitua unglân, a thupêk nangni ki ihril hi zôm unglân, RENGPA nin Pathian nuamlam kha tho zôi zel roi.