Read Hrangkhol DÂN INHNINA 14 Bible Online

DÂN INHNINA 14 - Hrangkhol bible

DÂN INHNINA 14

¹RENGPA nin Pathian mihai nin nia, khasikin, mithi nin sûnin ir-ât phop no unglân, nin michal sam epinkol sa no roi.

²Rammuala om murdihai laia nangni hi RENGPA nin Pathian ta hranga nam inthang, ama hrang ual bîka RENGPA inthang suakhai kha nin ni.

³Thil porinche rêng rêng nin ifâk hrang ni ma.

⁴An hme nin ifâk thei hrang sâ chu, hihai hi a ni: sehrât, kêl le belra,

⁵sakhi, sangal, sazuk, sarângtun, sarza, ram sial, ram belra,

⁶sâ tinrêng, a ke mitin irphal le insoia fâk ngai chi chu fa thei nin ti.

⁷Insoia, a mitin irkak loi, a mitin irkaka insoi loi hme chu nin ifâk hrang ni ma. saringsei hai, mizupui hai, rôl mizupui mani nin ifâk hrang ni ma; an ifâk kha insoia, an mitin irkak loi a ni; nin ta hrangin a iporinche a ni.

⁸Vok hi a mitin a’rkak, khannisian, a ifâk insoi ngai maka, a hme nin ifâk hrang ni ma, nin ta hrangin a iporinche a ni. An hme nin ifâk hrang ni maka, a thi ruak khom nin itôn hrang ni ma.

⁹Tuia om hihai hi fa thei nin ti: a hlip le mitha nei murdi hme chu fa thei nin ti.

¹⁰a mitha nei loi, a hlip nei loi hme chu nin ifâk hrang ni ma, nin ta hrangin a porinche a ni.

¹¹Vâ fâk thei murdi chu fa thei nin ti.

¹²Hihai rêk hi chu nin ifâk thei hrang ni ma: Irmu, irmu saloi, irmu ârlâk,

¹³râikoso, kâikuangrâl, bukhâite rêng rênghai,

¹⁴vaâk chi rêng rênghai,

¹⁵vâ irsâng, bâk tuikhanglian vâ, irmu chi rêng rêng,

¹⁶suitilil, simbu,

¹⁷tuivaârngoi, râikoso, vadung irmu,

¹⁸tuivaârngoi dîl vâ rêng rêng, vakhohri le bâkhai.

¹⁹thilhring irki minlia irvâk rêng rêng chu nin ta hrangin a porinchea, fâk hrang ni ma.

²⁰Vuang thei zât sâ irthiang ka kai chu fa thei nin ti.

²¹A binga thi chu i ang sâ khom nin ifâk hrang ni ma, nin kho sûnga omhai fâk hrangin an kuang pe thei nin ta, zuar sa thei nin ti. RENGPA nin Pathian ta hranga nin iser irthiang hrang nam nin ni.

²²Nin loimâna chîmu tharhai kha sôma inkhata, kum tin sepai hen roi.

²³RENGPA nin Pathianin a’rhming omna hranga a inthang hmuna khan fepui unglân, a makunga khan nin buhai, uain hai, oliv hriak hai; nin sehrât le belrate suak masa tak sôma inkhat nin ipêkhai kha fa ngai roi. RENGPA nin Pathian kha a chi hrang lam nin hong inhriat theina hrangin.

²⁴Nin omna kha a sân a hlaa, RENGPA nin Pathian satvurna nin idong kha vong an takin chu,

²⁵zuar unglân, a man kha intêl unglân, RENGPA nin Pathianin nangni a inthangna hmuna fepui roi.

²⁶Kha khan sehrât hai, belra hai, uain hai, zu haiin nin irzuk ka kai ircho unglân, nin sûngkua’n RENGPA nin Pathian makunga raifân le lôm takin fâk irhlôm roi.

²⁷Nin khuaa Levia irchi om sahai kha nin ienkhûmhai hrang ni ma, nin laia irchon lâmkhîl dongtum an inei loi a ni kha te.

²⁸Kum thum kuma nin sôma inkhat kha nin omna khuaa hmun inkhata bukkhôm ngai roi.

²⁹Irchon lâmkhîl an nei sa no sikin Levia irchihai khan kha kha fa an ti; mikhualhai, fara le meithâi, nin kho sûnga omhai khomin an ifâk hrang a ni; khop takin an ifâk hrang a ni. Hiang hin ti unglân, RENGPA nin Pathian khan nin itho ka kai nangni irhniangtir a ti.