Read Hrangkhol DÂN INHNINA 15 Bible Online

DÂN INHNINA 15 - Hrangkhol bible

DÂN INHNINA 15

¹Kum sari danh zêla nin lâkai intâng nin ingaidam hrang a ni.

²Hiang hin ngaidam dân chu a ni; Israel mi rêng rêngin a Israel chanpui sum inpûktir sianlân, a kum sari tôpa chu a ingaidam hrang a ni, a sum intâng kha a isîng hrang ni ma; RENGPA ngêtin a intâng kha an nuai irhmangpai pe tâk a ni.

³Nam dangin lâkai an intângin chu sîng thei ni ti; nangni mi, nin kuanga, a lâkai intâng chu nin isîng hrang ni ma.

⁴RENGPA nin Pathianin nangni a ipêk rama khan sat nangni a vur hrang sikin mi’nriang rêng rêng inomtir loi nin itum hrang a ni.

⁵RENGPA nin Pathian irhâi kha irngaitua unglân, a vuana nangni ki ihril, a thupêk murdi hi zôm phot mai roi.

⁶RENGPA nin Pathian hin a inkung tâk angin sat nangni vur a ta, nam tamtak inpûktir nin ta, nangni’n chu pûk pe no chin ni; nam tamtak chunga ircham nei no nihai.

⁷RENGPA’N ram nangni a ipêk nin omnaa nin urênghai laia inriang an omin chu, nin urênghai inrianghai ata kha nin lungrîl inngar no unglân, irpâlpuihai no roi,

⁸Nin tikinhoi unglân, an innang do dôr inpûktir roi.

⁹Lungrîl sual irput no unglân, kum sarina, lâkai intâng ngaidamna zoro anai tâka; tiin ni urêng inriang kha ngîkin ni mitin kâp no’n lân, itea khom irkômpui no unglân; nin chunga a lungchuk loina RENGPA kuang an sîrin chu thilsual tho nina nin ti.

¹⁰Irphal takin pe unglân, inpâm lungrîl pumin pe no roi; khaanga nin tho’n chu RENGPA nin Pathianin nin kut inzar satvur a ta, nin itho tinrêng tuanintung nin ti.

¹¹Nin rama inriang om loi zoro om no nia; khasikin, thu nangni ki pêk, nin rama inriang hai, irsam hai le nin urênghai ata a sân irphalin irhong roi.

¹²Nin Israel chanpui, pasal mani, nupang mani suaka an hong irzuarin chu, kum ruk sor nin ta, nin insua hrang a ni.

¹³A kum sarina chu manboiin nin insua hrang a ni.

¹⁴Kut rongin nin insua hrang ni ma, belra mani, uain mani RENGPA kuang ata satvurna nin idonghai kha irphal takin pe ngai roi.

¹⁵Aigupta rama khan suak nin nih ti kha inhre mai roi; RENGPA nin Pathianin suak nangni a insua a ni.

¹⁶Nin suak khan, nin sûngkua kha kanin suak nuam loiin nin kuang om an thang khom a ni thei.

¹⁷Khaang khan a ni’n chu, nin mikot kôla inngîrtir nin ta, a mikuar ir-ôngtir nin ta; khanchu, a hring sûngin nin suak ni ta a ti. Nin suaknu khom khaang khan tho ngai roi.

¹⁸Inpâm lungrîl angin nin suak kha insua no roi, nin sin kha kum ruk a tho tâka, irhlofâk nin ihruai ni sian nin sum kha bâk hni sêng ta nin ti. Khaang khan tho unglân, lam tinrênga nin Pathian khan nangni irhniangtir a ti.

¹⁹Nin sehrât le belrate a suak masa takhai chu RENGPA nin Pathian ta hrangin khâi roi. Sehrât kha sor no unglân, belra khom a mul ep no roi.

²⁰Kum tin RENGPA zoro inkunga khan, RENGPA nin Pathian makunga nin sûngkua’n nin ifâk ngai hrang a ni.

²¹A ke’nbâi mani, a mitcho mani, hmêlvei chu RENGPA nin Pathian kuanga khan nin inhlan hrang ni ma.

²²Nin kho sûnga rêk chu fa thei nin ti, sakhi hme le sazuk hme nin ifâk angin mi irthianghai le porinchehai khomin fa thei an ti.

²³A thisen rêk chu nin ifâk hrang ni ma; tui angin bunpai roi.