Read Hrangkhol DÂN INHNINA 16 Bible Online

DÂN INHNINA 16 - Hrangkhol bible

DÂN INHNINA 16

¹Abib tha hin RENGPA nin Pathianin Aigupta ram ata zâna nangni a hruai suaka; Abib tha hin RENGPA nin Pathian hrangin Ferkân kût hi hmang ngai roi.

²A’rhming omna hrang RENGPA hmun inthanga khan, nin sehrât mani, belra mani, kêl mani Ferkân kût hrangin RENGPA nin Pathian kuang inhlan roi.

³A hme chu bai chol kop le nin ifâk hrang ni ma; sûn sari sûng chol kop loi bai, tuang entîrna bai kha nin ifâk hrang a ni, Aigupta ram nin suaksan hranga irhnot taka nin ifâk ang khan. Nin dam sûngin Aigupta, nin inriangna ram nin suaksan nikhua nin inhriat maina hrangin fa ngai roi.

⁴Nin ram sûng rêng rênga sûn sari sûng chu chol a iom hrang ni ma. A sûn masa tak chohnung tiang, nin thil inhlan, nin sa that nin ifâk ban hme khom a tûka hrangin se hrang ni ma.

⁵RENGPA nin Pathianin lua hranga nangni a ipêk kho sûnga khom Ferkân kût hme hi nin inhlan hrang ni ma;

⁶RENGPA nin Pathianin a’rhming omna hranga a inthangna ngêta khan nin Ferkân kûtna hrang kha, khohloi misa tâk hrangin, Aigupta ram nin suaksan zoro anga khan nin inhlan hrang a ni.

⁷RENGPA nin Pathian hmun inkunga khan but nin ta, nin ifâk hrang a ni, a tûk zînga chu nin puan in tiang irhei thei nin ti.

⁸Sûn ruk sûng chu chol kop loi bai fa nin ta, a sûn sari ni’n chu RENGPA nin Pathian hrangin inkhômpui ir-uptak nei unglân, kha nikhuaa khan chu sin rêng rêng tho no roi.

⁹Bu ât nin phut nia irthokin hapta sari tep unglân;

¹⁰khanchu, Pentikos kût kha hmang unglân. RENGPA nin Pathianin satvurna tamtak nangni a vur ata ama chôiindômna hrangin nin thil manboi pêkhai kha inhlan roi.

¹¹RENGPA makunga khan nin nâihai, nin siahlo hai, nupang pasalin nin khuaa Levia irchi hai, nam danghai, fara hai le meithâi hai nin laia om sahai leh khan raifân takin RENGPA nin Pathianin a’rhming omna hranga a inthangnaa khan hruai inthê roi.

¹²Hi thu’nkunghai hi ngûk takin zôm unglân, Aigupta rama suak nin ni ngai kha inhre mai ngai roi.

¹³Buhai nin ât zoi zita, nin grephai nin sôm zoi zit hnunga, sûn sari sûng kairêng kût hmang ngai roi.

¹⁴Nin nâihai, nin suakpahai le suaknuhai, Levia irchihai, ram dang mi om sahai, fara hai le meithâi nin khuaa omhai le raifân takin hruai inthê ngai roi.

¹⁵RENGPA nin Pathianin a’rhming omna hranga a inthangna khan sûn sari sûng hmang ngai roi. RENGPA nin Pathian khan nin kut sôlhai kha sat a vura, nangni a’rhniangtir sikin a sân nin lôm hrang a ni.

¹⁶Nin laia pasal murdi chu RENGPA nin Pathian hmun inthanga kum tin chum thum nin ihong ngai hrang a ni; Ferkân kût hai, pentikos kût hai, kairêng kût hai, RENGPA makunga khan kut rongin an ihong hrang ni ma.

¹⁷Mi tinin RENGPA nin Pathian satvurna nin idong ang takin nin thei ang ang nin ipêk hrang a ni.

¹⁸RENGPA nin Pathianin khopui nangni a ipêkna kipa roirêltu le hruaitu hranghai inkung ngai roi.

¹⁹Dik takin roirêl an ta, thiarthâk an inei hrang ni ma, fâkinrûkna hin mi vârhai mit an chotir ngaia, mi dikhai chungthu khom dik loi takin a rêl ngai.

²⁰Itiklai khomin a’rhoi tôk tak le dik takin thiltho ngai om tôk tak le dik takin thil tho ngai roi; khanchu, RENGPA nin Pathianin ram nangni a ipêk hi dam takin lua mai thei nin ti.

²¹RENGPA nin Pathian maichâm nin siamnaa kôla khan Aseri irlim, thing nin iphun hrang ni ma.

²²RENGPA nin Pathian ikhôkmâk lam lung khom nin phun hrang ni ma.