Read Hrangkhol DÂN INHNINA 17 Bible Online

DÂN INHNINA 17 - Hrangkhol bible

DÂN INHNINA 17

¹RENGPA nin Pathian kuang hmêlveina inei sehrât mani belra mani nin inhlan hrang ni ma, a ikhôkmâk lam tak a ni.

²RENGPA nin Pathianin khua nangni a ipêk sûng ka kai chu pasal mani nupang mani nin Pathian irngai hmo tamtak tho’n, a thuthung tho’nchâi om sianlân,

³pathian danghai zuiin an sinthoa, biak loi hrang ki itihai, thahai le thil dang tamtakhai khi biak om sianlân,

⁴Khaang mi kha chu an om ti nin inhriatin chu ngûk takin suisuak nin ta, Israelhai laia khaang thil khôkmâkom tak tho nin inhriatin chu,

⁵kul mikota, khaang mi kha pasal mani, nupang mani chu, hong hruai nin ta, kha mi kha lungin nin idêng that hrang a ni.

⁶Thu’nhretu inhni dôr mani, thu sika vaiin kêng dêng that thei nin ti; mi inkhat ringot sika chu nin ithat hrang ni ma.

⁷Thu’nhretu khan lungin dêng masa an ta, mipuiin dêng thei an ti. Khaang khan nin laia thil saloihai kha nin irthiang infâi hrang a ni.

⁸Mihriam that kha tho’nchâi chu a ni le ni loi chungchânghaia, inru inrûk le inru loi chungchâng haia, nin izêm pâl le pâl loi thuhai dênin a ihuap loi rêl intak nin khuaa khan nin neiin chu, RENGPA nin Pathianin a inthang hmuna khan nin ifepui hrang a ni.

⁹Levia irchi, ochaihai le kha laia roirêltu hranga inkunghai kha irdon nin ta, anni khan a rêl hrang lam nangni hril an ti

¹⁰RENGPA hmun inthang ata tho hrang dân nangni an ihril ang ngeia khan nin irêl hrang a ni,

¹¹nangni an ihril ang ngei le an thu inchuk ang ngêt khan nin irêl ngai hrang a ni.

¹²RENGPA nin Pathian sinthotu ochai thu mani, roirêltu hranga sia thu mani nuam loia tho indanglam viattu chu thatpai hrang a ni, Israel ram sûnga khaang thil saloi kha nin irthiang infâi hrang a ni.

¹³Mi tinin inhriat an ta, chi an ta, thil tho papai ta no nihai.

¹⁴RENGPA nin Pathianin ram nangni a ipêk hranga nin tunga, nin luaa, omhmun nin nei hnung chu, ‘Ei kôlvêla namhai angin rêng nei nin ta,’ la ti nin ti.

¹⁵Nin rêng hrang chu RENGPA, nin Pathian inthang ngêt ni ri se; nangni mi a ini ngêt hrang a ni; nam dang chu nin rêngin siam no roi.

¹⁶Reng khan a sipaihai hrangin sakor a inei intam hrang ni ma, Aigupta rama sakor la’nsap hrangin mi a itîr hrang ni ma; RENGPA khan ‘Kha tiang khan nin ikîr nôk hrang ni ma,’ a tia.

¹⁷Dôngma khom a inei intam hrang ni ma, Pathian irheisanna a ti. Sumpuan le rângachak khom a inei intam hrang ni ma.

¹⁸A ram rêngtoihmuna a toi tika chu Levia irchi, ochaihaiin an idôn Dan bu hi irziak irzôttir a ta;

¹⁹kha kha dôn a ta, a dam sûngin a itep ngai hrang a ni; hi a dânhai le thu’nkunghai hi ngûk takin zôm a ta, RENGPA, a Pathian chu a ichôiindôm ngai hrang a ni.

²⁰Khanchu, a’rchi Israel danghai nêkin irsia irsâng no ni, RENGPA thupêk inkhat lua khom mumal boiin om no nia, sôt tak dam a ta, a’rchihai khomin Israelhai chunga roirêl mai an ti.