Read Hrangkhol DÂN INHNINA 2 Bible Online

DÂN INHNINA 2 - Hrangkhol bible

DÂN INHNINA 2

¹A mong taka chu RENGPA thupêk angin kin kîr nôk lele tâka; Tuipui Sen tiang kin pana, Edom tâng ram chu sôttak ei vêla.

³“Hi tâng hi nin vêl sôt ta hrai ta, hmâr tiang pan roi,” a ni tia.

⁴Edom tâng ram nin ife theng hrang a nia, nin urêng hlatak, Esaua irchihai ram kha nin ife theng hrang a ni, a sân nangni lei chi an ti.

⁵Khannisian, nin idoi hrang ni ma, an ram chu buk hni te lua nangni pe no ning. Seir tâng ram kha Esaua irchihai ta hrangin ki pêk tâk a ni.

⁶Bu le tui nin nuamin chu an kuang ata nin irchôk hrang a ni, a tia.

⁷RENGPA nin Pathian khan lam tinrênga sat nangni a vura, ramchâr irzat taka nin irvâk laihai khan nangni a enkol thiaia, nin Pathian RENGPA khan kum sômminli sûng chu nangni a ompuia, ite irsam mak chêi kha te.

⁸Khanchu, kin fe thiaia, kin urêng Esaua irchi, Seir tânga omhai kha tehel kin zonga. Elat le Ezion-geber ata Jordan phâi lampui kin pansana; hmâr nisua tiang irheiin Moab ram kin pan tâka.

⁹RENGPA’N ki kuang, ‘Lota irchi, Moabhai chu, hong inbuai no roi, nin idoi hrang ni ma. Ar khopui chu an ilua hranga ki ipêk hrang ni ma,’ a tia.

¹⁰(Ar khuaa hin mi lian hrâttak tak Em an itihai an om ngai. Mi lian chi dang, Anak an itihai dôra irsâng an ni sa.

¹¹Refa-hai ti an ni sa, khannisian, Moabhai khan Emhai an ti ngai.

¹²Edom rama hin Hor-hai an om ngai; khannisian, Esaua irchihai hin an irzûlpaihai zit a ni, an indartira, an ram chu an luapai pehai ta a ni. Khaang dên khan Israelhai khomin RENGPA’N ram a pêka lei omhai chu an inhnotsuakhai a ni).

¹³RENGPA thupêk angin Zered dung kin irkâna,

¹⁴Kades-barnea kin suaksan ata kha kum sômthum a fe tâka; kha zoro laia varâl kâi kakai chu RENGPA iti ang ngêtin a thi zit nam an ni ta.

¹⁵RENGPA khan a’rhmangtirhai ving mâka chu, a idoihai mai a ni.

¹⁶An thi zoi zit hnungin,

¹⁷RENGPA’N ki kuang,

¹⁸‘A vuan hin Moabhai ramri, Ar khopui kôla fe theng nin ta,

¹⁹Amon-hai, Lota irchihai ram va tung nin ta, anni chu inbuaihai no roi, doihai sa no roi, an ram chu an omna hrangin ki ipêk tâk a ni, a hlekte khom nangni pe no ning,’ a tia.

²⁰(Kha ram kha Refa-hai ram ti a ni ngai. Amon-haiin chu hi mihai leh Zamzum-hai an ti.

²¹Anak-hai ang dêna irsâng a ni, tamtak an nia, nam hrât tak an ni ngai; khannisian, RENGPA khan a that zôia; Amon-haiin an ram chu an neia, an lua tâk a ni.

²²Esaua irchi, Edom mihai hrangin Seir kha RENGPA’N khaang dên khan a itho pe a ni. RENGPA khan Hor-hai kha an boipaia; Edom-haiin an ram kha an lua tâk a ni.

²³Mediteranean tuipui vakama Kret chômbung mihai an lei oma, A phuta om Av-hai kha an irhmangtira, an ram kha an luaa, Gaza dênin an neipai zit tâk a ni.)

²⁴Moab ram kin khêl hnungin RENGPA khan, ‘Thoiin lân, Arnon dung hi irkân roi, Amor rêng Sihona, Hesbon kho rêng kha, a ramhai leh nin kuta ki pêk tâka; doi unglân, a ram kha irchupui roi.

²⁵a vuan ata irthokin nin makunga irvân hnuaia om murdi ki inchitir hrang a ni, nin irhming vai khom an inhriatin inthing nor nor an ti,’ a ni tia.

²⁶Kedemot ramchâr ata Hesbon rêng Sihona kuang irngei thu chôiin palai ki tîra.

²⁷‘Ni rama hong theng kin ti, chang tiang le vei tiang pêt no ni ung.

²⁸Kin nêk hrang bu le kin in hrang tui khom nin kuang ata la zit kin ti; kin Pathian RENGPA ni pêk ram, Jordan râl kin tung mâka chu hong theng kin ti.

²⁹Seir rama om Esaua irchihai le Ar khuaa Moab-a omhai kuang kin itho ang dên khan ni ram fe theng ringot ni phal pe ro’ ki tia.

³⁰Hesbon rêng Sihona khan a rama kin ife theng chu phal maka, kin inhnêa a ram ei neipai pe theina hrangin RENGPA khan a lungrîl an ngartira, a tukul a inlian a ni; atûn ten a ram kha kin neipai pe tâka.

³¹RENGPA khan, ‘Sihona le a ram kha khom neipai pe unglân, lua roi,’ a tia.

³²Sihona le a pâl murdihai khan Jahaga a ni hong doia.

³³Kin Pathian RENGPA khan ama kha a nâihai le a pâl murdihai khan ama kha a nâihai le a pâl murdihai le a ni pêka, kin that zita.

³⁴A khua murdi kin lâka, kho sûnga omhai kha nupang pasal, a chîn a lian, kin inboipai zita, tûte hôihai ma ung.

³⁵An sâhai rêk chu râllâk suma kin lâka, khuaa râllâk sum danghai leh kin ilâk a ni.

³⁶Arnon dung irhôr tâng chunga khua Aroer ata a tuidunga khopui omhai kha Gilead dênin kin ilâk theiloi zel om ma, RENGPA kin Pathianin a ni pêk zit a ni.

³⁷Amon-hai ram rêk chu hro ma ung, Jabok dung kâi ma ung; vadunga khopuihai le tâng rama khopuihai, RENGPA kin Pathianin hro a ikhaphaia khan chu kâi ma ung.