Read Hrangkhol DÂN INHNINA 20 Bible Online

DÂN INHNINA 20 - Hrangkhol bible

DÂN INHNINA 20

¹Irdoi hrang nin irthok suakin sakor tâli hai, sakor hai leh nangni nêka tam sipai nin hmu’n nin ichi hrang ni mah. RENGPA nin Pathian, Aigupta ram ata nangni hruaisuaktu kha nin kuang a om sikin.

²Râl doi hranga nin suak hrang tika ochai inlaltak zuang a ta, mihai kha hong inthor a ti.

³‘O Israelhaio, inhre roi, a vuan hin nin râl doi hrang nin ni tâka, indôp no unglân, chi sa no roi.

⁴RENGPA nin Pathianin nangni a ompuia, nangni san a ti,’ ti a ti.

⁵Mipui hruaituhai khan mihai kuanga, ‘In thar sin inhlan loi mo nin om? A in tiang kîr ri se, irdoinaa thina pal a ti, a in sin kha mi dangin inhlanpaina an ti.

⁶Grep phuna a ra la fa loi nin om ma ni? A in tiang kîr ri se, a grep ra kha mi dangin fana an ti.

⁷Dôngma khâp tâk, la hruai loi mo nin om? In tiang kîr sianlân, irdoinaa thina lik a ta, mi dangin neipai pena an ti; an iti hrang a ni.

⁸Kha zoia sipai hruaituhai khan, ‘Indôp lungrîl chitinrîm nin om mo? Nin omin chu in sûng tiang kîr chian roi, a sipai chanpuihai lungrîl indôptirna a ti,’ ti an ti.

⁹Sipai hruaituhaiin khaanga an tho zoi tika chu sipai pôl tin ta hrang hruaitu inkung seng hrang a ni.

¹⁰Khopui nin doi hrangin khuaa mihai kha irpe hrangin ngên masa ngai hen roi.

¹¹An kul mikot nangni an inhong pea, nin kuanga irpêk an niin chu nin suaka om an ta, nuam nuamin sor thei nin ti.

¹²An irpêk nuam noa irdoi an inthangin chu nin irhual khak hrang a ni.

¹³RENGPA nin Pathianin khua kha nangni an lâktir tika chu pasal murdi kha that zithai roi.

¹⁴Nupang hai, nâipang hai, sâhai le kho sûnga thil danghai kha mâni ta hrangin nei thei nin ti. Nin râlhai thil kha RENGPA nin Pathian khan nangni a pêk tâka, nin nuam nuamin lêng thei nin ti.

¹⁵Nin ilua hrang rama khopui ni loi, ram pên tiang daia khopuihai nin lâk tika khom, khaang khan nin isoisak hrang a ni.

¹⁶RENGPA nin Pathianin nangni a ipêk ram neituhai khopui rêk chu hring ka kaiin chu ite nin ihôi hrang ni ma.

¹⁷Nin ithathai zit hrang a ni. Hit mihai, Amor mihai, Kanaan mihai, Periz mihai, Hiv mihai, Jebus mihai kha RENGPA nin Pathian thupêk zômin thathai zit roi.

¹⁸An pathian biaknaa thil porinche tak tak an ti ngaihai kha, nangni an irchutir loina hrangin, thathai unglân, RENGPA nin Pathian ata thilsual nin itho loi hrang a ni.

¹⁹Kha kha lâk nin tuma, zoro sôttak irhual a nang khomin a kôlvêla thei kung chu phûr no unglân. A ra chu fa thei nin ta, a kung rêk chu phûr no roi, thinghai kha chu nin râl ni mahai.

²⁰Khannisianlân thingkung danghai a ra fa ngai loi chu, phûrpai nin ta, nangni a doipuhai khopui kha a siat mâka chu kha thinghai kha hmangin nin idoihai hrang a ni.