Read Hrangkhol DÂN INHNINA 21 Bible Online

DÂN INHNINA 21 - Hrangkhol bible

DÂN INHNINA 21

¹RENGPA nin Pathianin nangni a ipêk ram sûnga mi ruak hmu unglân, a thatpu inhre no unglân,

²nin hruaituhai le roirêltuhaiin ruakin tu khua mo anai tak ti irkhi hrang a ni.

³Anâi tak kho hruaitu’n chu sehrât irla, la sor ngai loi inthang suak an ta,

⁴Iva kang ngai loi kôla kai suak an ta, irnêng la tuk irlet ngai loia, ite la songna ngai loia sehrât irla ring kha an inol khiak hrang a ni.

⁵Levia chi ochai khom an ikop sa hrang a ni; mi that thubuai rêng rêng hi a’rngeitir hrangtu an nia. RENGPA nin Pathianin ama sinthotua le a’rhminga satvurna insîrtua an inkung a ni.

⁶Lam laia thi ruak nâitak kho ulianhai khan, ivakama sehrât irla, a ring an inol khiak chunga khan an kut irsûk an ta,

⁷‘Hi mi hi kin ithat ni maka, a thattu khom inhre ma ung.

⁸RENGPA ni mi Israel, Aigupta ram ata ni ihruai suakhai hi, ngaidam ta. Ngaidamin lân, poi tholoihai thisen mô chu ni mihai inpêltir no’n lân,’ an tia.

⁹Khaanga RENGPA inkung anga nin tho’n chu, mi that mô kha pêl no chin ni.

¹⁰RENGPA nin Pathianin irdoina nangni an hnêtira, mi nin manhai oka,

¹¹khahai laia dôngmate hmêl sa nin iti lam tak dôngma’n nei nin inuam a omin chu,

¹²tuang unglân, a lu voi inkol a ta, a kemitin a iep zit hrang a ni.

¹³An chel laia a sil le kai kha thûl sianlân, in sûnga khan a iom chian hrang a ni, tha khat sûng chu a nu le pa, a ihmu ta loi hrang chu, a isûn hrang a ni. Kha zoi tika chu dôngma’n nei thei nin ta, nin dôngma ni ta a ti.

¹⁴Dôngmaa nei nin nuam no’n chu an nuamna taka infetir nin ta, a’rhming nin insiattir tâk sikin, suak enkol angin nin ienkol hrang ni maka, sum le puan khomin nin izuar hrang ni mah.

¹⁵Mi’n dôngma inhni a neia, nâipasal an nei pe ru ruaia; a dôngma inren loi ual nâi chu a inren ual nâipa nêkin chu a uliana,

¹⁶a nâihai kuang irchon a sem hrang tika, a dôngma a inren ual nâi kha indit bîkin nâi lutîr dongtum a ipêk hrang ni ma.

¹⁷A nâipa ulian ual kha, a dôngma irngaiinat ual leh ni no khom sianlân, dongtum inhni a ipêk hrang a ni. Nâilutîrhai hi irngai poimo hrang an ni, dân ang taka an dongtum pêk hrang an ni.

¹⁸Mi’n nâipa tukullian, irkôk irhel nei sianlân, a nu le pahaiin hrem ngaihai khomsian inlâp no sian;

¹⁹a nu le pahaiin an omna kho hruaituhai toi khôm makunga khan hong hruai an ta;

²⁰ulianhai kuang khan, ‘Ei nâipa hi a tukulliana, mi kôkhel tak a ni, kin thu rêng rêng zôm nuam maka, zu le sa ringot a ngaitua chian,’ ti an ta.

²¹Kho sûnga mi murdi khan lungin an idêng that hrang a ni; khaang thil saloi kha nin lai ata nin inboipai zit hrang a ni. Israel mi murdi’n inhria an ta, chi an ti.

²²Thil imo khat tho’nchâi sika that kha thingrêla inkhâi a niin chu,

²³a ruak kha zân inriak hrang ni ma, a thi nî zela khan phûm hrang a ni. Khaang mi inkhâi that chu Pathian khosâl tong a nia, RENGPA nin Pathianin nangni a ipêk ram hi nin iporinchetir hrang ni ma.