Read Hrangkhol DÂN INHNINA 23 Bible Online

DÂN INHNINA 23 - Hrangkhol bible

DÂN INHNINA 23

¹Tilru koi mani, ser irtan mani chu RENGPA mihai laia an ikop hrang ni ma.

²Zâinâi chu RENGPA mihai pungkhôm laia an ikop hrang ni ma, a’rchi irlo sômna khom RENGPA mihai pungkhôm laia kop thei no nihai.

³Amon mihai le Moab mihai kha RENGPA mihai pungkhôm laia an ikop hrang ni mah. Annihai kha irlo sôm khom hek sianlân, RENGPA mihai pungkhôm laia khan an ikop viat hrang ni mah.

⁴Aigupta ram ata nin hong suak khan fâk hrang le tuidâi ten lua khom chôiin nangni lei nghâk nuam mahaia; Mesopotamia ram, Pethor kho mi Beora nâipa Balaama kha khosâl tong hrangin nangni an inphût lem a ni kha.

⁵RENGPA nin Pathian khan Balaama thu kha ngaisak nuam maka, RENGPA nin Pathian hin a sân lung nangni a thung sikin a khuasâlna kha satvurnaa an changtir ta lik a ni.

⁶Khasikin, itiklai khomin anni leh hin irngeina siam no unglân, an irhniangna hrang khom nin dam sûng chu tho pehai no roi.

⁷Edom mihai chu nin intir hrang ni ma, nin urênghai an ni; Aigupta mi khom nin intir hrang ni ma, an rama nangni an lei imikhual a ni kha.

⁸An nâi irlo thumnahai kha RENGPA mihai pungkhôm laia kop sa thei an ti.

⁹Râl doi hranga nin irthok suaka, a riakbuka nin riak khomin, thil saloi tinrêng ata nin irkiangpai hrang a ni.

¹⁰Nin zâl zoro’n nin laia mi tukhom, a chi ta sianlân, riak hmun pên tiang sûn sôtin a iom hrang a ni; a riakbuk kâra a hong ilût hrang ni ma.

¹¹Chohnung tiang tui irsil a ta, misa tâk tika chu a riakbukhai laia hong lût thei ta a ti.

¹²Riak hmun pên tiang dâi kalna hrang hmun bîk nin inei hrang a ni.

¹³Thil irzum choi nin ta, kha khan irnêng choi ir-ông nin ta, nin inel nôk hrang a ni.

¹⁴Nin buka khan enkol hrang le nin râlhai kha nangni inhnêtir hrang le nin râlhai nangni inhnêtir hrangin RENGPA nin Pathian kha a zuang ngai sikin nin buk kha nin irthiang hrang a ni, thil porinche nangni a hmu likin chu nangni rotsanna ti.

¹⁵A pu kuang ata suak rot chu nin kuang a hong intân lûtin chu tîr nôk no roi.

¹⁶Nin laia khan om sa sianlân, nin khua inkhata a inuamna taka om sa ri se, dengintheitir no roi.

¹⁷Israel mi tukhom, nupang khom pasal khom, tempila notizuara an ichang hrang ni ma.

¹⁸Pasal khom nupang khom, a’rzuar likin chu chonginkungna hrangin RENGPA nin Pathian ina chôi inlût hrang ni ma; khaang mihai chu RENGPA nin Pathian intir lam tak a ni.

¹⁹Nin urêng Israelhai kuang tangka hai, bu hai le thil dang rêng rêng, a pung neiin nin inpûktir hrang ni ma.

²⁰Nam dang chu a pung sîng thei nin ta, ni urêng Israelhai rêk chu a pung nin isîng hrang ni ma. Khanchu RENGPA nin Pathianin nangni a ipêk hrang rama nin om tikin nin thil tho murdia hong irhniang thei nin ti.

²¹RENGPA nin Pathian kuang pêk nin inkunga, pe loiin om chin ni, RENGPA nin Pathian khan nin inkung anga nin itho nangni lei sabei a ta, nin sua no’n chu thilsual tho nina nin ti.

²²Thil pe hranga nin inkung loi hi sual ni ma,

²³nin inkung tâkna na chu nin isua hrang a ni.

²⁴Mi grep irhuana nin fe’n nin nuam dôrin fa thei nin ta; aniachu, inkhat lua nin bêma nin ithun hrang ni ma.

²⁵Mi bu inding lai loia nin fe’n an bu vûi kha nuam dôr khiak thei nin ta, aniachu, kôite’n nin i-ât hrang ni mah.